Mah te ding thei dingin zuam aw.

Mah te ding thei dingin zuam aw.

          Na tumtah nak thleng dingah mi pawl ih an mit zoh hlah. Na lamzin lawng zoh aw. Hlawhtlin nak ngah dingah minung pawl ih tong mi ngai hlah. Nangmah ih na tumtah mi lawng hnget zet in tuah aw. Nunram lamzin ah minung pawl nundaan ziaza kha zoh a tul lo. Na tuah tul mi kha ngam huai zet in tuah aw.

          Tamtuk na tong a si le a aa maw si tin an lo ruat ding. Na tong lo a si kha len a hngal tuk tin an lo ruat ding. Na hnih ringring a si le ziangruat thiam lo ti ruah na tong ding. Hni lo ih na um a si len a hngal aw ter tuk an lo ti ding. Mai nunram cu mah ten kan thei ko. Midang kha vatuah mawh lo in mah remcan dan ih kan um thiam kha a thupi.

          Mipakhat a tlaksiat a si len duhsak nak thawn kan ti thei tawk kan bawm ding. Kan mah kan tlaksiat a si le mahten ding thei sal dingin zuam aw. Ziangruangah tile kan thinlung vek midang in an nei lo tla a si mai thei. Mizaan ti mi cu a liam zo mi caan a si. Thaizing ti mi cu manglam vek a si lai. Tuini tuisun lawng hi nunram a si. Nunram ti mi cu kan nomawk khal le nikhat. Kan nomawk lo khal le nikhat lawng a si. A thabik dingin ziangtin kan pahtlang ding ti cu mai par lawngah a thum aw.

          A ding fel bik mi mipakhat na si hrih lo hman ah mah le mah bum aw hlah. Na zum nak hlo ter hlah, mai hrangih zum tlak bik mi cu mah pakhat lawng a si.