Duh sak nak thawn tuah mi cu thiltha a suak

Duh sak nak thawn tuah mi cu thiltha a suak

          Veikhat ah Long nei tupa pakhat cu a Long kha sii hnih sak dingah siihnih tu pa pakhat kha a fial. Siihnih tupa khal cu Siihnihnak le sii bawm pawl a lei ih Long nei tu pai duhdaan vek in a sen lar tak in a hnih sak. Sii a hnih phah rero lai ah long ih a lai hrawngah a ong fate a hmu ih cui a ong fate cu a belh sak. Long zatei sii a hnih theh hnu ah a hlawh man a lak ih a tlung. A thaisun ah long nei tupa a hnen ah a ra ih paisa suah nak pakhat a ra pek. Paisa suah nak sung ih a ngan mi paisa cu a tamzet. Cu tikah sii hnih tupa khal a mang a bang tuk. Anih in “Mizaan ah sii hnihman cu ih pek zo si” tin a sim tikah “Hi cu sii hnih man si lo in Long i belh sak ruangah ka lo pek mi a si” tin long nei tu pa in a sim. Oh…. Saya a ngah ko. Ka lo tuahsak mi cu ziangtham hman a si lo pi. Hi zatzat in pek tul lo” a ti tikah Long neitu pa in thu um daan pawl a sim. Thil cang mi pal ziang hman na thei lo ih kan lo sim ding. Long kha sii ka lo hnih ter lai ah long lai hrawng ah a ong a um kha ka lo sim lo. Sii hnih mi a ro ve ten ka fale pawl cu long thawn nga sio an thlak. An nih khal in Long lai hrawng ih a ong a um kha an thei lo.

          Cuicaan ah keimah khal inn ah ka um lo. Inn kan thlen tikah ka fa le long an hmang ti ka thei ve ten ka thinphang tuk. Long a ong a um kha ka mang. An nih cu nga sio an thlak nak cun himdam tei an rak kir kha ka hmu tikah ka lungawi daan cu vun ruat hnik aw. Long ka va zoh lawngah in belh sak mi ka hmu. Tuah cun nang khal thu um dan na thei thluh zo. Ka fale pawl an nun nak in run sak a si. Na sim mi ziang tham hman si lo mi te hrang ih ka lo pek mi peisa cu a mal tuk. Khai na duhsak nak kha a man zate in lo pek ding sisehla ka neih mi hmuahhmuah hman in a daih lo” ding tin a sim.

          Hi thuamthu ih in zirh mi cu zozo a si khal le ziang tik lai caan ziang vek a si khal len kan mah kan ti thei dan dan in mi bawm ding a si. Kan hmuh mi sual fate, famkim lo nak te pawl kan tuah sak kan rem sak mi te in midang hrangah an dam sungih an hngilg thei lo ding mi bawm nak a rak si thei. Kan tuah thei tawk a tha bik ih kan tuah sak nak in thleng aw nak tumpi a cang ter thei ruangah a si. Caankhat ih kan duhsak nak khal thil mangbang za vek in a ra kir sal ding. hi mi thu hi Sapyimyodaw sung ta thawn pehpar in kan run ngan mi a si.