Mahlemah rinsan awk tul zia

Mahlemah rinsan awk tul zia

            Leitlunah hlawhtling in hlawhtlin nak ih nuamnak a tep taktak tu mi pawl cu thiam hleice in mai thazang a rinsan tu pawl lawng an si. Leitlun ih hmuh a theih mi a hlawhtling mi pawl tinkim cu thiam hleice in mai tuah nak ruahnak rinsan in a zuam tu pawl lawng an si. Mah rori thansonak, liannak, hlawhtlin nak hrang mahlemah lo  cu rinsan tlak taktak zo hman an um lo. Thiam hleice, mahlemah rinsan aw in lian nak ih a zim thlen duh tu pawl cu,

-Thuhla ruatin talhton thiam nak

- Hmuhton mi neih nak

- Mai sinak kilthat nak

- Mai thinlung sia pawl rem that nak

- Tihnak thinlung hlon nak

- Thanso duhnak thinlung duhnak tamter nak

- A kaih lo mi tuahnak pawl hrial nak

Cutivek thu pawl pelh lo in neih ding.

            Thanso duh tu cun mai thinlung le mahlemah bum awk lo ding. Mai hnatuan kha upat ding. Mai hnatuan upat lawngah cui hnatuan in mah khal man a nei ter dingih hnatuan ih man a ngah ding. A tlun lam kai  a theih ding. Farah nak cu tuar a har mi thil pakhat asi ti mi cu a hman. Asinan farah nak cu lennak a keng thei tu saya tha asi tiin ti a theih. Farah nak timi hramlak ramsa he pawl, kuahrum pawl, hling pawl, hrilnak pawl a tam mi Tlangpi kaan thei lawngah hlawhtlin nak timi hmun thlen a si ding. Hlawhtling ih lennak thlen nak timi cu a har ih a bingbo mi tlang kai thawn a bang aw. Cui a bingbo zet mi tlang zim kai tikah mi pakhat cu mi pakhat a tlun thleng dingah forh ciamco a ngah lo. Mai kut le ke mahlemah rinsan aw in an kai theu.

            Curuangah thiam nal hleice duh pawl cu zuamnak thinlung le ngam huai nak thinlung neih ringring ding khal a thupi zet. Pumpek duhnak thinlung neih nak in a tha mi ruahnak le ruah thiam nak pahnih cu a mah ten a lang theu. Mi pakhat a hlawhtlin nak cu a pumpek nak thinlung ruangah a si. Thinnau in hlawhtlin lo nak cu a tih nak thinlung ruangah a si. Hlawhtling taktak dingah ruah rero caan ah hlawhtling ter tu ding tuah daan pawl amah ten a lang theu. Cumi tuah daan vekin ralthat nak thinlung thawn zuam asi ahcun hlawhtlin nak lamzin thlen tengteng a si theu.

            Tlaksiat ding lawnglawng ruah ringring a si khalle tlak siat nak ding lam pawl pakhat hnu pakhat a suak theu. Cutikah pumpek duhnak thinlung a hlo ih tih nak thinlung lawng a thang vivo ding. Hlawhtlin nak cu ruahank men lawng in a cem lo. Ruah vekin tuah taktak lawng ah theh suak a theih. Zuamnak a nei lo tu cu zohman in hlawhtlin nak ih a lu thleng dingah an bawm thei lo. Hlawhtlinnak timi thil mankhung cu ruahnak, zuamnak, mai thiam nak cuvek pawl thawn man pe in lei lawngah nah mi thil mankhung a si. Hlawhtlin nak khatlam luh nak sangka cu luhduh men in lut thei dingah on a silo. Zokhal siseh lut in a nuam nak tep duh asile mah rori ong in luh in a nuam nak tep duh asile mah rori ong in luh dingmi sangka a si.

            Leitlun ah a lian mi minung pawl hmuh tikah “na van a tha ve, na van a tha” tiin lom an si theu. Taktak ahcun anmah pawl cu a hrampi vun mang sal dingah a tul. Curuangah van tha in lian nak timi thiltha ngah duh asile ral that nak thinlung nei, pumpek duhnak thinlung tahthim in mai thiam nak, mahlemah rinsan awk nak thinlung nei, cumi pawl zuam nak kha ti lo theih lo in ret in tuah aw. Lar in lian nak lamzin par thlen ding timi a fiang tiin ka sim duh. 

Photo - google Image

Ref- for youth