Siim hrin pawl ih savo zem daan

Siim hrin pawl ih savo zem daan

          Sa vo zem daan hi a tlangpi thu in sim asi ahcun milian lam tuah tam thei tu pawl cun sa cu tam cuang in an co. Sa rual talh lam nak hrang ih an that mi puai sa cu cong u, cong nau an tiih an len dan vekin sa vo zem a si. A lian bik lole puai tuah tam thei bik cu sa bok an tiih an that mi vok kawng cu a co. A lian bik sang tu cun bokson antiih vok ban an pek. Cun vok fate duh mi ih kawng cu milian lam ih pathumnak cu an pek. Cumi an pek mi cu sonsin tiah an ti. Cun conlam a nei hrih lo tu pawl cu a rilpi le a ril te zungpi bok tluk in an tan ih an zem aw. Cuih an zem awk mi cu hlawhcawi sa tiah an ti.

          Thum sunnak sia sa an zem awk daan cu hiti in a si. Secang lu cu van ni kluu an tiih a lam tu pa a neih lai asiah cun pa ih sa a si. Asinan pa neih nawn lo asi ahcun a nu, a nu khal  dam nawn lo asile a unau sung ih mipa pakhat an roco tu ding ih co ding a si. Sepi lu cu an sung lak ih upabik in a co. Talh beu cu pa ih unau in a co. Secangih awr tlai cu farpi in a co. Se pi awr thlai cu falai in a co.

          Secang ih awr tlai cu far pi in a co. Sepi awrtlaih cu falai in a co. Talhbeu awr tlai cu far nau ta bik an zem. A cuap le a kaileng cu innteek pa le nu lam ih sin an pu veve an then awk aw. A hnak le a tang ruh pawl cu a lam tu ih inn ah zu thawn in ding ah an ret. Secang kawng cu sabok tiah an tiih cong u pawl in an co. Cong u timi cu sethat tam thei pawl an siiih cuih se kawng khat lam veve cu sabok khai tiah an tiih inn hnih an zem aw.

          Semei fi cu sung te upa a hleh ih an sung te tei cun zu a rak liam ve. Zu hawl nak ti tlan kawh a theih. Se sung ril pawl cu zawl hlawm tiah an tiih cuih zawl hlawm sung in an sian zat cu hmun tlang te an pek. A hmun thlang te cun zu thaw zet bel hnih an hon hun ve. Se kaiza tang le a hnak ruh hrekkhat pawl cu phang hnih phang hnih hrawng cun ancan ih conlam thei lo pawl an zem. Sevur pawl cu zunghnih tia hrawng cun an can ih funghreu than an dawh ih an di phun ah cun a thlaih. Cuih an thlaih mi pawl cu far hawl nak tiah an ti. Sepi ih el le sete ih el cu rual in an co.

Zuu tuah daan,

          Hlan ih kan pupa pawl cun puai pakhat an tuah tikah a tel lo theih lo thupi bik tluk ih an rak tuah mi pakhat cu zu a rak si. Conlam nak hrangih ti zu tambik cem mi khal cu zu a rak si. Asinan an zu in mi pawl cu mah ih lo hma sung ta lawng an rak hman ruangah farah nak tiang khop in an rak hmang lo. Cuih hleiah zu timi hi pakhat le pakhat sunloihnak le duhdawt nak lang ter an duh tik ahcun      fang lo le vainim an hmang tam bik a si. Con lam timtuah daan hi a khuangkhai ciamco mi cu a silo. A tuah ding caan hrang ah nikhiah a um lo bang tuk in conlam tu cun amah ih rem caan dan zoh in a tuah. Cun inn tek te cun zu bel cu tam ngaingai in ralrin nak an rak nei cia.

          Puai sung hmuahih hnatuan tu ding ruai tla pawl cu an sawm hmaisa cia theu. Cuih tlun ah khua sungih um mi fala le tlangval pawl cu puai sungih an van ding mi far hawl ah pung an sawm theu. Pungsawm mi hlawh man pek le hlawh sam sal ding mi a silo. Inn tek te cun an khuasung ihsin inn khat mi pakhat hrawng an innsungsang ih hlawh tha bikbik cu an lo hma tuan tu ding cun an va sawm. A cuih sun cu rawl an dar ih thlun ah zanlam lo mi tlun hrawngah ti zu an tuah sak bet. Cun simhrin pawl ih awnmawi thilri anneih mi pawl cu khuang, dar, talhmong, sekirh, darsumsel, phiphut, cul, phirvau, lemlawi, talhkuang pawl tla an rak si. Hi mi cu simhrin pawl ih savo zem daan kan run tarlang mi a si.