Simhrin pawl ih Conlaam daan

Simhrin pawl ih conlam thu (1)

            Tuitum ahcun simhrin pawl ih conlam thu pawl ka rong lo sim ta hrih pei. Ahmaisa ah conlam ih a sullam sim ka duh. Khua hlan kan pupa pawl cu hram lak ih um mi an rak si bang tuk in nom nak a phunphun rak zir ih nun khua sa mi an rak si. Cumi sungah conlam timi hi a thupi mi le sunglawi zet in an rak hmang mi puai pakhat a si. Simhrin sung ih um mi khua hrek khat pawl cun khuang cawi ti an nei lo ruangah conlam rak nei tam bik pawl an si ih cumi sung ih um ve mi Hlawnmual hnam khal in conlam hi thu pi le sunglawi zet ih an rak tuah mi puai pakhat a si. Kan pupa san ah cun tlawng sang kai in fim zir rero timi hnak in conlam in upat hmaihngal nak an rak hawl.

            Curuangah hi puai cu ni thla khiah ih tuah ti a rak um lo. A lam thei tu cun an lam duh tik poh ih lam thei mi a si. Conlam timi ih a sullam cu upat conak, sathaw, zu thaw in thei le ei thei ngah duh ruangih lam mi a rak si. A lam tam thei tu pawl cu mi hausa milian tiih kawh an rak co. Asinan conlam thei lo tu pawl cu sawldaai hnuai mi tiih mi nautat an tong theu. Cuihleiah puai hmun an thlen tikah innleng lam ah  zu dai, zu thaw lo co tu men fang an rak si. Conlam tam thei tu cun sa that nak an co ih tlun ah mi hmai ah tluang khawng thei zet pawl an rak si. Hi lam cun mi mithmai tha le upat pek nak a ngah ter a si. Conlam ih sullam cu hihi a si ko. A tu ah cun an conlam mi pawl sungih sin Sarual Talh conlam thu ka ron lo sim ta hrih pei.

            Himi Sarual Talh puai cu conlam hmuah hmuah lak ih a hmaisabik nak a si. Sarual Talh ta loin a dang tuah sin vingvo a theih lo ruangah hmailam can ah lam sang lam sin vingvo thei nak ding ih tuah mi a si. Himi lam nak hrangah cun vok thau sum thum, sum li asilole sumnga le zung hnih tiang an that ih sunvu zan var tein khuang le dar pawl thawn zu thawn nom cen in an lam thawh nak a si. Puai sung ni pawl cu, 1. Tlangvau ni 2. Pacang ni 3. Toh pi ni 4. Toh te ni 5. Rual zu hnu ni 6. Tual phiah ni pawl tla hi an rak si. Tlang Vau ni ahcun an puai sung hrang ih tul mi tilva thah ni a si. Hi sun ah cun khuasung ih um mi pacang le nu pi nu pawl ih hna tuan ni a si. Cuih tlun ah hi ni cu "pu" zu in ni ti tla in an ko.

            Pu zu in ni ti mi cu conlam tu pa ih pu le nupi lam ih pu zu in ni ti nak a si. Hi sun ah pacang pawl cun an sathat mi pawl khal fel ten an can theh ih zem a tul mi pawl khal an zem theh. Cun pa cang ni timi cu zu tam bik in ni a si. Cun hini cu pa zu in sun ti tla in an ko. Pa zu in timi cu conlam tu pawl zu in sun ti nak a si. Hi nihnih sung cu an conlam nak hrangih that mi sa sung in an zem lomi pawl cu a rak suak tu pawl zaten hrangah an suang ih zu le sa cu an in tlang. Sa can tu hrangah zu pi bel hnih a dang ten an ret. Tohpi ni timi cu an veng ih ummi pacang hmuah hmuah le veng dang ih um mi an sung te pawl lawng ih zu in sun a si. Toh te ni timi ahcun conlam tu teih sung te nai te lawng zu in sun a si. Rual zu in ni ah cun puai tuah tu pawl ih rual pa in zu thawthaw a rak suah ih khaw sen ih zu in sun a si.

            Milian pa ih rual pa cun zu bel ruk hrawng a liam. Cun milian pa cun ar thau bik pakhat le arti pum a pek ve. Hi sun ih zu a rak hun tu rual pa thawn unau tluk ih a nung tlang mi rual vah an si. A rual pa ih nu le pa an thih tik khal ah conlam tu pa in zu pi bel khat le arpi pakhat thawn topit nak a nei. Hi sun ah cun thing, sapherh le zu hmeh in a ra suak tu hmuah thawn in tlang a si. Tual phiah ni cu puai cem ni a si. Hi ni ah cun sung te sung ihsin upa pawl vial lawng ih zu in ni a si. Hi puai sung ni hmuah cu in tek te in an zu tuah mi pawl kha zau te ah le tual ah cun a bel in an ret ring ring. An tulh awk ih a bung mi ruangah le an zu rit tuk ruangah an tong bung nak thawn an zu cun tual hmuah hmuah cu puai an theh tikah a bek theh a si.         

https://bit.ly/34fjvfE