Lente pawl ih Raihrik daan

Lente pawl ih Rai hrik daan

            Tuitum ahcun Lente hrin pawl ih an rai hrik daan pawl kan runlo sim ding. Lente hrin pawl cu a khua khua in an rai hrik daan a bang awk lo ruangah Lente khua pawl ih rai hrik dan hi a hmai sa bik ah ka run lo sim pei. Lente khua pawl ih rai hrik dan a hmaisa bik cu Hmual sia timi asiih, sia tum ih hrik mi a si. San khat ah vei khat hmual ah an hrik mi a si ruangah hmual sia an ti nak a si. Himi rai cu ralneh nak, karh zai nak le ti rawl pathat nak hrangah hrik mi  a si.

            Thlacam daan, Ka hmualpi, ka sial thla, ka laivawr, fapa cawi in ka ron tuah, fur sawm siar in ka ron tuah, thal sawm siar in ka ron tuah. Ka foi muthla tin mang ti seh, ka nam kam kei ha mang ti seh, ka ralpa a nam ngen mang nu seh, a foi saphawk foi ah cang seh, tin an cam.

             A pahnih nak ah cun San Sia timi rai a si. San Sia cu san khat ah voi khat an that. Ral neh nak le karh zai nak hrangah tin hrik mi a si. Hmual Sia timi thawn a bang awk zikzik. Thlacam dan cu a bang awk a si. A pathum nak ahcun Zing Tul rai timi a si. Himi rai cu kum ruk ah voi khat hrik mi a si. Sia cang a dum fekfek a simi, a lei tla a dum mi thawn hrik mi a si. Hi rai hi Lente khua ihsin ni tlak nak lam falung pakhat hrawng hlat nak ah an hrik theu a si. Khua rai hrik mi a dang pawl hnak in a phun dang. Sia an tem ih thlan mual ah zu an in hmaisa. Cuih hnu ah khuang, dar khuang, Cul le Tauthet thawn a sia cu an vun dir.

            Zin tek kip ah an ding ih cul napin an tum ih a sia khal an din ter. Tau thet le khuang le dar napin an tum hnu ah an feh sal lala. Cu ti cun zing tul hmun cu an thleng. Sia cu an tem hnu ah thla an cam theh hnu lawng ah a sia cu an that. A rang thei thawp in a sung ril pawl cu an suah ciam co. Cule a thi cu fang tlar thawn an suang ih sacek ah zamrang zet in an ei ih a sadang cu an phur. An phur mi sa pawl cu ni dang ah an ei. A tlung mi pawl ih laam nak ding inn cu Paa an tiih cuih inn ahcun an lam ciamco. Zing tul rai cu rai dang hnak in a lam dang hleice mi le tih nung hleice mi rai a si.

            Thlacam daan, ka zingpi, ka sial thla, ka laivawr, fanu cawi in ka ron tuah, fapa cawi in ka ron tuah, Fur sawm siar in ka ron tuah, thal sawm siar in ka ron tuah. Ka foi muthlo tin mang ti seh, ka nam kam kei ha mang ti seh, ka ral pa a nam ngen mang nu seh, a foi saphawk foi mang tiseh, singling rial rawn ka zu paw, ka sa zawh, fur za tak a lei, thal za tak a lei tin an cam.  

            Cun a pali nak rai phun khat cu Sur Sia timi a si. Himi rai cu Sai pi a dum fekfek in kum ruk ah vei khat hrik mi asi ih Len te khua ih sin ni suah nak lam hnar pawn ah hrik mi a si. Ral neh nak le pathat nak ding hrangah hrik mi a si. A sia sa cu Ruap Dawi an timi an bawi phun pawl in an then aw ih an mah le an duh nak zawn khua hnar pawn hram lak ah an ei.

            Thlacam daan, ka surpi, ka sial thla ka laivawr, fanu cawi in ka ron tuah, fapa cawi in ka ron tuah, fur za tak a lei, thal za tak a lei tin an cam.

            Panga nak ah Inn Taw Rai himi rai cu khua taw rori ih hrik mi asiih kum hleithum ah veikhat hrik mi a rak si. A hrik daan cu Ruap Dawi an timi an bawi phun pawl lawng in hrik mi a si. An hrikmi cu vok le sia an si le tla telh that a si. Vok ih hrik mi a si le a sa pawl cu a hmun ah an ei ta. Sia hrik mi asile a sa cu an then ih vel dun phun pawl inn taw vapin laikar khan ah an hun thiar ih a sa a cem hlan lo cu tawk hmun ah cun an ei. Pathat nak hrang ruahsan ih dil mi le hrik mi a si.

            Thlacam daan, Ka limpi, ka sampi, ka zu zawh, ka sa zawh, fursawm tel in ka tuah, thal sawm tel in ka tuah tiin an cam.

            Pa ruk nak ah cun lo pil hrik daan a si. Lo pil an nei mi pawl cu 1. Sim la pil 2. Hram vang pil 3. Pum dawi pil 4. Siah phai pil tin lo pil pil li an nei. Cumi lo pil pil li sungah sim la Pil a si len bung tang ahcun sa cu an that. Hram vang pil a si len lup tang ah an that. Pum dawi pil asilen zapan ah a sia cu an that. Himi rai hrik caan ah an hmang bikmi cu sia cang fekfek a khirh a tha mi fekfek kha an that. A sa cu a lo pil hrangih an that nak hmun fek fek ah a cem hlan lo an ei. Himi sa pawl cu khua sung um mipa hmuah hmuah in an ei. An bawi pawl a si len a sa kawng tit tha tha le a sa dang a that nak pawl an lak ih an inn lamah zu le buh thawn an rak ei a si.

            Thlacam daan, A lopil hmin fingfing sal tahrat in Sum tak a pe, fur za tak a lei, thal za tak a lei, ka zu zawh, ka sa zawh, tin an cam.

             Cun netabik ah Khuk Sia rai a si. Himi rai hrik cu ral neh nak, pung zai nak le pathat nak hrang an hrik mi kha a rak si. Minung san in san thum ah veikhat khuk sia that a si.

            Thlacam daan, Hmualsia le San sia thlacam dan thawn a thalcam daan cu a bang rep ruangah kan ngan nawn lo.Himi thu pawl cu Lente hrin pawl ih rai hrik daan a si ih rai an hrik tinten thla cam nak tla an nei theu a si.

             An thlacam dan pawl cu tong upa deuh ih hmang mi a si ruangah thei thiam a har zet. Hi hmuah in Len te pawl ih rai hrik daan cu kan bang ta hrih pei. Himi thu cu Rev.Hoi Luai le thuanthu comitee pawl ih khawm mi pawl thawn pehpar in kan run sim mi a si.                                              

      https://www.youtube.com/watchv=jnrn12qtQEU               ...