Capoh nak cu thil tihnung pakhat a si.

fale_pawl_duat_lo_vekin_a_lang_ter_tu.

Capoh nak cu thil tihnung pakhat a si.

            Kawlram mi pawl cu capoh awk hi kan duh zet. Cu ti kan capoh awk nak hin pakhat le pakhat kan nel awk nak, kan kom awk nak a hmun ter ti ih ka pom mi hi a hman mi a si lo.

            Capoh awk nakih a cem nakah thinheng nak le tawhawk nak a suah ter lole nel awknak a siat ter. Curuangah upa khal siseh nauhak khal siseh capoh awk ding a si hrim hrim lo. Mi puitling pakhat in nauhak pakhat a capoh tik ah "A thinnaa seh, tuar seh" ti ih tumtah nak tha lo nei in a capoh mi a si hrimhrim lo. Kan mah lam in kan capoh tik ah thungai ah a ruat ih a um daan te, a silole a thinheng, a thin tawi daan te cu duh nungin capoh nuam te si tin an capoh theu. Asinan cutiih veitampi an capoh theu tikah thinlung lam fimnak ih ti dan ah nauhak te thinlung ah hriamhma ah a cang thei.

            Kiangkap mi pawl hnen in capoh nak a tuar ringring tu nauhak pakhat cu hi tin a cang a si.

  1. Thinlung ruah nak a hmun hnget thei nawn lo.
  2. Mah le mah zum awknak a hlo ter thei.
  3. Mi dang pawl par rinhmainak a nei ih mi zohman a zum thei nawn lo.
  4. Ning zah tihphan thinlung a tam ter thei a si.
  5. Mah lawng si nak, mi lak tlanlen dan thiam lo, mi kom naklam ah tha mal ter thei.
  6. Mitin parah an that lo nak lawng a hmu ih ruah nak phunkhat lawng nei mi ah a cang ter thei.
  7. Mi dang parah kut le ke hmang in mi a hmuh suam thei.
  8. Ziang vek caan khal ah an thin a phang thei theu.

            Nauhak kha tap ko in kan capoh ih a thin a heng ih in to sal, tong mawi lo in in biak a si lole in tawi sal tik ah "Hi nauhak cu a va puar ve, a va sual ve" tin kiangkap mi pawl in an ruat ih "A nu in nun a sim dah lo si ding" ti tiang kan ttong tikah hi capoh awknak hin an innsang buai nakah a cang ter theu.

            Curuangah ziang thu hla khal ah siseh mi thinlung thianghlim le mi zum ol tuk lai mi nauhak te pawl kha capoh in an thinlung ruah nak le an nung ram va siat suah hlah. Nauhak pawl kha nomnak men in kan capoh rero nakin negative emotion nei ding ih tha pe rero vek ah a cang theu. Negative emotion ti mi cu

  1. Thinhengnak
  2. Thinphannak
  3. Beidongnak
  4. Nahsiknak, huatnak
  5. Mahte lawng ih um ti ruahnak
  6. Riah siat nak
  7. Sual nak nei vek ih ruah awknak
  8. Mah le mah man nei lo vekih ruah awknak
  9. Ralhrutnak, tih nak pawl tla an si.

            Curuangah nauhak nei nu le pa le inn sungsang pawl in um tu zia, tongkam hman dan pawl ralring zet a tul a si. Nauhak pawl in an thei thiam lo pam tin ruat men hlah. An mah an tong thiam hrih lo men ruang ah a si. Kiangkap nu le pa le u le nau pawl ih an tong mi cu an thei thluh. Nauhak ih thinlung ruahnak lam a zingzoi tu pawl in nauhak te pakhat cu thlasarih ihsin thok in a mah kha a mai nu le pa in ziangvek in an kai hruai, an kilkhawi ti mi kha an ruat, an zingzoi lai fang a si tin an sim. Curuangah kan mai innsungsang in a si lole kiangkap mi pawl ih capoh nakin kan nau le pawl kha an thinlung buaibai nak pe lo ding in nu le pa pawl in kan ralring zet a tul.

            Kan fa le kan nau le kha kan rualpi lo le kiangkap mi pawl in an capoh tik ah hmaisong ruang ah sim ngam lo ih zoh men lo in hivek in capoh a that lo zia sim fiang ngam ding a tul zet.

            Nu le pa ti mi cu mai fate pawl ih taksa, thinlung lam kil him le fingkhawi ding a si lo maw? Hi mi thu cu (Ref:https/www.howtoadult.com) sungta kan ngan mi a si.

Add new comment

5 + 3 =