Mitha maw misual

Mitha maw misual

    nupa pahnih te cu an thit awk ih si thok in an toawk theu. Tawhawk caan a tam tikah mino pa cu a beidong thlang. Nikhat cu a nupi thawn an to aw ih thinbang zet in inn hmai ah to phah in innhmai in kumtar  zo mi nupa tei pahnih innsung ihsin hniphah in an ra suak kha a hmu.  Cule a nih cu nitin cui puter le pitar  nupa tei pahnih cu a thupten a zoh hliah theu. Nitin in cui putar tei nupa cu zinglam ah leng an suak ih kutkai aw in an feh. An tlung lam cu putar pa in Taung (kutkhai)  kensak phah in pitar nu in putar pa ih baan kai phah in nuam  zetin dawr in an ra tlung kha nitin deuh a hmu tam ruangah mino pa te cu nikhat cu a um thei nawn lo ih putar pa amah lawng inn hmai ih a um laiah a va cibai ih a theih duh mi kha a sut thlang. “ Ka pu tei nupa ka lo zoh daan ah ziangtik khal ah duhdawt aw zet in nan nuam dan, kan nih cu kan thit awk ihsin kan to aw ringring . Ka pu le pi nan nih cu buai lo in nuam zetin ziang tin nan um ka thei duh ih” tin a sut. Putar pa in “ Nan nih nupa cu mitha tuk nan siruang ah nan to awk. Kan nih nupa cu kan tha lo ih buai lo in tu vekin rem aw ten kan um” tin ati.

        Mino pa cun putar pa ih a sannak kha a lungkim lo ih “ ka pu khal le ka thei duh ngaingai ih ka lo sut mi i capo hlah” tin a ti ih putar pa in hniphah in “ hi tin a si mitha pawl cu sual nak an nei lo minung ti mi cu an buai theu ih mah lawng tha le dik in an ruat aw ih midang parah kut zung an khih ih sual an puh thlang, pakhat ih sual nak pakhat in a sawh ih mai sual nak cu an hmu nawn lo. Kei mah hi mitha midik tin an ruat aw ruangah tuvek a can nak asi aw.... kan nih nupa cu pakhat khat a cang hman ah kei hi ka tha lo si hi tin kan ruat hmasa theu ih a mah a sual tin kan ruat nawn lo. Mah le mah kha sual a puh awk thlang. Kei mah ka tha lo ka sual, ziang si ka rem awk tul timi ruah nak pawl thawn rem awk lo in kan ruah tikah kan nupa buai nak timi kha a um lo thluk in a mal thlang.

    Kan mah thawn pawlkom aw tu khatlam minung kha thlalang pakhat thawn a bang aw. A mah rem that hnakin kan mah rem that awk kha a ol sawn.  A mah kha tul mi rem sak hnak in kan mah le mah  rem awk kha a ol sam sawn. Midang cun kan ttong kha an paih lawng ah an ngai ding.  Mah le mah cu danglam cuang ih sim rero a tul nawn lo. Curuangah mitha na tuan pei maw, misual na tuan pei maw ti cu ruah tul mi thil asi.