Kan mai man kha midangin in ra khiahsak hlah seh

Kan mai man kha midangin in ra khiahsak hlah seh
Mipakhat cu nat nak a nei ih a natnak in a thi zik te tlang a si. A nih in a fapa tleirawl te kha a kiang a ko ih hitin a sim. Na pu in a thih hlan ah sui nazi pakhat in pe ta. Cui nazi cu kum 200 lai a rei thlang. Cui nazi cu ka lo pek ding. Asinan ka lo pek hlan ah sui zuar nak dawr va feh awla hi nazi hi zuar a si len ziangzat an lo pek ding ti va ziangzoi aw a ti. A fapa cu a pai fial vek in sui zuar nak dawr ah a feh ih nazi cu ka zuar ding a ti ih dawr neitu pawl a hmuh. Cu theh in a pai hnen a ra kir sal ih hi tin a sim. “Ka pa, sui zuarnak dawr in nazi cu a hlun tuk zo ih dolar 100 lawng kan lo pe ding in ti” a pa in hi tin a sim sal. Asile thil pawng (thilsia zuar)nak dawr pakhat ah nazi cu va pawng san hnik aw. Ziang zat an lo pe pei” a fapa cu thilpawng nak dawr ah a feh ih a pai hnen a kir sal ih hi tin a sim. “Thilpawn nak dawr in hi tin in ti. Dolar 20 lawng kan lo pe ding. Ziangruangah ti le nazi ah a rin awk mi te pawl an um ruangah” a pa in hi tin a ti “Khuapi sung ih hlan thil pho lang nak ah va feh awla nazi kha va hmuh hai aw” a ti. A fapa cu a pa ih um tu zia cu a thinlung in mak a ti zet nan a thi zik te mi a pa ih duh nak kha el a duh lo ruanah hlan thil pholang nak ahcun a feh.
A reihlan ah a pai hnen a kir sal ih lungawi aipuang zet in hi tin a sim. Hlan thil pho lang nak pa in dolar 375000 ka lo pe ding in ti. Nazi cu hmuh a har zet mi hlanlai thilri a si ih ka lo lei theh hnuah hlanthil pholang nakah mi tampi zoh dingin ka ret ding.” Cutikah a pa in hi tin a ti. A man thei thiam nak hmun lawng ah a man dik tak kha an thei ding. A caan caan len nangmah man thei lo tu thawn tong awk len na thinheng na thintawi ding. Na diriam lo ding. Cu ti a si len nang cu man thei thiam lo nak ah ka thleng maw si ti kha ruat aw. A pa in a sim bet “Na nundam sungah nangmah ih na tumtah le na si nak kha thangso vivo dingah zuam ringring aw. Cu theh in na man a thei thiam tu pawl um nak ah um aw. Mah ih si nak kan man kha kan mah rori in ka theihthiam lo a si le kan man a thei lo tu pawl ih tongkaa men ruangah man ol te in kan zuar ngah pang thei. Kan mah kan man kha midang in in ra khiah sak hlah seh. Hi ti a tong hnu ni rei lo te ah a thi. A fapa in a pai hnen in man nei zet ro a co ta tin a ruat.