Taisun pawl ih puai a phunphun

Taisun pawl ih puai a phunphun

          Ahmaisa bik ah Taisun pawl in puai phun nga an nei. A cuih pawl tla cu a pakhat nak ah Nithla puai, apahnihnak ah ConLam le Sakah puai, a pathumnak ah cun Savang lam puai, a pa li nak ah nau hmin sak puai le a panga nak cu nupi pasal neih puai tiin puai phun nga lai an nei.

         Nithla puai: Thla pi thla 12 sung ah a thupi zet ih an tuah mi puai pawl cu kumthar Lohawt puai Uisen puai le pathian puai ti in puai veili an rak tuah theu a si. A cuih puai pawl cu thla tin ih ni 9 le ni 15 karlak ih tuah theh  mi a rak si. Puai tuah tin ten rawl ei puai tin an tuah thluh a si. Kum thar lo hawt puai timi cu kum khat sungih an tuah mi puai hmuahhmuah a thupi bik ih an hman mi a rak si.  A mal bik pa lam ni 3 le nu lam ni 3 a si. Meisa thawn laam a tel. Taisun kum thar thla cu van sar a si. Asinan kum thar puai cu thla netabik asimi Lohawt thla ah an tuah, kum thar an hngak hlap an ti.

          Kum tinten an tuah lai a si. Cun Hlaicat timi cu mithi rawl pek puai an rak ti a si. Himi thla sungah hin mithi pawl lei tlun um khuan an ngah thei tiin an rak zum. Hlaicat cu a tuih mirang thla in May thla hi a si. Cun Uisan pawl timi cu lek nak a phunphun tuah tahrat ih hman mi puai pi a rak si. Buan awknak, lungto den tivek pawl, feikhawh, ti leuh pawl le hlunglam, kaihling kap tivek pawl tla an si. A za ten cangvaih phun hlir kha a rak si. A tu san ah cun Bawlung, volley ball, pingpong tivek pawl tla an si. A cui Uisen puai cu kum tinten pelh loin June thla ah an rak tuah theu.

          Cun pathian puai cu August thla ah an rak tuah. Pathian timi cu hlanlai ah kum tinten himi thla sungah mipa siar a rak si. A ti can taktak cu pa hlir ti can a si. A mal bik ah mi pa lam ni 3 a si. Nunau pawl in cerethawh timi an laam. Himi thla sung ah cun khua hnar lam ah thla an cam. Cah nak ngah dingah le daihnak ngah dingah tin le ruah ti that nak ti rawl that nak an rak dil theu.

          Cun conlam hleih awknak puai a si. Sahri eih cu pa suak veten zubel 6 khua pek a si. Mipa hmin khum nak a si. Cun sa aih, aih khat cu vok sum 4 le zu bel 30 a si. Sa cu nauhak mi pa lawngin an ei. Zu cu khua in an in, Sa aih sang bik cu aih 5 a si ih cuih tlun ah aih hnih bet le sa fuan aih an ti. Pa zu a in nak kip ah sa aih tam le mal in, hmai sa sa a sang sang in a si. 1955 tiang in an aih rero ih an hmang rero lai. Sa an aih hnu puai a sansang cu hi tivek in a si.

(1) Haukatuk timi cu vok sum li pakhat, sum nga pakhat le zu bel 200 ih tuah  mi a si. (2) Sawn zu timi cu vok pahnih le zu bel 300 lai thawn ni khat  sung khua dar mi a si. (3) Sia tuk sia khat le vok khat zu bel 200 ni khat dar a si. (4) Sim zu vok khat zu bel 200 ni khat khua dar a si. (5) Za khar, khar hmaisa vok 4 zu bel 500 khua dar a si. Khar ne ta vok 5 zu ni 7 dar a si. (6) Con te cu veikhat nak ah vok 25 sia pahnih, zu cu ninga dar a si. Vei hnih nak ah vok 30 sia pakhat a si. Cu cu ni ruk sung dar a si. Zu cu ni ruk sung dar a si. Vei thum nak ah cun vok 30 sia pahnih, zu cuni 7 dar a si. (7) Khuang cawi timi cu vok 100, Sia le Me thawn ni 15 sung tirawl dar a si. (8) Sia 3 con cu sia 3, vok 20 ni 5 sung zu dar a si. (9) Sia 10 con cu sia 11, vok 20 ni 7 sung zu dar a si. (10) Sia 20 con sia 19, vok 25 ni 5 sung zu dar a si. Hi thu pawl cu sa an aih hnu ih a sangsang in an tuahmi puai pawl kha a si. Sa pek er timi cu tihang sung ah ei al zet thlah ti can a si. Ci a rak har zet ti nak a si. Sa aih ihsin thok in con lam a phunphun cu cul lam a si. Pa e, nu e ti loin zaten lam a si. Hla phun kim an rak sak. Taisun Catholic Golden Jubilee magazine sung ta kan run tarlang mi a si. Casiar tu zate parah lungawinak tampi kan nei. 

Photo- Taisun Museum