Pupa Nunphung

Pupa nunphung

A sim tu - Mai Jacinta Siangte

           Nunphung tong le ca neih nak ihsin miphun kan cang. Nunphung le tong a dang dang um loin hmunkhat thluh sehla miphun pakhat kan si ko ding nan, nunphung timi cu a thi thei lo mi kumkhua hman ding daan siloin, milai kan thangso vekin a thleng aw rero mi daan a si. A cemzo mi daan cu thlun sal ding ti asilo nan hmailam kan nun khua sak daan ding tumtahnak ah dunglam ih kan cang cia leh kan hmang dah zomi pawl thei hmaisa ta a tul theu. Hih hlan kan pu kan pa pawl cu tulai kannih ih um daan thawn dang zet in an nung cang a si. Pacang pawl in sam an tam ih biar an kaih. Nunau in hni tawi te an veng. Puaini lawngah hnipuan mawi ngaki le puan pal an sin. Cih hrangah an nunphung tla a phun dang zet nak a tampi.

           Conlam thei, sakap thei ral neih thei tu mi cak ral tha pawl an uar. Tulaiih hnatuan tampi kai thei cathiam kan uar tluk in an upat. Zing le zaan zu in thei cu milian pawl lawng an si. Theihthiam rualtha na si ti hminsin nak ah tibur an hmang. Ral neh tu lawngin a samton par ah sawnsen a ton thei. Khuang cawi thei tu lawngin khuangcawi cawng nak an sin thei. Sapi kap tu lawngin a samtom parah vapual re a ton thei. Kan pu kan pa pawl in rai thawi daan a phunphun in an nei. Conlam daan khal phun tampi an nei. Saaih daan, ralcih daan, nupi thit daan, ro sar daan, thih le hloh tikih tuamhlawm awk daan, sa dawi sa kah daan  tin a phunphun in an nei.

           Conlam daan khal phun tampi a nei. Sa aih daan, ral aih daan, nupi thitdaan, rosar daan, thih le hloh tikihh tuamhlawm awk daan, sa dawi sa kah daan tiin a phunphun in an nei. Khua hlan ah kan pu kan pa pawl cu biaknak pi ngaingai an nei lo. Pathian ti khal cu an nei nan, a thupi bikah mual sang ih khuavang, thupi sung khua vang, ti kua ih um khuavang tiin khuavang a phunphun an biak. Raithawi daan kantimi cu a thupi bikah khuavang biak daan a si bik.

           Khuavang an biak ruangah tih tul lomi tlangsang, tupi, thingpi, lungpi tivek tla an tih zet. Mi thla tla a um tin an zum ruangah tih tul na loin thu phan pi an tih rero. Fimthiamnak le mi dang pawl ih nun khua sak daan an thei baan lo ruangah harsa thinphannak tampi an tong. Anneih mi thil hmuah in khuavang an biak ih an neih lai mi in lam puai an tuah theu. Cuih hrangah zing khawvang ihsin zan thim ih cu tiang cawl bang loin hn a an tuan nan nun nuam zet in an um thei dah lo.

Raithawi daan: kan pu kan pa pawl in, an nat tikah khuavang ruangah kan na a si tin an ruat. Cu vek thotho in nikhua a that lo tikah lo rawl a that lo tikah, thli sia a hrang tikah, tlangrai a tlung tikah, toruah a hman lo tikah khuavang ruangah a si tiin an zum. Cuihhrangah khuavang biaknak an tuah sal theu. Cuih mi khuavang biaknak a phunphun cu raithawi daan an ti. A tlang pin raithawi daan cu, taksa cungcang rai, innsang rai, khaw rai le lo lam thawi daan tiin an then.

           Taksa cungcang rai ah nau rai arte hlon, naurai arpi raang, culole arcang rang, thlan luh, thla kawh, khaal thawi, hring do, ui hring thawi, lai hring thawi le khaw za hring thawi tiin a nei. Innsang raithawi daan khal cu, inn dang thei rai, suahnak rai, khawzing rai, thuaite rai, thuaipa rai, vaancung leng mete le arcang rang thah, ih vokhu rial thawi, mual rai, thusia hnon, hmui sia dawi, serai tiin a phunphun an then hrih. Cuvek tho tho in khaw rai tla phun tampi an nei.

Conlam daan: Conlam tuah thei tu pawl cu hmin an nei lawng si loin lam sa le lam zu an co ruangah dinhmun khaisang tu asilole, lam tuah thei tu le tuah thei lo tu thleidang tu bik a si. Cuhrangah lam an tuah tikah conlam fate in an thok ih a sang bik khuang cawi lam tiangin an tum theu. Khuang cawi thei tu cu dinhmun sangbik ngah tu an siih khua mi pawl in an upat zet. Conlam nak ah sia ih thok ihsin vok, zu, rawl tam ngai pi an cem. A suun le zaan in an lam ih zu an in, sa an ei. An nuam zet nan kum leng lo thi zik ih hna an tuan mi cu a ni lawng in an hmang cem thluh hrangha an lam theh cun harsa zet in an um sal theu.

           Mi fim pawl in hmailam hrang ruat loin at cang daan tluk in an ruat sak theu. Kan pu kan pa pawl cu raithawi le conlam an hmang ruangah nunkhua sak daan nunphung cu ti lai kan hmuh mi kan nih ih nunkhuasak daan thawn a dang zet ih an zonzai ngaingai. Daan ih an neih mi cu thlun lo le tuah lo men in an um dah lo. Khuavang le khuasia pawl an zum ruangah daan thu thlun lo pawl cu khuavang in a that ding a si a hrem ding a si tiin an zum fek fek. Cuihhrang ah kan pu kan pa pawl ih nunphung khuasak daan cu a har zet ih an zonzai zet a si.

           Himi cu Feb 7, 2009 ih Taisun hrin khat Silver Jubilee cauk sungta kan ngah mi a si.