Thlarau lam thureltlangnak (Feb 25, 2023 thureltlangnak veithumnak)

Thlarau lam thureltlangnak

(Feb 25, 2023 thureltlangnak veithumnak)

          Asia continent ihsin conference ih a nihnihni ah conference hrang thlacamnak “Adsumus Sancte Spiritus” thawn an rak thok ih hi conference lamtluan ah ai-awhtu pawl zaten Asia ih aw a taktak ih langter dingah Thiang Thlarau Pathian ih thluasuah ko in an rak thok. Thuanthu tampi nei mi conference hrang thlacamnak cu Latin tong thawn hmaisabik catlang “Thiang Thlarau Pathian, na hmaika ah kan ding rero” ti duhsan um mi conference hrang thlacamnak cu council pawl, conference pawl le a dang Pawlpi ih thureltlang mi pawl ah kum za lenglo an rak hmang.

          Conference general zung ih general secretary bawm rero tu Sr. Nathalie Becquart XMCJ in khualtlawn tlangnak cu conference ih mino pawl ih (Synod on Youth) rahsuahnak a si thu sim phah in tui ni hrangah a rak thok sak. Khualtlawn tlangnak cu tui ni Pawlpi ih Pathian duh zawng vekin Thiang Thlarau Pathian ih aw thawn thleidang thiam in ngainak a si” tiin zum a si le Pathian ih duhnak um mi khualtlawn tlangnak tuah rero mi Pawlpi si dingah thluasuah pawl ngah a theih ding; rinsan a theih ding” ti mi Pope ih sim mi a rak simfiang. Khualtlawn tlangnak cu laksawng pakhat a si ih thleidan thiamnak cu khualtlawn tlangnak ih thinlung a si thu Sr. Nathalie in thupit in a rak sim. A mah in conference khualtlawnnak ih tahthimnak in kan zaten cawng dingah in sawm.

          Kan dung nihnih sungah ai-awhtu pawl hnenah ‘thlarau lam thureltlangnak’ tiih kawh mi tuah daan dot thumnak hmang in conference hnatuan tuan dingah a rak sawm.

          Hmaisabik ah “kekarnak” (Taking the floor) cu pawlkom pakhat ciar conference hnatuan ih hmuhton mi pawl thuhla minute pahnih rei simnak caan a si ih thureltlangnak lole puhmawhnak um lo in, cule hlawmawknak ruat dingah minute pahnih rei dai ten umnak a si.

          Pahnihnak ah “midang pawl hrangah hmun pakhat tuah sak nak” cu pawlkom ih sungtel pakhat ciar in midang pawl ih sim mi tongkam pawl ihsin thinlung ah langter mi minute pahnih sim caan a si ih thureltlangnak lole puhmawhnak tuah loin minute pahnih hrawng dai ten hlawmawknak thinlung sungih re dingah a si.

          Pathumnak ah “din tlangnak” in thureltlangnak ih rahsuah pawl thleidang thiam dingah pawlkomnak, mipi thusuhnak pawl, ruahdaan palh mi pawl le prophet tuah mi thawn pehpar mi tongkam aw ngaihsak dingah khat le khat rel tlang caan a si. Hi tidaan in pawlkom hnenah “Thiang Thlarau Pathian in lam in hruai maw?” ti mi hram thok thusuhnak pakhat sut dingah bawmtu thlasuah co caan a si.

          Palwkom pawl in cui thusuhnak pawl ruat sal in thla an rak cam. An tuah ding mi capi “danglamnak pawl” ah famkim ten rel hrih lo mi thil pawl lole buainak a um maw? “Danglamnak” pawl ih telh dingh lole tha deuh dingah Asia continent ih thil cang mi pawl, hmuhton mi pawl lole ruah har mi pawl a um maw?

          Zinglam program pahnihnak ah pawlkom pawl cu Asia continent hrangah thupit mi 5 le Oct thla ih tuah ding mi conference ih reltlang bet ding mi a thupi zet ih tulsam mi thil pawl an rak ruat sal.

          Tui ni hrangah hruaikai tu pawl le hotu pawl cu India ram, Delhi Archdiocese hotu, Archbishop Anil Joseph Thomas Couto, conference lam tidaan pawl commission in Ms. Christina Kheng, le Asia continent Catholic Bishop pawl pawlkom ih thureltlangnak lam hnatuantu pawlkom (FABC Synod Task Force) ih pawlkom sungtel, Ms. Momoko Nishimura pawl an si. Hotu pawl in ai-awhtu pawl hnenah an mai aw rori si loin Asia mi pawl ih aw dinhmun ih sim ding ahcun an tuanvo a si thu ralrinnak a rak pek.

          Zinglam program a pahnih in Bawipai Thi le Sa upatnak thawn caan an rak hmang. Ziangah tile thlacamnak cu hi conference khualtlawnnak ih tha a si.

          Tui ni a veithumnak conference ah tuah rero lai mi capi tha ten cek fel dingah pawlkom pawl a rak sawm. Tui ni hrangah caanserh cu conference council pawlkom sungtel, Pakistant ram, Krachi Archdiocese ih Cardinal Joseph Coutts in “Asia continent hrangah Missa Sumnak” timi tumtahnak thawn a thianghlim mi Missa Sumnak thawn a rak cem ter.

          Khualtlawnnak cu a um rero lai ih Emaus khuapi fehnak lamtluan ih um Dungthluntu pawl vekin ai-awhtu pawl khal in Pathian ih tongkam an sim bet ding. “Lamtluan ah kan thawn a tong ih Cathianghlim ih duhsan fiangfai zet ih a sim tikah khan kan thinlung pawl cu kan sungah meisa hliau vekin a rak alh rero a si lo maw?” (Lk 24:32)