Harhdam mi pakhat cu ni khatah TIDAI a mal bik palang thum hrawng a tul

HARHDAMNAK HRANGIH TIDAI IN DAAN

          Ni tin te kan takpum ihsin tidai palangpi thum hrawng (1500ml) kan suah ring ring. Zinin si seh, thlanin si seh, mitthliin si seh, cilin si seh, kan takpum sung ihsin tidai kan suah theu a si. Cuihhrangah a harhdam mi pakhat cu ni khatah tidai a mal bik palang thum hrawng a tul ring ring a si.

          Asile, tidai tampi in poinak a um pei maw? Ni tin te zianghmuah kan in le a tawk? Ziangtik zawnah tidai in a tha lo?

          Zin suak thei lo natnak a tuar mi le, taksa a phaw mi natnak a tuartu pawl siar lo hmuah cu tidai tampi in a poi lo. Mi harhdam hrangah tidai tampi in thei a tha sin sin.

          Tidai in a that bik tikcu cu zing thawhpek, mithmai kan phiah theh vete'n a si.Zaan kan it tikah kan taksa cu thate'n hnatuannak caan a ngahih, kan taksa sungih a baal mi hmuah cu kan kailingah a khawm aw a si. Zing kan thawh vete'n tidai haipi khat maw, haipi hnih maw kan in thei asile, cuih mi kan kailingah a baal mi hmuah a hnot thluh thei hleiah, kan ril tla faite'n a kholh cih phah a si. Cuihhrangah zing tinte tidai a in theitu cu kailing le zin thawh nak ri tluanih lungto um natnak an ngah dah lo ding a si. Cu lawng si loin nat zaran hmuah hmuah cu olte'n a ngah lo ding a si.

          Asinan, rawl ei lai le rawl ei theh vete cun tidai tampi in a tha lem lo. Kan rawl rialtu kan ril ihsin a suak mi kha tha a nem terih kan rawl ei mi tha te'n a rial thei nawn lo ruangah, kan pum a nuam loih kan cing-irh ciamco theu a si. Cuihhrangah rawl ei lai le rawlkhop pekah cun tidai in loih um thei a tha deuh.

          Thazaangih hnatuan loin zung maw, sumdawrah maw to ring ringih hnatuan tu pawl cun mi zaran hnakin tidai tampi piin in thei sehla a tha. Zianghrangah tile, an taksa sungih a bal mi pawl cu an kailingah a khawmawih tidai an in tik lawngah a baal mi pawl lengah a suak thei ding a si.

          Cuihhrangah zing tinte tidai a in theitu pawl cu:-

(a)  Kailing le zin thawhah lamzinah lungte cang ding a kham.

(b)  Kan ril pawl a kholhfai ring ring ruangah kan rawl ei mi thatein a rial thei.

(c)  Kan pumpiih a um mi kan ek pawl reipi um man loin a faiter ruangah pumpiih natnak hma cang ding a kham.

(d)  Sung feh hmaan thei lotu'i hrangah cite malte thlakin tidai khop koin a in thei asile a sung feh a tha sal ding.

(e)  Um daan a nuamterih, thinlung a fel faiter a si.

 

Add new comment

17 + 0 =