Mi Puitling si tikah

Mi Puitling si tikah

   A hlan ahcun pakhatkhat ka thinheng sile ruat awkta lo in vik tin ka sawn sal ih ka tuah kir cih nan tu cu ka hmur ih  a hung thleng mi tong hrekkhat le a kuai zik mi ka thinheng nak pawl caan khel in ka dolh sal thiam zo.  A hlan ahcun midang ih in relsiat sile it thei lo khop in ka tuar theu nan tu cu khat lam hna in a lut ih khat lam in a suak.

   A hlan ahcun ka thinlung ih tuar mi nat nak kha thupi ah ruat in mi aa pakhat vek in ka si dah nan tucu thinlung kha rei lo te cu cawl ter in thluak sawn kha thupit in ka ret. A hlan ahcun mipakhat kha ol ten ka zum nan tucu tikcuu le caan zoh thiam in ka zum thlang.

     A hlan ahcun duh le duh, hua le hua tin ka um nan tucu huat mi kha hnihsan in duh mi pawl kha thei lo vekin um thiam nak pawl ka nei thlang. Dik ten rel ahcun nauhak laiih thinlung ih a um vekih rak um lai nunram kha ka ngai. A sinan “Rome” thlen le “Rome” mi vek ih um ding timi tong a um vekin kum thawn khal a danglam awk thlang.

      Tipalh nak pakhat ciar in zirnak pawl in pe. A hrekkhat tipalh nak pawl cu a besia tukih hmasi ah an tang. A sinan cui hmasi pawl cu laksawng vekin lungawi zet in ka hruk asi. Ziang vek do nak pawl tuar in hi din hmun ka thleng ti langter tu hminsin nak pawl an si ruangah ka thupit.  Kum upat ruangih upa si hnak in theih nak kau ih mi upa si kha a tha sawn.