Harhdamnak hrangih a bawm thei tu Lingmaw (Serthlum) ih thu Part 2

Harhdamnak hrangih a bawm thei tu Lingmaw (Serthlum) ih thu (Part 2)

Lingmaw cu a thling mi a sawng ter thei nak a nei ih awm har, tb lung na pawl hrangah that nak a pe. Cuihleiah dangcar, dang na, awmna ih dang nat nak pawl a dam ter. Awm na pawl lingmaw hnah li hnah nga hrawng so koin suan hnu minute 5 hrawgn a sinsin in ret aw. Cuihnu ah a hnah pawl hlon in a hlum mi a ti cu nikhat 3 in nak in a zia ter thei. Lingmaw rah sungah a tel mi calcium dat cu minung taksa kom daan sungih a tha a cak mi acid alkaline mineral pawl a hlo ter thei tu tur a tammi phunkhat a si ruangah thi thar le thi fai a thang ter thei.

            Lingmaw nitin ei tu 1073 an zingzoi ih cumi pawl ah thin thawn pehpar mi nat can nak hmuh a si lo thu, cutivekin thinnat nei pawl lingmaw hmanhman ei nak in nat can thei nak theih ding rori in a ziat thu, thin cancer, thin tum nak le thin ih a cang thei mi nat pawl hmual nei zet in a kham thei thu, kuak le zu pawl ruangih a cang thei mi thin nat nak pawl cu ling maw hman hman nei nak in that nak tampi ngah ding asi thu Japan zingzoi tu pawlin an nemhnget.

            Lingmaw nikhat veikhat asilole lingmaw ti nikhat khuatkhat in asile banhla ei vekin ril nat, pumpi nat le pumpi cancer cang dingah a mal ter ih hleiah rawl ei thaw in rawl rial daan tha in pum a tha ter. Pum tha lo a can tikah lingmaw cu sii tiin ei a theih. Pum tha lo pawl lingmaw hawng a phut le sabit mu a phut cu bang aw in rawi in nikhat veikhat hai thum in in a dam ter thei. Pum sung thli um nak rungih pumna pawl lingmaw kung malte kha tidai khuatthum hrawng suang in nikhat veihnih in nak in a zia ih pum sungih khukrul pawl khal a tla ter.

            Lingmaw ih a hawng rim lain hmeh hmui, inn ih hman mi siivai pawl le aromatheropy tiih kawh mi dam ter nak khal ah hman a theih. Lingmaw par sungah Neroli tiih kawh mi rimhmui phunkhat a tel ih, rit nak bang nak a zia ter. A hmin a thang mi Awdikalung zihmui tuah nakah cui lingmaw par cu hman a si. Lingmaw hawng ah a hmui mi Limonen hleiah, glucose le Tenin dat pawl a tel. Mai inn ah lingmaw hawng cu a rim la in sii ih hman a theih. Lingmaw hawng paaten at in ni in tlet loin a hnem nak hmun ah ro koin ret in Aang sii le panhnan siti thawn ciah in ret aw. Sui zawng lingmaw sii tiin a thleng aw ding.

            Cui lingmaw ih a tha cu mangbangza in hman a tlak. Lingmaw par ihsin ngah mi aasi khal bang nak hrangah a tha tuk. AIDs nat nei pawlih lei ih a cang mi hminsin nak pawl hrangah lingmaw sii cu patpe thawn hnih nak in a hlo thei. Khuai zo mi ruh ihsin hnai khuar in nat nak pawl par ah kuva hnah mei sa em in, lingmaw sii hnih in ben nak in a hlo thei. (Tidai tong a ngah lo lawlaw.) Hitivekin nihnih veikhat a thar thleng aw. Si ti sa le tisa ih kang mi hma pawl, cet thil ri ruangah hma cutivek a sa ih kang mi nat phunphun pawl hrangah lingmaw si hnih nakin lakhlo vekin a hlo ter.

            Hmasi tang lo, a kang ih hnai a um ih a bol pawl khal a suak ter lo. Banhla hnah ah lingmaw sii hnih in hman asile a tha deuh. Taksa bol pawl hrangah, kuva hnah meisa in em in lingmaw tok in a na mi par ah ben nak in a hlo thei. (Tidai tong a ngah lo lawlaw.) Awm har tikah, lingmaw, kuva tattuh ti, pazuk si malte ret in awm le taksa ah malte hnih nak in that nak a pe thei. Nauhak pawl khal upa pawl khal hman a theih. Thi hri khal, thahri thling, thahri nat cutivek tha nat phunphun pawl hrangah lingmaw si cu pazuk si malte rawi in hnih a theih.

            Pumpi le pumna pawl hrangah lingmaw si hnih nak in a zia thei. Tha thang in rawl rial daan tha dingah khal lingmaw si kha in a theih. Ni sa ih kang ruangih taksa ro nak le a car mi pawl hrangah lingmaw hnih nak in taksa mawi in a vat ih a mawi ter. Lingmaw hawng ih a suak a khu in pangang pawl a thi ter ih, a fai ter tu a um ruangah lingmaw thawn tuah mi taksa ih hman mi sakpia tuah a theih. Lingmaw sungah Vitamin C dat a tam ih a tul lomi free radicals pawl khal a suah ruangah hmanhman ei nak in that lo nakpawl a hlo ter ih mi a no ter.

            Lingmaw ti cu fanghma ti thawn rawi in ching malte rawi in in asile taksa a nem ter. Tuletu hricu suak in taksa mawi lo nak cu ih zik te tin in a hring ih a thar mi lingmaw hawng cu sawr in a suak mi a ti cu cite ti malte rawi in tanakha ti thawn taksa tinkim ah hnih nak in taksa a no ter. Taksa sang, vun car pawl hrangah lingmaw hawng sawr in hnih a theih. Hmai, ke, kut pawlah a rang, a sen, a dum cutivek pawl a suak asile lingmaw hawng cu a hnem nak ah ro dingin pho in tidai thawn hnih aw.

            Nikhat veithum tampi hnih nak in a hlo thei. Ke tin, kut tin pangang um pawl le pui, taksa thak pawl thinphang hlah uh. Cumi a tak pawl cu lingmaw hawng thawn nuam ten kheuh in lingmaw hawng a thar mi ti hnih nak in a na mi nuam teten a mal vivo ih a hlo ter thluh thei. A thur dat amal mi lingmaw cu tamtuk ei asile a rah sungih citrus pawlin taksa sungih calcium a sung ter ruangah ruh le ha pawl a siat ter ih hleiah a sa ih ka le ha hni pawl thling nak a cang ter thei.

            Curuangah a thum dat amal te lingmaw cu nikhat veikhat lawng eij a tul. Tipi thuanthum ihsin ngah mi sa pawl cu lingmaw thawn kom in ei a tul. Pia lingmaw vek a thlum dat a tam mi lingmaw cu tamtuk ei asile khak a tam ih, a umna ih taksa sa a cang thei. Cui a thlum mi cu cite malte thawn ei asile a dam thei.

            A rah ihsin ngahmi lingmaw ti cu harhdam nak hrang tampi'n bom nak a pe. Hmuan ah pangang thah nak sii pawl kap asile dawr ihsin lei mi lingmaw pawl ei hlan ah ahmaisa ah faiten kholh a tul. A cang thei asile Organix rah pawl lawng hril a tul. Lingmaw ei hnu nazi pakhat sung cawhnawi in hlah. Asan cu cawhnawi ih a tel mi protein pawl in lingmaw sungih a ummi a thur dat acid thawn kom in a khal asile rawl rial ank a nuam te ter ih rawl sung ih harhdam nak a hip nak khal a siat suah thei ruangah a si.

            A rah kai tikah a hawng a hak deuh ih a rit deuh ih, a hmai deuh mi a rah cu a ti khal tam, thlum khal a thlum. Hma a nei mi a rah pawl le a hawng a ro ih a thar asilo mi a rah pawl hrial aw. Lingmaw a har mi kha a ti in asile a ti sawr in in cih a tul. In cih lo asile thli hrang nak ruangah Vitamin C a sung thei. A zaten in loin a tang mi ti cu tikhal sungah ret a tul. A thar mi a rah pawl cu khan sungah kar hnih hrawng ret asi. Cutiin reipi ret dingah tikhal kuang sung ret duh asile a hmaisa ah a rah cu tidai kang ko in hnul aw. Lingmaw ti pawl cu zal thawn ahleicein ret a tul lo. Thlan a suak dingih a tawt ol. A rim a thawt nak thawn a khat mi lingmaw pawl cu kumkhat sung rori ngah a theih ih olten a hawng hih a theih ruangah mi duh bik mi le a lar bik mi thingrah pawl sungah lingmaw khal a tel. Lingmaw cu rim thaw a nei zet ih a thaw zet mi thingrah asi ruangah upa, mino kum hril loin duh a si. Amah teih a um mi thingrah lakah minung pawl hrangah a tha mi thingrah phunphun sungah lingmaw khal a tel. Curuangah lingmaw rah le lingmaw kung pawl cu minung pawl san sau dingah a sang zet mi sii khuat asi thu kan ron lo sim thei a si.   

https://www.youtube.com/watch?v=GSSaqlrluh8&t=27s