Farahharsat nak thu

Farahharsat nak thu

          Ei ding um lo ih thin bang a sile theih thiam a theih. Hruk ding neih lo ih thin bang a si khal le theih thiam a theih. Um nak hmun nei lo ih thin bang a sile theih thiam a theih lai. Asinan mi nung tam sawn cu ei ding an nei, hruk ding an nei, um nak ding an nei. Asinan thinnom nak an nei lo. Ziangah ka thinbang? Zo in in hrem? A ngaingai ah cun kan thinlung in in hrem. Leitlun pi ah um thiam lawng ah, ruah thiam lawng ah thin a nuam a si. Theih nak thawn um thiam a si le tam pi a zia.

          Minung pawl cu ka thinnuam pei maw tiin a phunphun an hawl an tuah. Ziangkhal in a ngaingai ah thuk zetih thinnomnak in pek thei lo. Ziangziang kan ngah khal le reilote sung lawng kan thin a nuam. Rem cang lo nak cu pakhat hnu pakhat a pot ding. Rem cang lo nak ti mi cu leitlun ih um dan a si.

          Leitlunpi cu ziangtik hman ah a famkim dah lo. Hi ti vek ih a cang mi um dam pawl cu ruah thiamnak thawn um lan a si le ruah nak kha nuam te ten a puitling dingih thinlung cu thilcang mi tinkim ah lehrul nak a tuah nawn lo. Hmuh men, theih men, theih nak men in um lam men a theih. Ziang ruang ah thin a bang? Ruah nakih a lehrulh ruang ah thin a bang. Curuangah thinlung in a lehrul mi pawl kha kan zoh ding, theih ding a tul. Theih a si le lehrul nak kha a mal vivo.