Zanniat nunphung (lo thar lak daan)

Zanniat nunphung (lo thar lak daan)

              Falam pengah lo ram hi bulpak mai pupa ram ti le tlangram, zo ih bul asi lo tin a um. Khua kip ih ram sung khalah bulram le tlangram tin a um cio. Lo thlo tha lo ram cu bul ram ah an nei ih ram sia deuh nak cu tlangram a rak si. Tlangram cu thloh ding ih a ham hmaisa in a thlo ding. Bulram cu a nei tu pa hnen ah dil a tul.

              Bul ram nei tam lo pawl in bul ram nei tam mi te hnen ah an va leng. Na bul ram khui tawk hman thlo lo ka duh asi tin a dil. Ram nei pa in kum ruk sung thlo ding a si ih "lo nga" paisa cu zat I pe aw tin a dil ve. Cu lole rak thlo ko uh, kan ni thlo ding, Bulram dang a um khal a ti thei. Cule thingkung tha pawl cu tha ten fing khawi aw. Duh tawk in hau men hlah aw tin a sim.

              A thlo ding lo ram cu an va zoh ta. Ramri an zoh a si. Lo ram ramri hi thawn dan  a si lo. Ramri lungphun cu siat dan khal asi lo ti cu mi zapi in an thei ih an thlun. Cuhrangah lothar an thlo tikah ramri vekin an thlo ding. Cun lo ram pakhat cu a kau tuk in tuih kum ah a zaten a thlo thei lo ding asile, lo pakhat cu lo lu le lo taw tin an nei cio vekin lo taw ihsin an thlo thok ta ding. Ziangahtile lotaw lam ah tumsal in thlo dan a si lo. Lo taw lam tumsal ih thlo tu cu a thi thei asi tiin an zum theh. Asinan an lo cu khat lam kap in lo taw ih sin a thlo thok ta pei ih khat lam kap cu hmaikum ah a thlo sal ding.

              Lo fingkhat cu a laifang in a thlo ta ih hmaikum ah lo taw lam ah tum sal in thlo dan a si lo. Cumi cu lothlo tu hmuah ih ralring bik mi a si. Lo ram pakhat cu ruahpi cem zik leilung a ro hlan, a hak hlan October thla hrawng ah rampi zaten, tu hmui in an thlo fai ding. November thla ah tuhmui in an thlo fai ding. November thla ah lo sung um zanthing hau tul pawl an hau pei ih a thing tek le a zim pawl tla an tan theh pei. Hrampi le thing hnak pawl cu a ro ih a rop ding.

              Cutheh cu a duh nak hmun ah lo thlam sak ding a tuah pei. February le mareh  thla ah an lo hrampi le zanthing ro pawl cu meisa an ur kang pei. Hrampi le thing hnah pawl a kang theh zo. Lo thlam a sak pei. Deu te khal a sak cih.

              A kang fai lo mi khawm ding in a thok. A kang fai lo mi cu an khawm ih ur kang sal dingin hmunkhat ah a bur a bur in an ret. Lungto pawl an khawm ih cang an dawl phah. An khawm mi cu meisa in an ur kang sal theh. Cutikah a cuih lo cu rawl ei, in ding fangrit ding a si thlang. Hi thu cu U Za Thuai ih ngan mi sungih kan run tarlang mi a si.

Lo an rit

              Lo sungih an cin ding mi cu vainim, laifang le mai te zil tla an si. Thal rawl kan ti mi phiang, Busul le Buhlur hi cin kum an  nei. Kum thum ah veikhat phiang kum tin an tiih phiang kum theh le Busul kum cu le Buhlur kum tin a um vekin an cin theu. A kum vek si loin duh tik poh in thal rawl an cin dah lo. Ra the hi cin kum a nei lo. Lo vah an tiih lo thar an hawl kum ah an cin theu. Cu lole pakhat thlo loin zan thing le hrampi a vat ih ur kang mi vutzam lakah an cin ih rathe cu tha zet in a rah theu a si.

              Lo rit tik cu hi hnatuan mal fang a si hrang ah fala le tlangval pawl an sawm aw ih an duh mi lo rit te lo ah a burbur in an feh theu. Inntek te in rawl ci an keng, lo an rit tikah lo taw ih sin an thok lo. An lo taw ramri ih sin an lo vorhlam ri tlang ah artlang in an um. Rawlcin an thok ih an lo keh lam ramri an thleng. Cui sin an her ih vorhlam ramri tiang, tiin an cin ih a net nak ah lo ihsin an inn lam hoi in an cing theh ding. An ti duh nak cu kan cin mi hi lo rawl cu inn ah a thleng theh ding ti can a si.  

Add new comment

3 + 7 =