Thinlung tha neih nak in thin hnangam ih um a theih.

thinlung_tha_neihnak_in_thin_hnangam_ter

Thinlung tha neih nak in thin hnangam ih um a theih.

            Veikhat laiah ram pakhat ah Siangpahrang pakhat a um. Cui Siangpahrang in a mawi zet mi fanu a nei. Nikhat ah Siangpahrang fanu cu a a besia zet mi nat a tuar. Sii thiam pawl ih an zingzoi nak vekin siangpahrang fanu ih nat nak dam ter dingah sii thar hawl a tul. Asinan sii hawl dingah pangpar um nak tlang ih pangpar pakhat a kil tu rulhrengpi ih lu a tul thu siangpahrang hnen an sim. Cutiin siangpahrang in pangpar um nak tlangah feh in cui pangpar le rulhreng lu la dingah ram sung ih mi thiam an hawl.

            Cule cui thil lak thei asile paisa tingkhat laksawng pe ding tiin an than. Asinan cui tlang cu tih a nung tuk ruangah zohman an feh ngam lo. Siangpahrang innpi hmaiah Yatah timi khua a um. Cui khua ah Turah timi a nu a cawm rero tu fapa fim pakhat a um.

            Turah ih pa cu mi raltha mi thiam asi ruangah Turah cu a nauhak lai ihsin rang to, nam hman daan, fei hman daan cuvek do awk nak lam ah a thiam nal zet. Asinan a pa a thih hlan ih a duhnak vekin lo thlo mi nunram thawn a nu a tuamhlawm. Turah cu mi zangfah thiam zet tu a si.

            Cutiin siangpahrang fanu hrang mi thiam hawl tu pawlkom cu Turah tei khua an thleng. Himi thuthang an theih in khua mi pawl in an rel ciamco. Cumi sungah Hlah Aye timi nunau cu a pakhal Ko Taa Aye hnen vafeh ve dingin a ti tikah a pasal cun “Hla Aye zarhkhat hrawng a rei ding ka lo then siang lo” tiin a si. A hman ten ti ah cun a tih mi a si.

            Siangpahrang fanu ih thu a theih tikah Turah cu a nu hnen ah bawm a duh thu a sim. “Ka nu siangpahrang fanu dam ter nak hrang a tul mi pangpar pakhat le rulhrengih luu tlang ah ka hong la duh” tiin a dil ih a nu cun, “a cang thei pei maw ka fapa tih a nung ih ka lo rin san lo” tiin nu ih sidaan vek in thinphang zet in a sim.

            Asinan Turah in a nu hnen thaten a sim. “Ka pai in zirh mi fim nak ka nei. Cuhleiah siangpahrang fanu ka zangfak” a tiih a nu khal cun a on. Turah cu mi raltha pawl a hawl tu pawl hnen a feh ih tuanvo ka la duh tiah a va ti. Siangpahrang ih tlangsuak pawl in khal thaten na ruat tha maw tiin an sut. Turah khal in ka ruat fel zo tiin a sawn. “A tha cu ti asile in thlun cih aw” an ti. Cutiin Turah cun “malte ka nu hrang thil tuah tul mi ka tuah lawk ding” tiin Siangpahrang ih tlangsuak pawl hnen a dil.  

            Siangpahrang ih tlangsuak pawl khalin “a tha hi nah kan lo hngak ding” an ti. Turah khal inn a tlungih a nu hrang a tul mi in ei pawl a tuah sak ih Siangpahrang ih tlangsuak pawl hnenah a feh. Siangpahrang ih tlangsuak pawl khal in Turah cu Siangpahrang hnen an hruai. Siangpahrang inn an thlen in Turah cu Siangpahrang hnen a feh. Siangpahrang in thu a sut. “Na hmin zo a si” tiin a sut ih Turah khal in lu kuun phah in “Turah ka si” tiin a sawn.

            Hlanlai ah Siangpahrang  pawl hmai ih um a sile Siangpahrang ih khuannak um loin tlunlam zoh a ngah lo. Curuangah Turah in lu kun in  a sang. Siangpahrang in a sut sal, “ka fanu nah mu dah maw?” tiin a sut ih, Turah cun “ka hmu dah lo” tiin a sawn. Siangpahrang inn ah hna a tuan tu pawl hman in Siangpahrang fanu tha ten an hmu dah lo.

            Turah vek mi menmen in ziangtin a hmu ding. Siangpahrang in “cuti asile a tha siibawi pawl thawn va tong uh, thuhla lo sim in a tul mi pawl an lo tuah sak ding” tiin a ti. Turah khal Siibawi pawl hnen a feh. Turah a suak nan Siangpahrang ih mithmai a hmu lo. Siibawi hnen a thleng ih Siibawi in thuhla pawl a sim ih a tul ding mi hriamhrei pawl a ken. Turah khal hriamhrei pawl le in ei ding pawl la in tlang ah a kai. Nuam teten a feh ih pangpar um nak tlang cu zing ah a thleng.

            Cutawk ah a ruah lo pi in Turah a feh nak ding lamzin ah Pawpi pakhat dai ten sa deh ding a zoh rero. Turah cu Pawpi a hmuh veten a kiang ih a phen nak ah a relh. Pawpi cu Turah a hmu lo, Turah cun zamrang zetin kap dingin a tun.

            Cumi caan ah Pawpi in thal a tin tu Turah a hmu. Pawpi cu Turah hnen zamrang ten a tlan ih a zon. Asinan Turah in thal tincai ih a ret mi fei thawn a sai. Pawpi ih cal ah ding zet in a ngah. Turah cu pawpi kiang ah nuam teten a feh ih a tlu mi pawpi khaa hei ih a zoh tikah a mang a bang. Pawpi ih cal ah fei pahnih a um. Cutikah a dunglam hramlak ih a relh tu ram tawi pa in “kha mi kha ka sai mi asi” tiah a ti.

            “Hitawk hmunah ka lo hmu dah lo, ramdang in maw na ra” tiah a sut. “A si” tiin a sawn. Kei cu a danglam in tiin thuhla famkim a sim. Ram tawi pa khal in a feh nak ding tlang tha ten a sim ih tikulh lai ih um mi a si a tiih pangpar um nak tlang a um nak kut zung khih in a hmuh. “Ka hmin cu U Tthi a siih na hmin teh” tiin a sut ih, Turah cun “Turah ka si” tiin a sawn. Cui tikulh ziangtin ka feh ding tiin a sut. Ram tawi pa in “kan ngah mi pawpi kan hmang ding, cumi tlang ah vate a um, cui vate cu nikhat ah veithum cui tlang ihsin rawl hawl dingin a feh ih cu theh in hramlak ih rawl a thiar hnu ah vate cu cui tlang ah a tlung, cutawk a thleng ah a sa a va ei. Reiloteah vate cu rawl hawl in a ra ding. Cutikah amah ih hmuh dingin pawpi kha hmunrawn ah kan ret ding. Cu thehah Pawpi hri a tem ding ih a thiar ding, cutikah Pawpi ih temmi hri vawkin na thlun ding” tiah a sim.

            Turah in “hitivekin in bawm ruangah ka lungawi” a ti. Cuihnuah tuah tul mi pawl an tuah. Pawpi cu hmunrawn ah an ret, Turah in cun Pawpi ih tem mi hri a kai ih a hla nawn ih lungtopi phenah a hngak. Vate a ra ih tha zet in a hngak. Vate cu hmunrawn ih ret mi pawpi thi cu a hmu. A thiar cih ih pangpar umnak tlang um nak tikulh ah a zam. Turah khal vate tangah hri ah a tel. Vate cu a tum tuk ruangah, Turah a tel kha thei loin zam rero in tikulh ah an thleng.

            Tikulh an thleng ih hram um nakah vate ih theih lo ding in Turah cu a dawp. Tikulh a thleng ih “tlang cu a va sang ve, ka ken mi ka ei dingih tlang par ka kai ding” tiah a ti aw. Cutiin tlang cu a kai vivo ih tlang par a thleng. Tlang a thleng ih a rawl ken mi pawl suncaw tiin hmun pakhat ah a ret ih relh phah in a ei, a ei lai rulhreng in a hmu asile a thi ding.

            Cu tiin a ei theh in a relh nak ihsin a suak ih tlang a kai bet. Tlang a thlen veten Turah ih hmaisabik a hmuh mi cu Mikei pakhat, Mikei cu Turah a hmuh veten “hahaha tuini ka van tha, minung sa ka ei lonak kum tilai a si zo atiih Turah hnen a tlan.

            A rak zum lomi dinhmun ruangah Turah cu a tim a tuah man loih cutiin a tlan. Turah a tlan a hmuh in mikei in “hahaha ka kut sung ihsin na luat lo ding, minung na tlan nak in na bangmen” tiin a dung in nasa zet in a dawi. Asinan lungtopi pakhat an thleng ih Turah in “ka caan a si” a tiih a ken mi fei kha a tin ih mikei a hei sai ih a veikhat nak ah a cal, a veihnih nak ah khal ah a cal, a veithum nak khalah a cal, a cal ah fei 3 a lut ih mikei cu tlang tang ah a tla. Mikei a thah theih veten tlangpar ah a kai bet ih rulhreng pi ih ngerh a tuar.            

            A tui tum cu Turah ziang ti zawng khalin a luat thei lo. Rulhreng ih hgerh nak a rep vivo. Turah in a thei, rulhreng in a rep that ding timi asinan Turah a cang lo. Cutawkah rulhreng ih cal ah fei pakhat a lut. Fei a rak nak a zoh ih U Tthi a rak si. Rulhreng a cal ah fei in a ngah ruangah Turah cu a thlah. U Tthi khal fei pathum thawn rulhreng a sai. Rulhreng cu cutawk ah a thi. Turah in U Tthi hnenah “ziang tin na thleng tiin a sut ih, nangmah vekin vate thlun in ka ra, ka lo rinsan lo deuh” tiin a si. Khinah ih rulhrang luu va la aw la khinah lungto parah pangpar va la aw a ti.

            Cutheh in tlangtang ah kan tum ding. Turah kha cun rulhreng lu le pangpar zamrang zet in a la. Cuihnu ah U Tthi thawn tlang tang ah an tum. Tlang tang an thlen cun zanlam a si zo. U Tthi in “khua a thim  asile tih a nung deuhdeuh a ti. Tangphawlawng rua thawn kan tuah dingih khat lam kan feh ding” atiih a tha tiin an ti aw. An pahnih in rua an hau ih tangphawlawng an tuah. An tuah theh in cumi parah an to ih an feh.

            An hlau ih a lai hrawng an thlen in tisung in octopus pi pakhat a suak. Octopus cun a lu pawl thawn an pahnih in tidai sungah a dir. U Tthi khal in a ken mi nam thawn octopus ih kut pawl a sat. A sat tam deuhdeuh ih octopus cu tuar thei nawn loin tidai sungah a tum.

            Cutiin an pahnih in khat lam ral ah an feh. Tikap an thlen cun zinglam khua a vang ih tikap ah an pahnih in an it that. An tho in an ken mi rawl an ei. Cuihnuah Turah cu U Tthi thlah in Siangpahrang inn lamah a tlung. Asinan lamzin ah Turah cu misual bur khat in an kulh ih, canghlah na thi ding, Siangpahrang hnen rulhreng luu le pangpar tlang ih pangpar na keng tiin thu thang kan thei. Thih na duh lo le thilri pawl in pe. Na thilri pawl na suah lole kan lo vel ding an tiih Turah cu an vel. Asinan misual pawl in Turah an neh lo. Cutiin an lak ih u pa deuh pakhat in “cawl uh amah thawn kan biak aw ding” a ti.

            A kuttang pawl khal dung an sip. Cuihnuah cu pa cun “a tui kan siangpahrang kan do tum ih mi kan khawm aw na tel pei maw? Ka hmin cu Mu Mua a si” tiin a sim. Turah cun cupa cu thaten a zoh. “Na tel duh lo khalle a ngah. Kan lo ti buai lo ding” a ti. Turah khalin thaten a sim ih nan lakah ka tel thei lo a ti. Mu Mua khalin “ziangruangah kan hlawhtling le sinak sang pi na ngah ding” a ti. Turah cun “sinak tivek ka buaipi lo, ka theih mi cu a tu kan siangpahrang hi ram mi pawl a duhdawt zet ih daan thawn a uk. Siangpahrang ih tthat nak lawng ka thei. Curuangah hivekin siangpahrang ka dodal lo ding” tiin thaten a el.

            “Cuti asile na tlung duh nakah na feh thei” an ti. Cutiin Turah cu cutawk hmun in a suak. Cutiin Turah cu siangpahrang inn a thleng. A thlen in siibawi pawl hnen rulhreng lu le pangpang a pe. Siibawi pawl khalin thaten zoh that in sii an tuah. Sii an tuah theh in siangpahrang fanu umnak ah fehin anmah rori in sii an va pe.

            Malte a rei in siangpahrang fanu cu a dam. Cutiin siangpahrang in Turah cu siangpahrang thawn an tong aw. Turah hnen in siangpahrang cun “in zoh aw” tiin a ti. Cutiin Turah ih a hmuh mi cu Mu Mua asilo, himi cu siangpahrang a si, an hmel a bang aw maw tiin thu a ruat rero.

            Turah ih thu rauh daan a zoh ih, siangpahrang in “ziang tin saw, hramlak ih misual pa le ka hmel an bang aw tiin an mang a bang maw?” tiin a ti. Cutiin Turah cu a mang a bang tuk. “Mangbang hlah kha mi kha keimah ka si. Nang cu veikhat hman na hmuh dah lomi ka fanu na bom ruangah mi zangfah nak thinlung na nei. Hramlak ih misual pawl kom ding hman na el ruangah ram hrangah rin um mi an si” tiah siangpahrang in a ti.

            “Cuihnuah ralthatnak, thinlung tha khal na nei. Curuangah ka laksawng tiin ka fanu thawn kut sih in hi siangpahrang innpi ka lo ap ding” tiah a ti. Turah cu mangbang zet in a lung khal a awi. Turah cu a nu a ko ih a kil tu pawl thawn a um ter. Cuihnuah siangpahrang fanu a dam hnu a ni khiah in neih awk nak ropi zet in an tuah. Neihawk nak an theh in, Turah cu ram tawi U Tthi ko in laksawng ting khat a pe. U Tthi in mi laipa asilo siangpahrang pate atiih, Turah cun a ngah tuk, U Tthi milaipa tin in ko aw a ti. Cutiin U Tthi khal atu vekin a hmu ih a lung a awi.

            Himi thuanthu kan zoh asile thinlung thatnak ruangah neta ah Siangpahrang sinak tiang rori a thleng thei. Cutiin kan nih kan nitin kan nun nak ah harsat nak, buaibai nak tong hman nungla thinlung tha le mi zangfah taktak nak thinlung thawn tuan dingah le thinsau ten mai tuanvo a tuan suak tu kan si thei nak ding in zuam cio uh si. Himi thu cu hlan lai thuan thu thawn pehpar aw in ka ron rel mi a si.   

Thuanthu roling

           

                                                                                                                                                                                                                                           

Add new comment

2 + 17 =