Nunram ah ziangziang na tuah khal ih hlawhtlin na duh len a thupi bik mi (4)

Nunram ah ziangziang na tuah khal ih hlawhtlin na duh len a thupi bik mi (4)

          Hlawhtlin nak ti mi ah tuah dan a um. Ka nauhak laiah kan inn kiangah cauk sannak dawr pakhat a um. Cui dawr hmin cu tu tiang ka thei lai. “Sein Shwe Phyo” ti a si. Thaal tlawngpit caan a si le cauk ka sang ringring. Caauk phunkim pawl, Tuluk thuanthu cauk pawl a kim thluh. Culaiah cu tuvek in phone ti vek internet ti vek a um hrih lo.

          Cuti cauk sangding ka feh caan le ka hrihruai pawl thirleeng an to theu ka hmuh tam tikah nauhak ti cu ka rak daw ve. Kei tla thirleeng te to phah in cauk ka va sang sehla ka mawi tuk ding tin thu ka ruat. Cutiin inn ah thirleeng to inzirh uh tin ka dil. Ka vanthat nak cu kan inn ah hlanlaipi ta thirleeng te pakhat a um cia. Cutiin ka pa in thirleeng to cu i zirh thok. Zaan lam a kim le kan inn hmai lamzin par ah kan pafa in thirleeng pakhat thawn kan buai.

A thok cu feh thei dingin ka zir rero. Ka to thok zik ihsin ka tluk. Ka tluk tamtikah ti daan ka thei. Neta cu ka zir hlan ah kiudam le khuk dam tivek ka hruk hnu lawngah thirleeng par ka kai. Cupawl ka hruk khal len ka tluk cun a naa thotho. Hrekkhat hmasii pawl tla cu tutiang a um lai. Sinan kei khal ka thiam duh tuk ve. Cu tin ka tluk khal len tluk seh tin ka to. Cutiin thirleeng to ka thiam lan ta.

          Cutin hlawhtlin nak khal le hivek thawn a bang aw. Nunram ah ziangziang tuah khal le hlawhtlin na duh a si le a thupi bik (4) a tul. Ziangpawl a si ti le

 “Purpose” ti mi “Tumtak nak” a si. Tumram pakhat cu fel fai zet ih na neih a tul. Theh len midang ih an lo khiahsak mi si hlah seh. Mah ten duh taktak mi a si a tul. Caauk sannak dawr ih thirleeng thawn ka feh duh cu keimah ih tumtak nak a si.

1.  “Motivation” timi “Duhnak” a si. Mah le mah pekawk a tul vekin a lengin khal kan ngah thei. Thirleeng zir nakih tahthim nak kan zoh a si le thirleeng to ka thiam cu keimah ih ka thinlung duhnak a si vekin kiang ihsin in kilkhawi tu ka pa ih thapek nak khal a tel.
2.  “Preparation” timi “Timtuah nak” a si. Ziangziang kan tuah khal len a tha bik dingih timtuah nak neih tingring thiam a tul. Thirleeng to ka zir lai ih humhim nak pawl ka hruk thawn a bangaw. Tlunawn lo dingin a si lo, ka tluk. Asinan ka tluk a si khal le naa tuk ih khongaw lo dingin le zirthei sal dingin a si.
3. “Tenacity” timi “Zuam nak” a si. Ziang a si khal le tu tuah cih, tu hlawhtlin ti cu a um lo ti tluk a si. Zatek 99 in cu caanpek a tul. Keikhal tluk ding, taksa naa ding ka tih a si le thirleeng to ka thiam lo ding. Pakhat kan duh a si le pakhat pek cu thil um dan a si ko.

Hi hleiah kan nunram taktak ah hlawhtlin nak cu “Luck”ti mi “Vanthat nak” le “External Factors” timi “Lenglam thuhla” pawl thawn khal a pehpar aw lai. Asinan cupawl cu kan mai uk thei mi le a si fawn lo.

Kan tuah thei mi cu tumtah neihding, duhnak neih ding, timtuah nak neih ding, zuamnak neih ding ti mi pawl thawn kim dingin kan zuam ding kha asi.

          Kei in cu hi tuahdan cu “PMPT” tin a ol zawng in ka hmin sin. Caa siar tu zaten hrangkhal ah a thahnem dingtin ka zum.

Casiar zate par ah tampi lungawinak kannei.