Sumdawnnak tuahnak ah rinumnak neih ding a thupit zia

Rinumnak thupit zia

Sumdawnnak tuahnak ah rinumnak neih ding a thupi zia.

          Sumdawnnak phunphun tuahtu mino pakhat cu a sumdawnnak pawl a tlak sia theh hnuah ziangti hmanih sam sal thei nawn lo ding mi leiba a rak nei. A hnenih thilri kuat tu pawl khal in a hlan ih leiba pawl a sam hnu lawngah thilri thar pawl kan lo pek ding tiah an sim ih a hnenah thilri pawl pe duh nawn lo in pehtlaihnak an tuah nawn lo.

          A hnenin thilri la theutu pawl khal thilri a pek tei nawn lo tikah a dang sumdawngtu hnenah an tlan theh. Netabik ahcun cui rei lo te ah leiba rul thei lo ah a rak cang. Nikhat ahcun pangpar hmuan pakhatih tonak saupi parah a nunram thuhla pawl ruat phah in beidong zet in a to rero.

          Rei lo te ah mifarah cang thlang ding dinhmun in ziang tin kan pahsuak ding tiin a ruat rero. A mithmai khal beidong zettu pakhat ih thanaunak vekin cang lo dingin a zuam rero. Cui caan ah kum upa zet mi putar pakhat a kiangah a ra thleng.

          Putar in a hmuh tikah ‘ka lo zoh daanah harsatnak tong mi na bang. Ziang lawmam so na cang! I sim hnik hen’ tiah a kiang ah to in a sut. Putar pai suh mi a theih tikah mah pakhat lawng um hnak cun pakhat khat thawn biakawk a tha sawn tiah a ruat ih a nih khal in a dinhmun, a nunram thuhla pawl cu putar pa a sim.

          “A thuhla pawl a ngai theh hnu ah Putar pa in ‘na harsatnak pawl ka lo bawm thei ding ka zum’ tiah a ti ih ca hnah pakhat a zaal sungta a vun phorh. Cui hnu ah na hmin zo saw tiah a sut. Mino pa khal cun a hmin a sim tikah putar pa in lethmat thut nak ca pakhat parah mino ih hmin a ngan hnu ah putar pa in a lethmat a tthut.

          Cui hnu ah cahnah cu mino pai kut sungah a pek ih ‘hi lethmat thutnak ih ngan mi sumpai pawl hi ka lo bawm mi paisa pawl an si. Hi paisa pawl la awla sumdawnnak hnatuan tuah sal aw. Tui ni ihsin siar awla hmaikum tui tikcu a kim ni rori ah hi hmun ah ra awla ka paisa pawl I ra sam thei sal dingah zuam aw’ tiah a sim theh hnu ah putar pa in a kut sungah ca hnah cu a ret ih a to nak in a tlan.

          Ziang ti hman ih ruahban lo in a kut sungih a thleng mi ca cu a zoh ih a rak mangbang tuk. Cahnah parih ngan mi paisa cu dollar ting 5 cekci a si kha a hmu. Cu theh in cahnah neitu ih lethmat thutnak hmun a zoh tikah cun Rawkaphela ti mi hmin a hmu. Cui hmun ah dollar ting 5 rak petu cu leitlunhuap ih milian bik Rawhkaphela a si ti a theih tikah a mang a bang tuk.

          Rawhkaphela ti mi hmin lawng a rak thei dah nan a ngaingai ah veikhat te hman hmu dah lo in tu lawngah ka tong tiah a mangbang zet. A kut sungah dollar ting 5 a thleng ti a theih mi in a thin a rak nuam ter. Cui rei lo te ah leiba samthei lo ruangih a tuar ding mi a thinharnak pawl khal a rak dem deuh ih a sumdawnnak lam ah tha ten ka tuah thei ding tiin a mah le a mah a zum awknak a thar in a rak tlung sal.

          Sikhal sehla a kut sungih um mi lungkimnak ca sungih paisa pawl a tul caan lawngah ka hmang ding. Thil pakhat khat a can pang khal le hi paisa pawl thawn ka tawlrel thei ding tiah a ruat ih lungkimnak ca sungta paisa pawl suah lo in a ret that.

          Cui hnu ah thazaang thar pawl, mah le mah zumawknak pawl thawn a sumdawnnak pawl tha sal dingin a zuam. Sumdawngtu pawl lih zum ding tlukin a sim ih caan reipi lungkimnak ca an tuah. A hnatuanpi pawl khal in thilri tha bik pawl kuat thei dingin a zuam. Thlathum, thlali a rei hnu cun a sumdawnnak cu nuam ten a tha vivo ih leiba lakin a tho thei sal.

          Kumkhat cekci a vung kim cun putar pa thawn thu an rak kam awk vekin paisa a suah hrih lo mi ca cu kengin pangpar hmuan sung ahcun a va feh. Pangpar hmuan a thlen tikah a hlan ih a rak to nak tohkham ah to in putar pa a rak hngak rero. Cui rei lo te ah kan dungkum ah lungkimnak ca rak pek tu putar pa cu tohklham ah to in a rak hngak rero.

          Cui rei lo te ah kan dungkum ah lungkimnak ca rak pek tu putar pa cu a kiang a va thleng. Milian zet mi putar a hmuh tikah lungawi sopar ten cibai a buuk ih a dip sungih a pai mi ca a suah tum rero lai fang ah nurse nunau pakhat a va tlan ciamco ih putar pai kut khatlam kai in a va hruai.

          “Ka pu! Na hloh ruangah hmun tinkim ah ka lo hawl ciamco. Tawk deuh lai ka lo hmu sal ih!” tiah a ti hnu ah nurse cu a mah lam a her sal ih ‘ka pu in a lo hnaihnok pang maw? Hi vekin in tuletu a suak leuhleuh theu. Cu le a hmu tu tinkim in milian zet Rawhkaphela ah an ruat theu. A lo hnaihnok pang a si le in ngaithiam hram aw’ a ti hnu ah putar pa cu a hruai ih a hmai in an feh.

          A rak tang tu pakhat cu tong ding a thei nawn lo. A kut sungah dollar taan hrek a um tiih a rak zum ringring mi pawl le a hnatuan in kumkhat sung rori a thazaang a rak tlun ter sal. A rualpi pawl thawn remcang zet in an pehtlaih aw thei sal ih sumdawnnak a rak tuah thei sal.

          Netabik ahcun a kut sungah a um tiih a rak ruah ringring mi dollar hrekkhat cu a ngaingai ahcun zianghman ih san tlai lo mi cahnah men lawng a rak si bang. A theih suak mi cu a sumdawnnak pawl a tha bik ih tuah thei sal dingah rak forh tu cu mah le mah zumawknak a si ti a thri fiang rori a si ta mei!

          A ngaingai ahcun ziang ih kan siar lo mi pawl hi in bawm tu bik ah an cang theu. Cule khatlam ah kan mah le kan mah kan zum awk lo tikah ka tuah mi hi a sual pang pei maw tiin kan thinphang theu. Mah le mah zumawknak a nei tu cun ka tuah mi a hman ko ding. A sinpi ko ding, tiah a mah le a mah a ti aw theu. Hi mi thuanthu kan ngai mi ah khal tlangval pakhat in a thaa tlun sal tikah a hnatuan thaten a thok thei sal. Cuvekin kan nih khal kan sumdawnnak, hnatuan le kan tumtah mi pawl ah hlawmtlinnak kan ngah lo in kan beidong pang a si le ziang ruangah ka hlawhtling thei lo. Ziang sambaunak saw hi lawmam ka neih ih’ tiah cek aw fel sal uh si. Mah le mah zumawknak na neih lo pang a si le tu ihsin thok in nei thlang aw. Cui zumawknak in hlawhtlinnak ah a lo hruai tengteng ding. Nan nunram ah hlawhtlinnak hmu ringringtu si hram uh tiah hi tawk in duhsaknak ka run lo hlan. Hi  mi thu hi thutazone ih an ngan mi thu thawn kan run lo hlawm mi a si.

Add new comment

3 + 15 =