Taisun pawl ih Ri rai

Taisun pawl ih Ri rai

          Inn an tlei veten inn hngak nakah arcang in innsang hrangah raihrik a tul a si. Thang hlu cu innsungsang zaten hrangah hrik mi a si. Rai cam daan cu 'arcang ngawl in taang hla kan hum lang sakhaw ee, zahmual tahtangah hang khung ngual ngo seh law. Taanhla ei theh in bil hla kawh a tul a si. An nei thei asi ahcun a nawt in ei ding a si. Rai cam dan cu ka bil hla ka ko lang sakhaw ee" tiin cam ding a  si.

          A sang tu ah nu hraang ta lala ding. Cumi hnu fapa upa bik ihsin a sangsang ten nau tabik hrang tiang hla kawh ding a si. Kum liam lo ten kum tin hla kawh ringring a tul. Naute cu hmin a neih hnu naute rai a ei ngah tikah rai ngaingai hrik sak ding a si. Cun innsang vok pi rai, ti dinnak mong sum, mong sum ei tikah arssa kheng-um an ti ih pa lam hrin zaten kawh thluh ding a si.

          Mipa pawl lawng lawng in an zawh thei a si. Rai cam dan cu "mong sum vok pi rai kan ei ee, cak lang nung law, vok fa, ar fa tha in kan ta run tuah law" tiin an rak cam a si. Himi rai cam tu cu innsang in cam ding cu a si. Hnuhluum ni hma pawl in mong sum raihrik theh in vok pa vulh cu mi thawn inn rai hrik a tul lala a si. Cumi tla cu hirn hmuahhmuah kawh a tul thotho. Zu lam cu a um lemlo. Vok a nung lai ah thla cam a tul. Khua vang rawl pek tikah vorh lam taan zom sam hra cat ding a si. Thla cam nak tla vorh lam marmot sipi, vokpilu cu innsung ah tar ding a si.

          Hrin dang mi in rai pah hirmhrim lo ding a si. An pah bang asilen rai a kir thei. Palam hirn pawl lak ihsin mi na, sa zawh thi lo an um tikah an thih khuh hni puan cu rai hirk tu le inn ah rak thiar tengteng ding. Nu hmei asilen pa hirn kung bik a va pan nak ah feh lo ten ulh pi a tul. Mong sum rai hrik tikah zawh thei lo khop in a naa mi an um bang asi ahcun a thih khuh puan cu raihrik te inn ah keng a tul. Mong sum rai ah inn tel daan a si lo. Innsang sa cu buh bang in a feh sa lu thawm cu rai hrik a thaisun ah an awm.

          Cun tuallai vok pi rai cu an ei a si len inn hnen zaten kawh hrimhrim a tul. Pa zang a pa sawn kawh rori ding cu a tul nan a um lo bang a si ahcun pazang nauta kawh a tul a si. Inn tek pa rori in rai cam ding a si. Aw ka tih zet ih cam ding a si. A nei thei mi pawl in pa hrin hmuahhmuah ko ding a si. Zang sa cu a hnak kop him le a zaangfik a tel, salu tawm ei ding hrangah sa hngawng phelseu le a lu ruh him feh kawh, a pumpi khe a tal cih. Innsang lawng in an ei kel.

Cun tuallai mecang rai: Tuallai mecang rai cu pol pawl in mi an cawh tiktik ah rak ei a si. Rai ki cu killiim sungah tal thei kel ah ni (rau kual) salam cu vok pi rai a siah vekin pazang in a siah. Innsang sa cu, khel hnih, bon khat, a hnak kop khat a tel. Meria ei tikah cun tangta kual tia in a tuah. Rua kual tuah mi cu tuallai ah ret dan a si. A innsang nau ta bik in a sang sang ten pazang in "liip law, liip law" tiin a tiih rua kual in milai dai loin tlun lam ah a rak lip. A lip ngah zo mi pawl cu an rak pal vingvo. Cutiin a sangsang ten netabik ah an pa a lip. Zu fe duur ka heu thuai ah an khuhhma an pa in a pal ta.

          Liip aw a ti zawng ten arcang sen mi feek suak mi cu rai cam um loin a sut hruak. Rua kual le ar lu cu a hnawng in tual lu sa lu tar nak khing tlun ah a tawn. Thill pilh kawn cu bak sahrih a bak. Arlu cu thill pilh kawn tlun ah a lu a hung tan. Cumi hnu a hla ko pahnih le a ke pahnih a tar. Cuul kaa tuah cia a niam sawm lam a phaw a pok ih, a cuul pak mi sungah me hmul a thiat.Himi cu Feb 7, 2009 ih Taisun hrin khat Silver Jubilee cauk sungta kan ngah mi a si.