Fatima ih Langnak in ‘netabik doawknak’ cu thitumnak le innsang thu a si ding ti’n simcia (Oct. 13, 2021)

Fatima ih Langnak in ‘netabik doawknak’ cu thitumnak le innsang thu a si ding ti’n
simcia (Oct. 13, 2021)
          Fatima khua ah Bawinu Maria ih langnak a hmutu nauhak pathum lakih a telmi, Sister Lucia dos Santocu 2005 kum ah a rak thi. Cumi a thih hlan te ah, Khrih le Satan ih netabik raldonak/doawknak cu thitumnak le innsang thu ah a si ding ti’n a rak simcia. Cutivek thiamthiam in, Cardinal Carlo Caffarra khal cun langnak hmutu Sr. Lucia in Italy ram,Bologna ih Archbishop a tuan lai ih ca a kuatmi sungah himi thu a tel ti’n a phuang ve.Himi Sr. Lucia ih phuansuakmi thu hi Pope St. John Paul II san lai ih rak puangsuakmi thu a si ih, 2016kum ah Mexico ram uktu President Enrique Pena Nieto in nunau le nunau, mipa le mipa thitumnak khuanpek atum lai tak fang khalah Mexico Archdiocese ih zarhtin thuthangca suahmi Desde la Fe sungah thuk zet ih ruatsal dingah pholangsal a rak si.
           2008 kum, Feb. 16 ni ah, Cardinal Carlo Cafarra cu St. Padre Pio ih thlan umnak ah Missa sumnak a rak tuah ih cumi theh ah Tele Radio Padre Pio thuthang zamnak thawn thusuhawknak ‘interview’ an rak tuah. Cuih thusuhawknak ahcun Sr. Lucia ih rak simciami, kan Bawipa le Satanpa karlak ih netabik raldonak cu ziang a si timi thu an rak sut. Cutikah, Cardinal Carlo Cafarra cun hiti’n a rak sim: St. John Paul II in Thitumnak le Innsang thu thawn pehparmi zingzoinak Pntifical Institute zungpi tawlrel ding le dinsuak dingah tuanvo i rak pek. Hi hnatuan a thoknak ah Sr. Lucia hnenah amaih Bishop hnen ihsin ca ka rak kuat; ziangahtile, amaih hnen direct ih kuat angah lo. Simfiang har zetmi mangbangza pakhat cu, thlacam sak ding thu lawng ka rak ngan ih a hnen ihsin cakuat ngahsal ding ti ka ruat ban lo nan, amaih hmin thutmi cakuat saupi pakhat ka rak ngah.
           Cuih cakuat sungah cun, “Kan Bawipa le Satanpa karlak ih netabik doawknak cu Thitumnak le Innsangthu ah a si ding” timi a rak tel. Cuihleiah, “Tih hlah, ziangahtile Thitumnak le Innsang thianhlimnak hrangih a cangvaitu pohpoh cu a phunphun in dokhamnak an tong ding. Zianghrangahtile, himi cu thil thupi tuk pakhat asi. Ziangvek khal va sisehla, kan Bawinu in Satanpa ih lu cu a palbek zo” ti’n nganmi khal a um bet. Cule, “John Paul II thawn biakawk tikah innsang hi a thupi bikmi a si zia na thinlung ah a fiangter ding. Ziangahtile, sersiammi pawl tundinnak ah siseh, nunau le mipa ih pehtlaih awknak thudik thu ah siseh, sankhat le sankhat minung pawl pehtlaih awknak thudik thu ah siseh, innsang hi a thupi tuk; innsang cu himi pawl hmuahhmuah tungdingtu thuampi a si. Himi thuampi a siatbal cun, innpi khal a tlu si ta mai. Cumi hi tuih kan hmuhton rero mi thil pakhat a si; ziangahtile, himi dinhmun ah kan um lai takfang a si ih zo cio in kan thei theh ko” ti’n Cardinal Carlo Cafarra cun a sim.
      Cuihsin, a netnak ah, “Padre Pio ih thuanthu ka rak siarmi hin ka thinlung i khoih nasa. Hi Mithianghlim hi leitlun a nun lai ah thitumnak le nupi pasal pawl ih thianhlimnak hrangah hngetkhoh zet ih rak cangvaitu khal a si” timi thu thawn Cardinal Carlo Cafarra cun a thusimnak a cemter.           

NB: Himi thu hi 2016, July 8 ah rak tarlang zo mi a si.

Hram: CNA

https://bit.ly/3mPFGlj