Na zuam rero lai maw? ( nun simnak ca)

Na zuam rero lai maw? ( nun simnak ca)

Na zuam rero lai caan ah raltha zetin um aw.

Na tlak siat caan ah, ral tha aw.

Na hlawhtlin caan ah, daiten um aw.

Na zuam rero maw?

       Si le cu tuar men aw. A zuam rero tu pawl a dotu mitha lo pawl timi cu hmuntinkim ah an um.  Cumi pawl zuam in do ve hlah. Mai feh nak lamzin a sual thei theu. Mitha lo pawl cun that lo nak zin vekin an peh zulh ding asi.  Hih na feh nak lamzin ih hnawm pawl tiang sar ding cu na hnatuan asi lo.  Thin sau nak tuar thei nak cu hlawhtlin nak ih a thawhnak hmai hruai asi. Na harsat nak pawl kha a mawi bik mi mithmai tha thawn pah in zuam hrih aw. Hlawhtlin nak cu a zuam tu pawl hrang ih ban theih ah aum. Leitlun har nak pawl a pah rero tu minungpi pawl zangfahnak  thawn an thatnak hmuh sak aw. Hmunkip ah an tuah vekin an hmu sal theu.Thinlung tha nei awla tuar phah in zuam aw.

Na tla sia maw?

     A sile cu raltha aw.  Hmuhsuam nak pawl thawn do nak lak ih tiawkternak pawl lakah Kiosa vek in raltha aw. Minung timi cu kanmah hnakin an thiam asi le iksik nak cu um daan asi.  An mah hnakin na  thiam lo deuh a si le cu an lo zohsuam ding. A sinan an mah hnak in a letsawm ih thiam tu pawl cu an upat ih an cawng theu. Hih thil um dan khal thei cia aw. Nisa theh le daihnem a rat caan a um vek in thlilsia theh le zilthli a ra theu cu mi cu a dik rori asi.  Tlaksiat caan a cem in a ra tengteng ding mi cu hlawlhtlin nak asi. Cui hlawhtlin nak cu na ralthat nak mithmai pan te thawn na hmuak ko ding.  “ Vui ” kai ding ih a feh tu mipakhat in lamzin ih a bo rero tu Uico kha lung thawn a deng rero sile “Vui” kai ngah ding caan a cem ding asi.  Curuangah a manhla zet mi na caan pawl kha hlawnthlinnak hrang lawngah cem ter aw.  Na tlaksiat nak pawl kha ralthat nak pawl thawn co aw.  Sile co nak pawl a tam nak leilungpi kha tha ten na pahtlang thei ding asi.

Na hlawhtling zo maw?

    A si le cu daiten um  aw.  A tawk mawi puitling tu minung pawl cun thil ziangziang khal an ruat nawn lo.  Mifim, mithiam tam sawn pawl khal daiten an um  theu. Lungman khung thawn a bang aw mi tazin par (pangpar) vek hmunkim ah hmuh theih a si nawn lo.  Bel sungih a khat mi tidai cu cang rero lo in dai ten a um vek in na hlawhtlin nak kha thaten a lo lungawipi tu pawl an um ding.  Nautat nak pawl le hmuhsuam tu pawl khal an um ding. Cupawl kha nangmah dinhmun in thupit a tul lo. “Thlapi” kha Uico in a bo cu a dan asi. Ziangkim kha dungtun men aw.  Hih caan ah a thupi bik mi cu hlawhtlin nak kha kilhim thei ding asi.  Hngalzet ih mai dinhmun hngilh lo le a hram cat lo ding khal a thupi zet. Hngal zet ih dinhmun hngilh tu pawl cu nasa zet in an tla sia leh ding. Zianghman a hmun ringring lo ding. “Thlapi” vang thei ding in “Ni” a liam a  tul vek in “Ni” tlang thei ding in “Thlapi” a hloh caan a um khal hngilh hlah.  Thal, Fur, Thlatang a thleng awk vek in ziangkim khal a thleng awk ringring ding asi.  Hih leitlunpi ah ziangtik hman ah a thleng aw lo mi thil pakhat a um cu mi cu “Thleng awk nak” ti mi asi. Tikcu a that lo le mi aa vek in um aw. Curuangah zianghman a hmun lo mi leitlun ah titerawknak pawl thawn nung hlah.  Thianhlim nak, Thinlung that nak, Daih nak pawl thawn nung sawn aw. Tiso vek in a hlo ding mi thilri pawl par ah hngal in dinhmun thei lo in nuam aw hlah.  Sankhat sung ah na tuar har leh ding.  Curuangah na hlawhtlin nak kha  man nei zet in kilhim thiam aw.  Hi leitlunpi hi a heer aw ti kha ziangtik hman ah hngilh hlah. Hi mi ca hi nitin kan nunram hrang ih kan hngilh theu  mi man salnak dingah kan run tarlang mi asi.