Kawl hang ih that nak

Kawl hang ih that nak pawl

            Kawlhang cu hanghnah hang rah tiin na ruat thei men. Taktak ahcun kawlhang cu hanghnah hangrah siloin thing thei rah tiin thingkung hram kung zir nak (Botany) in phun a then. A rak khoh nak hmaisabik cu thlang America a siih, tui ni ah cun leitlun ih hman mi eiin ah tampi'n hman asi. Leiparah kawlhang phun dazin khat hrawng a um ih, Kawl ram ahcun a tlangpi in Kawlhang sen le aihre zawng kawlhang tiin phun hnih a um. Kung a nei mi kawlhang cu a hawng a paa ih a ti a tam ih, a thur dat a tam ruangah hmeh suan tikah hman asi theu ih, a sen zawng kawlhang cu a sa a sah ih hmeh bawl, pawyi tiin ei a si. Kawl ram ih rawl suan nak coka ah nu pawl hrangah um lo thei loih a tul mi thingrah a si.

Kawl hang le harhdam nak

            USDA National Nutrient data base in siilam zingzoi tu pawl ih an zingzoi nak vekin suan hrih lomi 100g a rit mi kawl hang sungah 18 calory, kaci dat 3.9 g, protein 0.9g, aci dat 0.2 g, colostrum 0 g, rawl a cip ter tu aahmindat 1.2 g, pholic 15 ug, niac 0.594 mg, pyridoxine 0.080 mg, tiamim 0.037 mg, Vitamin A 833 IU, Vitamin C 13 mg, Vitamin E 0.54 mg, Vitamin K 7.9 ug, sodium 5.0 mg, potassium 237 mg, calcium 10.0 mg, dan dat 0.3 mg, magnisium 11 mg, maganese 0.15 mg, phophurus 24 mg, zinc 0.13mg, krutin B 449 ug, Krutin A 101 ug, lutin 123 ug, lycopene 2573 ug cutiin Vitamin le tattuh dat pawl tampi a tel. Kawl hang cu suan hnu ahcun a rah sungih a ummi dat pawl a thleng aw ih, harhdam nak hrangah a tha sawn tiin an sim.

1. Fanghma le apple pawl rawi mi kawlhang phuayi in nak in, colosturm pawl tlak ter nak, luu naa dam nak pum dam nak cutivek that nak a pe.

2. Kawlhang cu hunglauhni le apple thawn rai in phuayi tiin hman hman in tikah taksa a mawi ter. Cuihleiah kaa rim sia khal a kham.

3. Sii lam mifim pawl ih sim nak vekin kawlhang cu a mu hlon in ei na in kal le zun inn lungto um nak a kham thei thu, karkhat sung kawlhang vei sarih a ei tu cu phu ih cancer can thei nak zatek 50 tiang a mal ter thei thu, karkhat ah veihra tlun ei tu cu phu nat nak in an luat thei thu siilam mifim pawl in ruah nak a pe.

4. Potassium tampi a tel ruangah thi thang nat a cang ter thei lo.

5. Thil hmuh thei nak a thang thei nak dingah Vitamin A, Lutein le Zeaxan dat pawl a tel mi kawlhang in a bawm thei. Mit malh nak, kum upa ruangih thil hmuh thei nak siat nak cutivek mit nat nak a phunphun a kham thei. Computer hmang tam ruangih mit that lo nak hrangah kawlhang in mit a vang ter thei thu, zing zoi tu pawl in ruah nak an pe.

6. Kuak fawp pawl hrangah kawlhang cu a thabik mi sii a si. A rah sung ih a tel mi Chrologenic le coumaric acid pawl cu kuakfawp theh hnu nicotin dat hop nak ruangah cuap siat nak buai nak ihsin a kham thei.

7. Ahmindat a tam mi kawlhang ei nak in rawl feh daan a tha ter ih sung pit nak ihsin a kham. Kawlhang ei nak in sung pit khal a cang ter lo. Ril peng nat nak a zia ter thei.

8. Thazang a tha ter ih, taksa that lo nak a pe tu free radicals pawl tha zet in a neh thei.

9. Kawlhang sungah riboflavin tampi a tel ruangah lu hrek nat nak a zia ter.

10. Beta-carotene dat khawm awk nak kawlhang ei nak in awm nat nak a kham thei.

11. Minung pakhat ih nikhat sung krumium dat tul zat ih zatek 7.5 cu kawl hang khuat khat in ngah a theih ih, cui dat in zunthlum um lo dingin a kham sak thei.

12. Australia ramah zunthlum thawn a pehpar aw mi lung nat nak tuar tu minung 20 cu kawlhang ti 250 mililitre nitin pe in, kar 3 a rei ahcun an lung nat nak a zia timi cu hmuh asi tin an sim.

13. Minung pakhat ih nikhat sung tul mi Vitamin K ih zatek 17.8 cu kawlhang khuat khat in ngah a theih. Vitamin K tampi a tel ruangah ruh pakhat sung ih Calcium molicule pawl ih tha a cang ter ih, ruh kah a khoh ter. A rah sungih calcium dat in zarhtin daan a cem ter ih nunau pawl ruah tha mal nak, ruh nat nak in a kham thei. Kawlhang sen sung ih a um mi Vitamin A cu kawlhang a hring hnakin let 4 a tel ih ruh le ha a tha ter.

14. Thi khal in thi hri pit nak pawl cang lo dingah, kawl hang ti in a tul.

15. Kawlhang sungih Vitamin B le Potassium dat pawl cu thi tam le mal le colostrum pawl a rual rem ter thei ruangah lung rinlopi ih thli luh nak, taksa zeng pawl a kham sak. Minung pakhat ih nikhat sung a tul mi Potassium ih zatek 10 cu kawlhang ti khuatkhat in ngah a theih. Boston ih Brigham and Women's Hospital ih siilam an zoh nak vekin kum lailak le kum u pa nauhak 40000 cu kawlhang asilole kawlhang a tel mi inei pawl cu kum 7 hrawn an ei ter ih kawlhang a ei tu nunau pawl cu lung thihri fiah nak le lung nat can thei nak zatek 29 a mal thu an hmu fiang.

16. ဖရဲသီး၊ Strawberry? မုလာဥနီ cutivek hanghnah hang rah pawl vek a rah sen mi pcomaslic acid le Chlorogenic acid palw ih dat kom nak asimi lycopene dat pawl khal kawlhang sungah a um. Kawlhang a zawng a tak deuhdeuh asile Lycopene dat a tam. Cui dat cu cancer cell pawl karhzai nak hrangah kham thei nak tha a cak mi dat than nak kham nak thil ri a tel ruangah ahleicein hngawng, cancer, pumpi cancer, hnawi cancer, kam cancer, dang cancer, taw cancer, laa cancer cutivek cancer nat nak pawl cu a kham sak thei thu, ram tin zingzoi nak ca pawl ah an ngan. Cuihleiah ril te cancer, rilpi cancer, sul cancer le nau um nak cancer can thei nak zatek 19 tiang a mal thu, mipa pawl cizai nakah a bawm thu siilam thuthang ah an sim. Kawlhang a tel mi rawl asilole kawlhang cu karkhat veihnih ei nak in phu cancer can thei nak zatek 25 tiang a mal ter thei.

17. Kawlhang cu Lycopene dat ruangah nisa tang ah a ti loihli thei lo. Lycopene in taksa bol nak, vun zawng thleng nak le taksa vun nat nak cutivek pawl in kham thei nak thacak mi dat thang kham thei nak phun khat a si. Cuihleiah nisa sung ih a tel mi kayanglunzawngchi ihsin khal a kham thei. Manchester and Newcastle Universities ih an zingzoi nak vekin hai 5 hrawng asimi kawlhang cu nitin ei nak in taksa ni sak nak in zatek 33 luan a kham sak theiih, taksa a mawi ter tiin an sim.

18. Kawlhang sungah calory le aci dat malte vial a tel ih, colostrum a tel lo lawlaw, olten a siat ol mi ahmin dat a tel ruangah taksa sungih colostrum a tla ter ih, thi sung ih a thlum khal a rual rem ter. Kawlhang sungah rawl ei duh nak a kham thei tu Ghirlin a tel ruangah pum a puar ter ih, hmuk ei duh nak thinlung a mal ter. Kum 18 le 35 karlak nunau pawl an zingzoi nak vekin kawlhang tel mi hmuk ei tu pawl cu kawlhang tel lomi hmuk ei tu hnakin thinlung ah di riam nak an ngah ih, rawl ei bet duh nak a mal thu an hmu. Curuanah kawlhang cu taksa mawi nak hrangah ei a tul.

Kawl hang thawn taksa mawi ter nak

Kawlhang cu harhdam nak hrangah a that tuk lawng siloin thangthar fala pawl mawi nak hrangah a tha zet mi a si.

1. Hmaifai ter dingah, zan ih hlan ah kawlhang kha at in hmai le hngawng ah hnawt aw. Minute 15 hrawng ret hnu tidai daite thawn kholh sal aw. Nitin zinglam veikhat zan veikhat tuah nak in hmai a fai ter ih, mi khal a no ter.

2. A mawi zet mi hmainei thei dingah, kawlhang cu amah lawng ei lawng siloin kawlhang a tel mi rawl hmanhman ei nak in biang a sen terih taksa a no ter.

3. Hricu nei tu pawl,

1. Kawlhang in taksa a fai ter vkein thling nak khal a tlak ter ruangah hricu pawl thaten a hlo ter thei. Kawlhang cu paten at in hricu parah ben in, minute 15 a rei tikah khoh in hmai sat nak a mal ter ih, hricu a hlo ih, hmasi khal tan gnawn loin taksa a mawi ding.

2. Khuaiti le kawlhang palw cu hmairim tu pawl hrangah sii thabik a si. Khuai ti hai khat le kawlhang hmin pakhat lain rawi aw. Cui rawi mi cu mit siar lo hmai hmuahhmuah ah hnih aw. Hnih hnu ih taksa sung a luh nak dingah minute 15 a rei hnu lawngah tidai thawn kholh sal ding. Cutivek in karhnih hrawng tuah nak in a dang lam na theih a theih ding.

4. Hmai a si um ih a rim tu pawl hrangah hmai tuah daan

            A ol zet mi tuah daan a si. Kawlhang cu at in a laifang ih a saa hlon in cui a laifang ih a ti thawn hmai cu hnih thluh hnuah minute 10 hrawng a rei ah tidai dai te thawn kholh fai aw. Thenkhat taksa pawl cu kawlhang hnih hnu reilote ah hmai rim pawl a zia deuh nan, malte a dum thei ruangah tih hlah. Ni khat hrawng a rei ahcun amah kel ah a cang sal ding. Hitivekin karhnih veikhat tuah nak in hmai ah a rim um loin hricu pawl tla a um ter lo.

5. Taksa car pawl hrangah hmaituah daan

            A car mi hmai nei tu pawl le thla tang caan taksa car nak hrangah tidai dat a um ter tu a thabik hmaituah daan a si. Cini hai 2 a tul. A phei zawng in sah tuk lo, paa tuklo ih at mi kawlhang a hman zet mi cu cini thawn rawi in, hmaipar ah kawlhang ti a cem tiang nuam teten hnih aw. Minute 20 hrawng a rei hnuah tidai daite thawn kholh fai ding. A tu vekin karkhat ah veithum hrawng tuah a theih.

6. Sam mawi nak, kawlhang sungah Vitamin A tampi a tel ruangah sam a tha ter. Sam rim siat nak le lu par ih lu muat suak nak cu kawlhang ti lu ah hnih nak in minute 50 hrawng a rei ah tidai thawn kholh in rim sia le lu a muat a hlo ih sam a dum.

Hminsin dingah,

1. Kawlhang lei tikah, a sen zet mi le a pum a hat mi hril aw. A sen deuhdeuh asile harhdam nak hrang that nak a pe tu betacarotene dat a tam deuhdeuh simai. A zawng a um tuk lo mi a rah pawl cu khan sungih ret tikah nithum ihsin karkhat sungah a hmin thei. A hring ihsin a sen ih a thleng mi a rah hnak in a kung par ih a sen mi a rah loh ih zuar mi a rah pawl lawng lei aw. A nem mi a rah kha ei hlah aw.

2. Kawlhang a hawng le sung ih sa a kop awk nak kha Lycopene a tel ruangah a hawng khal ei a tul.

3. Kawlhang cu olif siti thawn suan a sile lycopene dat in cancer nat pawl hrangah sii ah a tha.

4. Dawm le pangang that nak si tih nung za in luat dingah organic a ah pawl lawng hril aw.

Ralring dingah,

1. In le ei pawl cu harhdam nak hrangah sivai a si ti cu a hman nan a luan in ei lo ding a si. Kawlhang khal cutivek thotho a si. Linus Pauling Institute ih an nemhnget mi vekin, suan hrih lo mi kawlhang sungah Vitamin C hnakin tampi a tel nan suan hnu ah Vitamin C malte a tla tiin an sim. Mi pakhat cu nikhat ah kawlhang 12 a ei asile pumpi sungah rawl rial nak acid a suak tam ih pumpi thling thei nak, luak nak, lu nat nak le kal ih lungto um nak a cang thei.

2. Tha\ ruhcang thling pawl, libetna nat nei pawl cu kawlhang thawn a kaih aw lo. Asinan ei duh tuk asiahcun a mu hmuahhmuah hlon in malte vial ei a theih.

            A sen zet mi kawlhang pawlih a dang thawn bang loih a that tuk nak cu a tlun lamah kan thei zo. A thangso rero mi leilung tlun ah siilam theih kauh nak khal a thang ih harhdam nak lam a thlun tu hmuahhmuah in kawlhang cu siivai lam bawm tu phunkhat tiin an ei. Curuangah mah kiang nai te ih lak theih mi man ol zet mi kawlhang pawl cu nuam te loin ei ding asi thu kan runlo forhfial a si.

Add new comment

1 + 1 =