Zanniat Dawngpui (Kumthar Puai)

Zanniat Dawngpui (Kumthar Puai)

            Zanniat miphun pawl ih fur pi ih an lo rawl an lak theh tikah lungawi in kumhlun a cem ih kumpi kumthar a si zo tiin Ni (4) sung Puai an tuah theu.

Lamsawm Puai

            Dawngpui tuah hlan thla khat duhah an lo ih fangthar lak theh in sang ei puai an tuah theu. Khua upa pawl in tlang an au ding. "Tui kum nan lo ih fangthar nan lak mi cu sangah nan deng cio pei tiin an au. Khua mi zaten mah le inn cio ah fang thar sang an den cio ih hnahcang hnah in an hlum. Pakan pakhat tia tluk in an tuah. Cule an fa le nauhak pawl hrang ah tiin Ban tia in an hlum ih hri dai in khai thei dingin an tuah sak. Acuih zan cu mah le inn cio ah sang an suang cio. A cuih sang ei ding cu an hiar cio.

            A thaizing arkhuang zawng cu khua upa in tlang a au lala. "Nan sang hlowmm a hawng khal nan inn leng suak nak kokka hram ah hlon theh uh. Khua vang pawl in ei hai seh. Cutheh in khuavang pawl cu hlatpi ah tlan theh seh. Kan sang ei lai kan kiang ah ra hlah seh. Zo khal nan inn cio ah um uh. Hmundang  ah feh hlah uh. Tlangval ih bur ih bur ih riak pawl a tu rori ah nan inn cio ah tlung theh uh. A tu ih leng suak pawl cu a ngal ah hma sia a suak pei ih a feh thei nawn lo ding tiin tlang an au. Khua mi zaten an thlun theh. El ngam dan asi lo. Cuiih mah le inn cio ah fang an ei cu Lam Sawm an ti.

            Lam Sawm an theh. Sang an ei hnu thla pi a tleu zongah dawngpui an thok ding. Cumi thlapi a tleu zikhi (10) a duh ah khua upa in tlang a au. Tlangval le fala pawl lam nak hmun kan Mual le tlang nan sial fai theh pei ti a than. Cuini ah tlangval le fala pawl an zaten an suak cio ih an lam nak ding hmun cu an thlo fai. Zo hman kan man lo an ti lo. Tlangval upa pawl in an hoha ih an lam nak hmun cu an sial fai theh. Cumi cu Mual Sel an ti

            Hnatuan an theh in khuang le dar le phiphut an tum ih lam an thok. Hnipuan sia, hnatuan phah in lam thok nak a si. A piahh zat tlangval paziat, fala paziat kan um, kan lam ding ti an thei thiam zo in lam cu an bang. Tuhnu ni (10) ah kan lam sal ding ti an thei.

Dawngpui puai an thok

            Thaisun Dawngpui puai an thok thlang ding a si ti tlang an au ih zan lam khua a thim zik zawngah khua upa kum tar pakhat cu zupi haikhat le tai fe mallai le thal a keng ih lam nak hmun ah amah lawng a feh ih khua vang pawl kan Dawngpui puai ah hnaihnok nak pek lo ding in tiin a dawi. Taife a vorh ih a ken mi zu an hmon ih a phut ciomco. Cutheh in a thal cu vanpar sang pi lam ah a kap ih a cam ta. A cam dan, Lam hlat pi le lam nai ih um tu pawl a tu zu le buh kan lo pek, ei uh la in uh,cutheh cun tlan theh uh. Dawngpui kan tuah ding in hnaihnok hlah uh. Ra hlah uh. Kan nam cu a tum ih a hriam. Kan feipi cu a sau ih a hriam a si tiin a cam ciamco.

Ni hmaisabik

            Ni hmaisa bik cu mipa zate suak in zinghnam dawi ding a si. Fala pawl in hman siang loih an ret mi an thil thuam pawl cu kumthar riih hman ding ah an thil bawm sung ihsin an lak ih anpho ciamco. Kum a cem a si an ti. Nupi nule pawl in ni (4) sung puai tuah ding ruagnah an lo ah hanghlahhangrah khawl hra le ei tha hmuah lak dingih an feh ih an lak.

            Mipa hmuah in sun ni hlawh zing hnam an kai. Zanlam ah an ngah mi zinghnam cu tuih kum sung suak mi mipa naute zaten an zem. Mipa fa pawl in sa an kap a si ti can a si. Nu nau pawl in cumi an co thei lo. Zinghnam an ngah mi cu tuih kum suak nau mipa pawl an zem ih sa a kap vekih an cam sak vek an tuah theh le tlangval pawl in khuang le dar an lak ih lam an thok rero awn an theih tikah inn ih um fala pawl cu zam rang in an ra pan ve. Cutikah a cuih zan cu thil thuam thar hman hrih loin amaih hnatuan thuam cio thawn an duh sung an lam a si. An bang tikah an cawl ih thaizing thaithawh ei hlan ah lam kan thok ding. Kum thar thuam hruk theh ding in an sim aw theh.

            Lothlo mi zonzai kan siih nitin rori lo hnatuan ih an um cio ruangah unau sungkhat hmunkhat ah ton aw ih thu ruat khawm can an nei cio lo. An hmu aw dah lo ruangah Dawngpui puai ni (4) sung cu hmun khat ah rawl thawm aw in thu nuam rel in an um ding. Dawngpui puai ih rawl ei khawm daan, rawl an tawm aw daan cu a lam sang zet. Milai cu hnam kan nei. Mipa hi hnam nei tu, pupa hnawm la tu tiin mipa in hnam an fing khawi.

            Cun hitivekih Dawngpui puai ah inn hnen le mi dang khal an sawm lo ding. Amah cio, pa ih hnam cio ah an tel a si hman ah anmaih rawl cio keng in zu bel te a nei tu pa inn ah an ei khawm a si. Cutiih hi Dawngpui puai ni (4) sung cu hna tuan lo in unau hnamkhat hmun khat ten tong aw in, harsat nak, lo thlo le tilva zuat thu le innsang thu ruah aw in an um a si. Tlangval le fala pawl cu ni (4) sung nuam zet ih, kumthar an tiih hni le puan neih sun a thabik hmangin an lam rero theu.

            Rawl ei tikcu ah an hnam co ih ei khawm nak ah an pan ih rawl an ei ding. A lam pawl hrang rwl hmeh a cem ti pang lo ding in kan fapa le fanu paziat an ra ding ti khal an ralring theh a si. Dawngpui lam nak ih a tel duh lo. A lam duh lo tu tlangval le fala an um asile an rel khawm ih an inn ah an ra siim ding. Zanlam khua a siim tikah an lam nak ih sin an pok ih a lam duh lo tu tlangval, fala inn ah hla saphah in an feh dingih an lam ciomco ding.

            Inntek te in zupi hawl in a lam tu pawl lungkim ko an pek thei hlan lo an inn zial tla kiak theh ding ti tluk in an tur cia ih zanvar an lam ding. Cuhrangah Dawngpui puai lam nak ah duh lo cing khalin lam nak ih tel dingah nu le pa khal in an forh theu. Tlangval rual pawl in tuah mi hi khua upa in an mawh thluak siang lo a si.

            Hi Dawngpui puai cu zanniat pawl in lung awi zet ih kumtin tuah tengteng mi puai a si. Pacang le nupi pawl khal lam a duh pawl cu lam nak ah feh in an lam ve theu a si. Puai cu siang lo cingin a ni a kim in an cawl theu.

Dawngpui – Dawngpui timi cu hmundang ah tong fang a um loih kum tink um hlun hlon ih kum thar puai an tuah cu Dawngpui an ti. Kan inn luhnak kotka sang kaa pi cu kau zet in a ong a si. Culole vanruah cu duh zat in a sur ih lo rawl tha kan ngah a si. Cu lo le kan ram ah duh dawtnak a leng a si ti a si.

Khua Tung – Dawngpui ni (4) sung unau hnam khat pawl hmunkhat ih rawl ei le ton aw hi Khua Tung an ti. Khua Tung puai a si an ti hnuhnu in hnam dang pawl an sawm lo. An tel lo. Hnam khat asimi pawl cu sawm le ko rero a tul lo. Khui tawk ah kan hnam pawl ei khawm an tuah ti nak hmun ah an ra cio ding. An innsang sung te in an tel ding. Himi Dawngpui puai ni (4) sungah khua leng ah zohman an feh lo. Khuavang pawl Dawngpui puai in ko ve pei maw tiin an hngak ringring minung an hmuh asile a sa kan ei ding tiin an bawh a si tiin an zum hrangah an feh ngam lo. Hi thu cu U Za Thluai ih ngan mi kan run lo hlawm mi a si.

https://www.youtube.com/watch?v=semtJMqcmrU&t=291s

Add new comment

7 + 2 =