Nauhak pawl an centet lai in nunsim an tul nak thuanthu tawi

Nauhak pawl an centet lai in nunsim an tul nak thuanthu tawi

          Veikhat laiah mi neinung zet milian pa pakhat cu mifim pa pakhat kha a fapa ih a tha lo mi a ziaza pawl hlo thluh ko zirh sak dingin a dil. Curuangah mifimpa cun milian pai fapa kha hmuansungih feh dingah a hruai.

          An feh rero lai ah mifimpa cu rinlopi in a dingih nauhak pate cu zin kap ih um hrampi fa tete kha a phoi ter. Nauhak pa cun cui hrampi te cu a zungpi le a mehtawk a kut zunghnih te cu hmang in a phoi. Cu theh in mifimpa cun cu ai ih tumdeuh mi hrampi cu a phoi ter. Nauhak pa cu a vorh lam kut thawn malte a tha a tang ih hrampi cu a phoi thei. Hrambur kha a hmuh in “Tu hi hrambur hi phoi aw” a ti. Nauhak pa te cun phoi dingah a kut hnih in a tha zate a suah ih a hmang. “Tu hi thingkung hi phoi hrih aw” tin mifimpa cun thingkung pakhat a hmuh. Nauhak pa cu a kut kuthnih, a ruang, a kee a tha zaten hmangin phoi a tum. Asinan cui thingkung cu a hnin lo. “Phoi a theih lo” tin nauhak pa cun phoi phah in bang zet phah in a sim.

          “Ziaza tha lo pawl khal kha ti vek a si” tin mifimpa cun a sim. A fate lai ah cun phoi a theih ko nan an thanglian tikah a hramhlo dingin phoi a theih lo” tin mifimpa in nauhak pa te cu a zirh. Mifimpa ih a zirh nak in nauhak pa cu ziaza tha lo a neih mi pawl kha a thleng thluh.

          Hi thuanthu ih in zirh duh mi cu a tha lo mi ziaza le tidaan pawl kha nauhak an thanglian tiang hngakhlah. Cupawl cu na uk thei laiah rem aw. A rei vevo le cui ziaza thalo pawl in nangmah kha an lo uk leh ding si.