Fa le pawl duhdawt lo vekih a cang tertu (5)

fale_pawl_duat_lo_vekin_a_lang_ter_tu

Fa le pawl duhdawt lo vekih a cang tertu (5)

          Fate midang hnakin tha deuh dingin ret dingah tiah a khaisang aw mi pawl, mai fale pawl dai a si le saya/sayamah pakhat hman hrelh lo in dai ka siang lo tiih a au rero tu pawl, zianghman tuah ter lo mi ah lungsi tu pawl, fale pawl pangaang zuat vekin an zuat tikah a aukio tu pawl, mai fale pawl duh lo ah a cang tertu nu le pa pawl ih cek awknak dingah hi ca ka lo hlawm.

1. A cuangce in caantha pektuknak

Hrekkhat nu le pa pawl cun fate hrekkhat pawl caantha an pe theu. Hi mi ka fapa ih ei awk ah; hi mi ka fanu pakhat lawngih hrangah tikvek in a dang ten an retih  midang pawl ih dai thei lo dingin an kham. Pi le pu suahcam tuah le tuah lo thupi lo. Hi a tuu hmaisabik hrangah cake tumpi, laksawng khal a tha bik lawngah, hi vek innsang sungih neih mi caantha a ngah tu fate pawl cu duhhamnak an nei tlangpi. Midang an zawnruat thiam nawn lo. An sunsak nawn lo. “Kei mah, kei mah” ti lawng kha a si thlang.

2. Hum tuknak

Pakhat khat tuah sual le ka pa in nun I sim thlang ding. Ka nu in nun I sim thlang ding tin an ti theu ih Ka pi le pu in in humhim pam tin an ruat theu. Pilepu in “Nauhak lawng a si lai si. Zianghman a thei  hrih lo. A upat le a fim leh ding.”  Hi vek nauhak hrangah ziang tuah khal le a hman theh. Nauhak hi vekih sawmdawl le neta a upat tikah thilsual tuah tiangin a luar thei ruangah ralring a tul.

3. Duat tuknak.

Innsang zaten a mah lawng an hum. Pakhat khat a tuah thiam thlang khal a sile innsang zaten in an lawm. Za an beng sak. Tidai tile tidai, rawl a tile rawl a hmaiah a thleng lohli. Ei theh veten ret sak tu ding a um. Ziang hnipuan hruk ding ti sim veten a kiang a thleng cih. Nauhak a mah rori khal kut nei lo vekin an ret theu! Phunhra a phi tu nauhak rawl barh lai ka hmu dah. Hi vek nauhak pawl cun an mah le an mah an thupit aw tuk. A lenglam thlen le ke kai ngah lo, kut kai lo ngah pang le pakhat khat tuah le zianghman an tuah thiam lo. Fimthiamnak thiam in tlawng an theh khal le ziang thiamnak hman nei lo tu pawl ah an cang theu.

4. Duhzulh luarnak

Ziang ziang a duh khal le lei sak. Mithmai nau lo dingah tiah paisa tampin an then theu. Nauhak khal in a duh mi zaten a ngah ti a theih tikah pakhat khat ngah lo le lungkim lonak a langter. A tap. Leilungah a lawk. Upa khal in a lei sak cih. Hi vek nauhak cu ziang hman pamhmai an thiam nawn lo. Thilri khal an finkhawi thiam nawn lo. An duhduh in an hlon. An hngilh ol. A hloh le leisal a ngah ti an thei. Paisa an hman a tam. Hi vek nauhak cu zianghman an pamhmai thiam lo tikah nuamnak an nei lo. ‘Duh mi ngah’ a si tikah zianghman zuam zet in an tuah peih nawn lo. Bang an peih nawn lo. Zianghman an pamhmai thiam lo. An kum lawng nuam ten a upa vivo men. Zianghman ih hmantlak lo mi vek ah a cang thei.

5. Sunsak luarnak.

Nauhak ti cu an lek theu. An siatsuah aw pang theu. Nauhak in lekphah in zinkap ih thingkung a pah ngah ih thingkung a hau duhtu nu le pa ka hmu dah. Nauhak pawl lek phah in an bah theu. A dik mi tidaan in nauhak a mah ten a tho ter sal. Cu vek si lo in malte a bah veten tho sak, malte siatsuah awk le kiangkap mawhphurh rero a si le nauhak a upat le zianghman tuanvo a lak ngam nawn lo. Hi vek innsang ih a suak tu nauhak pawl cu tamsawn in an thinlung a neem. Malte hman thinlung hnaihnoknak an tuar thiam lo. Neta a upat le fimnak hawl tikah siseh, hnatuan ah siseh pakhat khat harsatnak a ton le a tho thei nawn lo.

     Harsatnak malte ton men a sile thinbang zet in an tuah theu. Minung ti mi cu leilung sungih um mi ramnung kan si vekin nauhak cu a kum ih zir in thanglian ter mi hi a dik mi tidaan a si. Ka rualpi te’i nupa in an naute suakpek in rak hmuh. Naute a tah le ziangtin kan tuah ding titla in sut phah. Tah tla hi harhdamnak hrangah a tha. Reipi a tah lo ahcun a tawkmawi in tap ter aw tiah ka sim sal. Cu vekin nauhak bok ih vah a tul lai ah bok in vak ter a tul. Feh an zir lai tikah tluk ter a tul. Lenglam ih zuar mi lamshauknak leng pawl thawn feh daan zir ter ding a si lo.

Source: Sar Pay Myoh Taw

Add new comment

7 + 2 =