Fimthiamnak neitu le Ca thiam tu

Fimthiamnak neitu le Ca thiam tu

          Leitlun ah mifim le ca thiam tin phunhnih in a um. Cui phunhnih cu fimnak in siseh, thiam nak in siseh a thuhla in an dangaw. Fimthiam nak thiam ti mi cu buaih, degree, Jianggan science of technology pawl zir suak nak a si. Cathiam ti mi cu cu vek a si lo. Danglam nak  mal te a um. Cathian ti mi cu ca lam, theih koh nak lam ih mithiam pawl  an si. (Fim nak cu ca ah um) ti a si vek in ca ih sin fim nak an ngah ih fimthiam nak a karh zai ter thei.

          Thuhla pakhat par ih ruah mi thu kan namhnget nakah theihkohnak lam ih fimnak kha  a thupi. Fim nak kha hmang in ruah ih namhnget lawng ah harsat nak pawl kha kan pah tlang thei ding. Asinan leitlun ah fimthiamnak nei tu lawng an tam. Cathiam tu cu an mal. Ziangah tile ca ih sin ngah mi theih kauh nak fimthiam nak pawl kha zinzoi nak a mal ruangah a si. Fimthiamnak neih cu cathiam nak a silo. Thiam nak pakhat kha zirsuak nak men lawng a si. Curuangah mihrek fimthiam nak nei tu pawl cu fimthiam nak an nei ko nan thil hrek khat ah a sual in an tuah theu. Fimnak ruah thiam nak nei lo vek in an cang vai ngah theu. Fimthiam nak ti mi ih dungah an fimthiam nak kha an hngal pi theu. Cu ti vek ih an tuah nak cu fimthiam nak an nei ko nan cathiam nak an neih lo kha an lang ter.

          A hman, Fimthiamnak cu cathiam a si lo. Phunsang thleng, buaih, degree ti mi lawng kha fimthiam nak lawng asi. Cathiam si dingin tha suah ih zuam dingin a tul asi. Fimthiam nak kan neih tikah cathiam si ding tla a tul. Fimthiamnak lawng in a tawk lo. Cathiam khal a tul. Thutheih thei nak le ruah thiamnak pawl karh zai dingin cu cathiam lawng ah a ngah. Fimthiam nak kan neih a si khal le kan neih lo a si khal le, buaih, degree kan ngah a si khal le ngah lo khal le, cathiam tu si a theih. Cathiam tu tinkim in buaih ngah tu an si lo. Lothlo tu pakhat men an si. Asinan ca lam theih kauh nak lam ah mithiam cuangce an si ih neta lam ah mi upa an si thei.

          Fimthiam dingah  kum le caan khiah mi sung te lawng a cang thei ko nan cathiam ding in cu caan khiah nak a um lo. Kan mah ten tha zaang suah ih zuam thei a si le zuam vek in cathiam si a theih. Mi fimthiam si lo khal le ca sir thiam tu zaten cathiam an si thei. Ca kha zinzoi nakin cathiam mifim cang a theih.

          Cu a si ruangah fimthiam nak a nei tu pawl zaten cathiam si dingin thazaang suah ih zuam a tul vek ih fimzir nak buaih degree ngah lo khal le ca kha zinzor nakin cathiam si dingin zuam a tul. Culawngah cathiam mifim kan cang thei ding. Fim nak khal nei, ca khal thiam a si le ziang tinkim ruah in namhnget thei, fimthiam nak thawn kan tuah suak thei ding a si.