Pope in Vancungram ih hruainak a ngah tu Bawinu Maria hnenah remdaihnak hrang thlacamnak pawl hlan. (August 15, 2023)

August 15, ni cu Bawinu Maria Vancung ram ih hruaiso a sinak puai ni a si.       

          Bawinu Maria cu sualhram nei lo in nau a pai ih natnak zianghman neilo in a fapa Jesuh a hring. Curuangah leilungah a taksa a siat lo. Vancung  mi ih a simnak bangin Bawinu cu thlasuahnak thawn a khat tu a si. A hrek lawngin a khat tu khal a si lo thu Pope Alexander III nak in a rak ngan. Sualnak fate hman neilo in thlasuahnak thawn a khat tu cu a taksa a siat thei lo. Pathian ih nu hman a silo mi mithianghlim pawl hman an taksa a siat lo. Mithianghlim Padre Pio, St.Theresa of Avila vek hman sualhrampi thawn a suaktu an si ko nan an thih hnu ah an mahkel in an um.                                                                                                     Bawinu cu sualnak neilo in nau a rak paitu a si. Thlasuah thawn a khat tu a si. A hrek lawng silo in a khat in thlasuah a neitu a si. August thla 15 ni cu Bawinu Maria ih malte sung ihthat dinhmun in kumzabi 5 hrawngah Byzantine Empire in a rak hmang thok. Neta ah cun Europe ram lamah a darh ih Bawinu Maria Vancung hruai puai ah an rak tuah. Bawinu Maria cu a ruangpi le a thlarau in vancungah hruainak a ngah. Nikhat ni ah miding pawl ih an co ding mi dinhmun kha Bawinu in a rak co a si.

          Bawi Jesuh cu Lamzin, thutak le nunnak a si. Bawi Jesuh in amah a hringtu cu umnak hmun pe lo in a um ter ding maw. Nunnak nei tu pawl zo in Hringtu nu a duhdawt lo tu an um. Duhdawtnak a neitu Bawi Jesuh hrangah ruah ding dang a um ding maw? Bawinu Maria Vancung ih hruainak a ngah ti mi cu Pope Pius XII nak in Pawlpi ih zumnak pakhat dinhmun in 1950 November 1 ni ah a rak ngam hnget. Kan mah pawl cu Bawinu Maria in leitlunah Pathian ih duhnak famkim ten a thlunnak hngilh lonak lawng silo in Bawinu in Vancungram ih hruai a sinak , a fapa ih thihnak a nehnak ah kan tel theinak pawl khal tuah duh mi a si.

          Mithianghlim John Paul II nak in kanmah pakhat ciar ah kan nunram cu Bawinu vekin mit thawn zoh thiam thei dingah kan zuam a tul tiah a rak ti. Pathian in Bawinu Maria cu ziangtin  a rak tuah. Kan hrangah ziang in tuah sak. Cu vek thotho in Pathian khal in kan hrangah in tuahsak a si tiah a rak sim.

          Bawinu cu kan hrangah ruahsannak nu a si. Pathian ih duhnak a tuahtu pawl cu nikhat niah Bawinu Maria vekin kan thlarau le kan ruangpi thawn vancungram ah kan thleng ding thu Bawinu Maria in tetti in a hmuh a si. Curuangah Pathian ih duhnak cu Bawinu Maria vekin tangdornak thawn tuah tlang uh si. Kanmah pawl cu zianghmuahhmuah kan thei ruangih kan zum mi a si lo kan zum ruangah zianghmuahhmuah kan thei sawn a si tiah St. Augustine in a rak ti.ACM ta thawn kan run tarlang mi a si.