Zumnak a bang aw lo mi Biaknak pawl thin naa dingih tong mi pawl cawl thlang dingah biaknak a phunphun pawlkom in dil (November 9, 2021)

Zumnak a bang aw lo mi Biaknak pawl thin naa dingih tong mi pawl cawl thlang dingah biaknak a phunphun pawlkom in dil

November 9, 2021

         Bangladesh ram ih biaknak a phunphun pawlkom in biaknak khat le khat lungrualnak, remdaihnak thawn um tlang thei nak zoh in kan dung Zarhah Dhaka khuapi ih Gulshan Hotel ah thurel tlangnak an rak nei.Tui ni ah zumnak a bang aw lo mi biaknak lam hotu pawl thawn an um tlang. Asinan, an mai biaknak lam inn pawl, thusimnak pawl ah biaknak pakhat le pakhat ih thatlonak sim rero hi riahsia za a si. Hi tiih tuah nak cu Pathian ih daan thlun lo a si thu, hi vekih can lo ding nak in Anglican Bishop Sourav Pholia in a rak sim. Hi caanserh cu Alhaj Syed Nazibul Bashar Maizvandary MP in a rak tim lam.

         Hi pawlkom cu ramkhel lam pawlkom pakhat a si. Hi thurelkhawmnak ah Muslim, Hindu, Buddha le Khristian Biaknak lam hotu 250 an rak tel. Bangladesh ram ah hrekkhat Biaknak lam hotu pawl cu khat le khat huatawknak a cang ter tu thil, a dang biaknak thawn pehpar mi thuhla pawl tangdor ten Media pawl ah simnak, zumnak mal mi kohhran mipi pawl zuamtainak, velhawknak pawl an tuah theu.

         Tui caanserh cu remdaihnak le Biaknak khat le khat um tlang thei nak lam tuah nak a si. Conference ih motto cu ‘Interfaith Unity for Peace and Harmony’ (zumnak bang aw lo mi khat le khat thureltlang in remdaihnak thawn um tlang nak) a si. Biaknak lam hotu dinhmun in mai biaknak lam ih thuzirh mi pawl zirh dingah tuanvo an nei. A dang biaknak khal upat thiam dingah zirh a tul. Kan dung rei lo te ah Media pakhat ah Muslim le Hindu pawl lak ah biaknak lam buainak pawl a rak um ih nunnrak rak liam tu tla an rak um.

         Tui san ah hi vek thilcang tu le tu a um ih khat le khat remdaihnak neih a tul. Curuangah Biaknak lam hotu pawl khat le khat remdaihnak um dingah um tlang thei nak khaisannak lam tuah dingah, tu dinhmun ah ramsung ah siseh, ram tinkim ah siseh biaknak lam khat le khat lungrual ding a thupit thu, Hindu, Buddha, le Khristian pawlkom ih hotu Nirmal Rozario in a rak forhfial. Hi ram zalennak rak ngahnak cu miphun pakhat, biaknak pakhat thawn lawng a rak si lo. Asinan, tu dinhmun ah thazaang cak mi biaknak in cui thuneihnak cu thinkhat lungkhat ten kaihhruai an duh thu, biaknak lam hotu pawl in an rak sim.

         Biaknak a phunphun ih lungrualnak a um lawngah Bangladesh ram ah remdaihnak din a theih ding tiin an rak reltlang. Bangladesh ram remdaih mi nunphung pawlkom pakhat si dingah cun tu vek ih thurelkhawmnak pawl lawngin a theh lo thu, hi ram cu Muslim tamnak ram a siih a dang mipum mal mi biaknak pawl a hlan vekin thazaang cak mi biaknak pawl ih tuah mi tinkim an tuar vek ah a cang. Bangladesh ram ih milai covo pawlkom ih suah mi vek a si le 2013 ihsin thok in Hindu biaknak ih mipi pawl rak dodal nak zaten 3600 a um thu, inn siatsuahnak, buainak zaten 440 cu dawr pawl, sumdawnnak hnatuan pawl siatsuah nak pawl an si.

         Cu vekin thilcang 1670 cu Hindu biakinn pawl, khuavang biakinn pawl, thianghlim hmun ih nemhnget mi hmun pawl an rak siatsuah tiin an tarlang.

         Hi thuthang cu RVA thuthang ih kan ngah mi a si. 

https://bit.ly/3wCfCi6