Zanniat nunphung (Inn sak thu)

Zanniat nunphung (Inn sak thu)

            Zanniat miphun pawl in nupi an thit ihsin thokin inntek si ding hi an tumtah bik asi theu. Mo nu in tlangval pa te ih inn ah um hnak in mah te inn nei a tha sawn tin a ruat. Mipa in khal a nupi thawn a nupi inn ah a pu le pi in duh hngin in um duh dingih an ret nan inn thar sak thei lo hman ah, curuangah inn pakhat ah an nupa te in rak um in inn tek si ding zuam kan tul sawn asi tin a ruat ve. Cuih hrangah inn thar sak ding an si thlang.

            Inn pakhat sak dingah thuam paziat a tul. Thuam cu thinghak phun pawl hawl a tul. Rualpi pawl a sawm ih a hawl mi thing pawl cu an phurh bawm ih, innthar sak nak ding hmun ah an ret. Inn cu hrampi ih khuh mi inn a si. Khua mi inn kip in an khua mi pakhat in inn  a sak ding ruangah dii asi lole hrampi tompi tom khat cio an hawl sak ih a sak nak ding hmun ah an phurh sak cio. Rualpi pawl in a tul mi hridai, rua tlah tivek pawl an hawl bawm ve. Innsak dingah thuam pawl an phun. Innsansg zial dan nak thuam anphun ih zial an don. Thuam parah inn bo le thing an tem theh. A tul mi hmuah an tuah theh. Innsak dingah a tul mi an tuah thehin nikhat an cawl ta "luangpho" an ti.

            Luangpho ni khat cawl ta lo ih inn an sak kel lo. Luangpho cawl lawk ta loih inn an sak asile inn a kang thei tin an zum. Innsak ni ah cun a rualpi le a veng um nupinu le pacang le tlangval fala ra suak in innsak an bawm ding. Pacang pawl innsak dii cih ding in inn parah an kai theh. Nupinu pawl in dii tom pawl sak dingin inn par thlegn in an pek. Tlawngval fapa pawl ih dii cih ding rua tlah le a temcih ding fung hreu pawl an pek. Inn sak cu an naum aw ter zet. Mipa innpar kai ih sak pawl in "dii kan pi e" tin an au phah. Nupi nu le tlangval pawl in an poi an tul an dil mi cu an pek rero.

             Dii an cih tikah inn khatlam a zim, a niam nak bik ih sin an thok. Inn par ih pacang pawl cu artlang in an um ih khat lam ih sin khat lam rua tlak le fung hreu pawl dii parah artlang te ih temcih dingin an tuah ruangah hmunkhat te ih cih theh a tul asi. Cuhrangah pacang thacak dii cih thiam zet pawl bangrep ih tem theh dingin an tuan. Tluan naim bik an theh in tluan hnih nak an sak. Cutiin inn bo thleng tia an sak. Inn bo tiang inn khat lam an sak theh tikah inn khat lam a niam bik ah an feh ih an sak. Cuticun innbo tiang an sak theh. A tlun khuh ding ah pacang innsak thiam deuh  pa ih a zirh phah ih a tlun khuh an sak. Cuih a tlun an khuh theh cun innsak an theh asi. Innsak cu nikhat sungah an sak theh a si.

            Inn thar an sak zan cu sungkhat le inn hnen pawl le inn tek pawl in zanriah an tuah sak ih an ei khawm. Inn sung lam kulh ding cu ni dangah an tuan a si. An tual ah sumden nak hmun le zanthing ret nak thla pi vekin an sak. Tikuang an nei ih zaute khal an tuah. Inn tang ah vok le sia an ret. Cutiin cun an nupa te cun inn thar an hlum a si. Hi mi thu hi U Zathluai ih ngan mi sungin kan run tarlang mi a si.