Milian (Minei nung) pakhat si dingah cun mai duhnak nunram thawn kilhim a tul

Milian (Minei nung) pakhat si dingah cun mai duhnak nunram thawn kilhim a tul.

         Veikhat ah Pafa te’i pahnih a ropi zet mi dawr pakhat an thlen tikah kum 10 hrawng a ti mi a fapa te in a pa hnenah ka rilrawng tuk ka pa; hmai ah sabek rawh an zuar, I leih aw a ti.  Ka fapa! pakhat ah ziangzat saw va sut hnik hen tiah a pa cun a ti. Cu tiin a fapa khal in sabek rawh tu a va sut ih sabek pakhat ah fangnga tiah dawr zuar tu in a rak sim.

         A fapa khal in “Ka pa, pakhat ah fangnga a ti. I leih thlang aw” a ti tikah cun a pa in a kut ah hnget zet in a ken mi fanghra te hnahkhat cu zoh phah in thinhar zet in a fapa a sim sal mi cu: sabek pakhat ah fangnga ee? Ei hrih duh hlah ka Fapa. Kan feh ding ka fapa ra aw. Na rilrawn le a dang ka lo do ding tiah a tiih a fapa ih kut hnuuk phah in cui hmun in an tlan.

         Cui hnu ah being hmuk pahnih fangkhat in a fapa pumpuar dingin a rak do. Hi tiin ku 15 a hung rei tikah hi dawr thotho ah an pafa  in an thlen tikah a fapa in a ei duh zet. Ka pa, khi tawk ah sabek rawh mi a um lai. Pakhat ten in leih aw a ti lala.  A pa in ka fapa pakhat ah ziangzat saw va sut hnak hen a tiih a va suh tikah a liam zo mi kum 15 hrawngah pakhat fangnga hrawng lawng a si mi sabek rawh cu tu ah cun pakhat 50 a si zo.

         Ai….Ka pa a khung daan cu! Pakhat ah fang 50 a ti. Ka Fapa…50 si lo in 5000 a si khal le tu ah cun na ei duh mi pakhat lawng si lo in pahnih in ei aw tiin a Pa’i a ti tikah a fapa in mangbang zet in hmmmm! A hlan ka ei duh ka lo ti ah hmuah I leih lo ih tu ah hmuah pahnih rori I do ding maw ka pa a ti tikah Ka fapa a hlan ih ka rak lo do nak cu kha lai ah ka pahnih in harsa zet ih nunram kan pahsuak rero lai ah ka kut sungah fanghra ca hnahkhat lawng a um. Ka fapa, kha lai ah sabek rawh pakhat fangnga in ka lo do thei ko nan ka kut sungih a taang mi fangnga ca hnahkhat in kan pahnih hrangah thaizing hrang kan tul mi fang, siti, cite pawl leinak ding a daih lo pi ka fapa!

     Curuangah ka lo do duhnak suup hram hram in being hmuk pahnih ah fangkhat man lawng ka rak lo leih. Tu ah cun a hlan vek a sin awn lo. Kan liam deuh thlang. Ka fapa na ei duh mi le na tuah duh mi pawl tu ah cun a zaten ka lo tuah sak thei ka fapa a ti. Thuanthu cu hi zat a si. Kan nih khal mai nunram cu mah le mah rinsan awknak thawn kan khuasak tikah duh mi, tuah duh mi, hruk duh mi, ei duh mi hmuahhmuah in thuanthu sungih a pa vek in duhnak suup a tul. Mai nunram din a har zet caan ah paisa nei, milian pawl vekin thimawk a tha lo.

         Tui a lian mi pawl cun rawl 10,000 man an ei thei. Angki zuunkhat 50,000 man an lei thei. Cu vekin kan nih pawl tla ringring ti cu a si lo  nan milian pawl vekin rawl 10,000 man lei a theih. Asinan, man cio cio a bang aw ko nan cem daan a bang aw lo. Paisa tam nei tu milian pakhat ih tuanman thawn ngah mi paisa tingkhat cu minute sungte ah a cang thei ko nan kan tuan man thawn ngah mi tingkhat cu minute sungte ah a cang thei lo ruangah a si.

Netabik ah……

         Sabek pakhat fangnga thawn ei hlah: 50 man a si lawngah ei aw tiah sim ka duh. Hi mi thu kan zoh a si le mihlawhtling le Puitling dinhmun ih um kan duh a si ah cun a hmaisa ah kan duh mi kan sup thei lawngah kan tumtah miah kan thleng thei ding asi. Curuangah kan tumtah mi kan tlen hlan ah maiduh mi sup thei dingah zuam cio uh si.

Photo - Google image

ref - mymom