Valankanny Bawinu hnenih Novena Thlacamnak

Valankanny Bawinu hnenih Novena Thlacamnak

V:      Kanmah ih bawmnak cu Bawipa hmin ah a um.

R:      Zianghrangah tile Bawipa cu lei le van tuahtu a si.

V:      Pa, Fapa, Thiang Thlarau hnenah . . .

R:      A thawhtir ih a um bangtukin . . .

Thla kan cam pei

          A Thianghlim zetmi le Fala ringring a si mi Aw Maria, Nangmah cu Bawi pathum Pathian pakhat ih duhnak vekin Bawi Jesuh ih Nu cang dingin hrilnak ngahtu na si. Kan Bawi Jesuh Pathian cu minung cannak a lakih, na pum sungah thla kua sung na vunnak ihsin a hnen ih lungawinak vun mangsal awla, thinniamnak thawn zaangfah a lo diltu pawl ih kan thlacamnak hi in saang hram aw. Na co zo mi lungawinak pawl tla a karh sinsin theinak dingin, thin thatho zet le upatnak tumpi thawn thla kan cam a si.

Rel cawklo ih a tummi cuih lungawinak cu upat in zuamnak thawn a diltu pawl, hnangamnak petu, Aw Maria, kan tulmi laksawng tla cu ngah thei dingin, in dil sak hram aw.

Na Fapa ih zaangfahnak, “dil uhla nan ngah ding” ti-ih thu in kamnak le mual neizetmi na thlacam sak nak rinsan in thinniamnak tumpi thawn kan lo dil a si. Tu-ih Novena ni kua sungih kan lo dilmi laksawng tla cu, Pathian ih duhnak bangtuk a silole a mah duh zawng a si mi laksawng in dilsak hram aw.

(Duhmi dilnak caan . . .)

Tu-ih kan tuah mi ni kua sung Novena thlacamnak cu Bawinu na hnenah kan lo ap a si. Hibangtuk ih kan lo ap ruangah na zaangfah bomnak cu kim zetin kan ngah ding a si ti-ih kan zum. Fapa Pathian, na sungih a sem tikah na thianghlim thinlung sungih a um mi lungawinak le duhdawtnak cu kan upat a si. Hih upatnak ih hminsinnak a si mi vancung mi ih thuthannak, Ave Maria thlacamnak vei kua le a tu-ih Novena ni kua sungih kan thlacamnak cu in cohlang hram aw.

(Ave Maria, vei kua cam ding)

Aw Pathian ih Nu, “thluasuahnak thawn a kimmi Nu” na si, ti-ih vancungmi Gabriel ih a lo sim bangtukin a tu-ih kan thlacamnak aw khal vancungmi ih a lo simmi lungawinak thu bangtukin, rak cohlang hram aw. Hi kan thlacamnak aw tla cu na sunglawinak thawn a khatmi le a tleu zet mi sui lukhuh par ih lungmankhung bangtuk ah run cang ter aw. Beidong vansang pawl bawmtu, Aw Maria, Tongkam ih minung cannak a lak lai ih na lungnomnak vun mang sal awla, na zaangfahnak rinsan in kan lo dilmi le thluasuah pawl tla cu Pathian hnenah in dil sak hram aw.

Hi laksawng pawl tla co thei dingin nangmah thawn a tlakmi thatnak hmuahhmuah pawl tla cu na hnenah kan lo sum a si. A Thianghlim zetmi Jesuh ih Thinlung hnenah na duhdawtnak ruat phah in kan thlacamnak in run ngai awla, kan lo dilmi laksawng pawl tla cu, Pa Pathian hnenah in dil sak hram aw, ti-ah thinniamnak thawn zaangfah kan lo dil a si. Amen.

Christian pawl humhualtu Siangpahrang Bawinu, (Kanmah hrangah thla in cam sak aw)

Daihnak Siangpahrang Bawinu, (Kanmah hrangah thla in cam sak aw)

Damnak Velankanny Siangpahrang Bawinu, (Kanmah hrangah thla in cam sak aw)