Hnatuan na neih lo le caa siar aw.

Hnatuan na neih lo le caa siar aw.

          Theihkauh nak pawl zinzoi ti mi cu theihnak le ruahnak pawl ngah dingah a si. A fimvar mi thluak nei lawng ah hlawhtling mi nunram khal  din suak a thei dingih Cumi hrang ah caa siar a tulnak a si. Ziang caa hman a siar lo tu cu theihnak zianghman a neih lo dingih ruah nak ziang hman a nei lo ding a si. Ziangtidaan hman a thei lo ding a si. Ruahnak khal zianghman a nei lo ding. Cu vek minung ih an nunram cu ziang hlawhtlin nak hman langcu zet ih an neih lo vek in a nuam ih a tlaitluang mi nunram khal an din thei lo ding.

          Curuangah midang  hnakin Ke kalkhat hmaisa na duh a si le, midang hnak in ruahnak pakhat a hlei na duh a si le, midang hnak in si nak neih na duh a si le, midang hnak in hlawhtlin na duh a si le caa na siar a tul, a si lo bik siar tengteng a tul.

          Caauk thawn siseh, phone thawn siseh, a thupi bik cu ca siar dingkha a si. Buaih ka ngah zo, caa ka thiam zo, ka kum upa zo, ka lian, ka neinung zo tin theih ding, thiam ding, zir ding um nawn lo tin ruat pang hlah. Nunram ti mi cu thih hlan lo zir ding le hawl ringring ding a si. Hnatuan na neih a si le hnatuan aw. Hnatuan na neih lo a si le caa siar aw. Leilung pumpi hel a tul lo. Caa siar men in a zaten theih a theih. Caa na thiam ih caa na siar lo a si le na thiam nak cu man a nei lo. Caa siar nakin nunram zaten a thleng aw ter thei. Caa siar nakin a tha le tha lo a thleidang thei. Caa siar cu theih nak a kauh vek in minung thinlung khal a thleng ter thei a si.

`        “Caauk caahnah pawl cu minung ih rual” an ti vekin rualpi tha hnak hman in theih nak a kauter tu cu ca a si.

          Caa pakhat cio cu an thu ih zir in caa siar tu zate kha thathnem nak a pek a si. Curuangah caa tampin siar aw. Caa siar cu ruahnak a vang ter a si. Casiartu zate parah casiar duhnak thinlung theih kauhnak thinlung ka Pathian in in pe hram seh. RVA Falam Service ah Pawlpi thuthang le a dang theih kauhnak, le hlanlai mithianghlim pawl thuanthu ngai a theih ringring a si. Nan zaten parah kan lungawi.