Falam khua ihsin ni tlaknak saklam peng 64 ih um mi RIH TI Li thu

RIHLI (ZIRNAK XI)

          Lairamah tili a um tuk lo. Rihli cu lairanih tili hmin neisun a si. Falam khua ihsin ni tlaknak saklam peng 64, Hualngo bialah a um. Rihli cu peng thum vekvel a kua.

          Hihtik hlan lai pacang pawlin Rihli cu kan thih hnu mithi khua fehnak kotkapi a si tiin an zum. Kan thlarua cu kan thih tihah riahsia zet le mitthli luangin a sungkhat le a rualpi pawl tanin lungleng zetin Pialrangah an tlung Asinan, Rihli a lan hnuah Pialrang mi pawlin an hmuak ciamcoih Hoilo par an pek. Hoilo par an nei ngah hnu cun dunglam hoi duh salnak an nei nawn lo. Cutivek tho thoin lunglo tidai an pek la laih, cuih mi tidai an in ve ten an lungleennak le an sungte, an rualpi ngainak, umharnak hmuah cu a hlo thluh ta. Cutawk ihsin thlarua cu mingnung a si nak hmuah hmuah a hngih thluh ta a di an ti.

          Rihli cu hih hlanah tupi thuk zetin a kulh thluh. Cuih mi tupi sungah ramsa tuum bik Vui, Ramsial, Pawpi thok ihsin a fate bik tiangin a khat thluh dah. Cuihhrangah hih hlanah kan pu kan pa pawlin Vui an kah le a pumpi an co thei dah lo. Vui pi cu a thi ding a thei an ti. Cuihhrangah Rihli sung cu Vui ho a khat a si tinin an zum.

          Rihlipi cu thlatang Khrisimat puai cuah furpi tidai vekin a baal thluh theu. Cuih a baal cu tilipi a laifangin a thokih nuam te tein tili kam tiang a thleng theu. Ni sarih, ni riat a balh hnuah a fim sal theu. Cutiih a balhnak cu, cuih tilipi a neitu Rulhreng kumpinu a kholh awk ruangah a si an ti. Cuihhrangah hih hlan kan pu kan pa pawlin Rihlipi sungah Rulhreng kumpinu a um asi ti'n an zum.

          Rihlipi cu khui tiva thawn hman prh aw loin tlang lak lei khuarih amahte a li mi a si. Tili tlun lam Rihkhawdar ral khatin zoh tikah a mawi hngin. Tili kam hmuah hmuah cu tunah fangcang loah an tuah. Khua hlatpi ram hlatpi ihsin kum tin te Rihli zoh dingah mi tampi an ra theu. Lungleennak hla le ngaiawknak hla ah Rihli hmin salin kan pu kan pa pawlin hla an phuah theu.