Zanniat nunphung (lo thlo thu)

Zanniat nunphung (lo thlo thu)

            Lo an thleng in inn tek pa maw fial mi pa khat in fang ci cu lo sungah a vork ding. Tlangval fala pawl in vainim cin ding in vainim ci an pek. Vainim ci cu kau deuh ih laih mi leikua ah an cing ruangah fala tlangval an fial. Thal rawl ci cu rawl ci tlem fang lai in cing khal le a kho tha ko ruangah nau hak deuh pawl in an cing. Lo rit feh tu cu minung 20 tluk an si. Vainim cu mi 5 in an cing. A dang nupi nu le pacang pawl in tuhmui thawn leilung an thlo phah ih rawl ci cin mi leilung in an khuh vingvo. Cu tiin lo rit cu an theh. Mi nei  le a siang pawl in lo rit feh tu pawl cu zanlam ah inn ah zu pi bel 5 lai an thlor sak ih an do (pawi hial) an ti. Tlangval fala lo rit feh tu pawl zu in lungawi in hla an sak. An lam theu a si. March le April thla cu lo rit thla a siih an man laifang a si. May thla cun ruahpi a sur ih lo rawl a kho thlang.

            Lo sungih cin mi rawl a kho cun rawl kuang le hram pi cu an kho tlang theh ruangah lo rawl a kuang that ding in hrampi cu an thlo sak. Cu ticun lo rawl cu an thang ih July thla cu fang a vui ih September ah fang a thar. Fang lak a cu. Thlaruk a tiin vainim cu a paw ih September thla cun vainim cu an lak. Thal rawl pawl tha seh tin fang kuang le vainim kuang pawl cu an thlo fai sak. Thal rawl cu thla hra hnu ah lak a cu ih an lak theu.

            Lo sung ih rawl an lak theh hlan lo cu nitin in lo an kil theu. Lo kil ding ih an feh tikah mipa pawl cu phirivau tum phah in an feh. Nunau pawl in zo ih phirivau tum mi asi ti an thei a si. Lo an thleng tikah sumsel tum naa, talh kuang tum naa, an lo thlam deu te ih sin an tum theu ih an nuam aw zet theu. Sumsel le talh kuang cun an lo pil sung ih um fala le tlangval pawl parah duhdawt awk nak hla an tumtheu a si. Hai hnim le thei rah hmin tik cu a si. Hram lak khalah thingrah ei tha phun tampi an um.

            Zanlam rit kil pawl cu kan tlung a cu zo, ka tlung thlang a si ti nak khalah tlah kuang le sumsel an tum ta cio ih an lo ihsin an tlung thlang ding a si ti khal an thei aw theh. Rit te cu zing an tho pek in lo rawl ei an hmang ih zanlam khalah nitlak zik ah rawl an hawl.

            Killaw cu lam hlat deuh ah riak an hmang ih lo rawl ei ding cu zinglam nazi 8 in nazi 9 tiang an ei theu. Zanlam ah nazi 4 tluk in ei an thok ih nazi 5 tluk cun an riah nak dingah a um theu. Sakuh, zinghnam le thiahlei pawl cu zan ah ei an hmang theu a si. Cu hrangah rit kil pawl in lo rawl ei theu tu kil daan khal an thei a si. Hi mi cu zanniat miphun pawl lo thlawh daan a si. Hi mi thu cu U Za Thluai ih ngan mi sungin kan run tar lang mi a si. Tu lai nonawn pawl in kan Pipu pawl ih  nun tu daan an theih theinak dingah kan run tar lang mi a si. Casiartu zate par ah kan lungawi.