Nupi pawl in pasal pawl par ih thlun dingmi thil paruk.

Nupi pawl in pasal pawl par ih thlun dingmi thil paruk.

Tuitum cu nupi pawl lam in an mai pasal parih an thlun ding mi, an tuah ding mi pawl kan run tarlang ding. A cemtiang in rak siarsak dingah zaangfah kan lo dil.

1.Na pasal kha upat Tihzah aw.

       Inn sangpa asi mi na pasal kha upat aw. Nangmah in na upat lo ahcun na sungkua na innpa na venghnen pawl khal in an upat lo dingih ziang khal ah an siar lo ding.

      A mah ah tlin lo nak le tulsam mi a um pang khal le a tulsam mi kha khah silh sak aw. ziangziang a si khal le Innsangpa pakhat a si ruangah na upat tihzah ding a tul. A mah kha upat aw.Man hla zet in ruat aw.

    Inn sang ah pakhat le pakhat zum awk ih upat awk ding hi a thupi. Curuangah na pasal kha awkaa hrang  thawn biak tahran in kawk ciamco ih nauhak pakhat vekih pehtlaih hlah. A mah kha upat aw..

2. Innsang hrang ih a zuam nak kha theihpi aw.

     Innsang ih sumdawn nak a that khal ah siseh that lo khal ah siseh Innsang kha a zoh ih a hoha, innsang hrangah tin a zuam rero                                                                                                               mi kha theih pi aw.

Sumdawn nak a remcang lo bet ah tu le tu a sual na hawl, na mawhhluk ih a hnaset dingih na tuah asi le a remcang lo ding.

   Zo vek innsang pa khal in innsang kha farah zet in re duh ding maw si. Leitlun ah zuam nak tin te khal in an puitling lo. Hi mi thu kha na theithiam asi le inn sungkua hrangah rawl puar ten pekin innsungsang hrang ah a zuam rero nak kha theih sak aw.

    Porh a tul le porh aw. Lawm a tul le lawm aw. A mal bik in a nih cu innsang pa tha pakhat a si kha theihpi dingah  pelhsolh hlah. Hi mi hi a thupi zet.

    Na pasal kha na porh na lawm ruangah na si nak a tla cuang lo ding. Hi cu a tha zet mi nu, a fel mi nupi ih tuah dan pakhat asi.

    Na theihpi nak kha a mah ih thazang asi ter. Nithar kha pah ngam dingin a thazang pawl a cak ter ding. A zuam nak kha theih sak dingin hngilh hlah aw.

3. Na pasal par ah tuanten (ol ten) mawhthluk hlah.

Leitlun ah ziang ziang khal ih mi famkim tu an um lo. Na pasal khal minung sung ih minung a si ruangah  voikhat voihnih ah sualnak a tuah mi tla um thei.  Pakhat khat sual nak a tuah pang sile a mah kha mawh thluk, sual hawl, hnuhsuam vek in tuah hlah. Cui sual nak sung ihsin zir thiam dingin tuah sawn aw. A mah kha tungding sal aw.

     A mah kha buaipi hlah aw. Kawk hlah aw. Neh hnu hi vek ih sual nawn lo ding in lam zin hmuh aw. Na pasal in na bawm nak atul.

      Mipa tamsawn cun hnaset kha an tuar thei lo. Ziangtluk in an duh khal le phun tam tuk ahcun na kiang ihsin tlan dingin an taw a rit lo a si.

     Vun rem sal a ngah nawn lo mi sual  nak asi hman ah nangmai lam in thinsau tentuar in thlum tak in biak aw. Na pasal parah ziangtik hman ah mawhthluk tuan hlah.

4. Mi dang thawn tahthim hlah

Na pasal kha midang thawn ziangtik hman ah tahthim hlah aw. Mi pakhat kha midang pakhat thawn tahthim in an sual sim kha a tha lo.

    A hleice in innsangah hi mi kha ralring nak tumpi neih ih ruah a tul. Mi pakhat le pakhat an bang aw lo.

     Mi tin in hlawhtlin nak hlawh sam nak ti mi a um theh.  Na pasal hnenah mi dang ih neih lo mi that nak a um thei.

      Curuangah “ Khi pa khi ziang asi, hi pa hi ziang asi. Hman na tlak lo. Ka lo neih hi ka sual” cu vek ttong pawl kha na pasal kha ti ngah pang lo ding in ralring aw.

     Midang ih nunram taktak kha nang na thei fiang lo. Na pasal kha midang thawn khaikhin kha a mah ih sinak a hngal nak pawl kha na zawmtai vek ah acang.

      Na par ih a ret mi a duhdawt nak pawl khal a mal thei a si.  A nuam mi innsang ti mi na duh taktak ahcun nangmah in thaten na sak atul.

5.  Pasal pawl ih thlin lo nak pawl kha sungkua, rualpi pawl hnen ah sim hlah.

      “Nupi pasal timi cu Lei le Ha” vek ti asi. Nupa timi cu ziangti hman in then a ngah lo. Vorhlam kut le Kehlam kut vek asi.

      Kehlam kut nat le Vorhlam kut in sii a hnih sak vekin vorhlam kut a nat khal le Kehlam kut in sii a hnih sak. Cu vekin Nu le Pa ti mi cu thisa khat pumkhat an si. A mah na nat ter kha nangmah le nangmah daan tat ih hmuh sauam thawn a bang aw.

  Na pasal ih tlin lo nak kha nangmah in na theih le a tawk zo. Na sungkua pawl le na rualpi pawl hnenah sim hlah aw.  Na pasal ih tlin lo nak pawl midang in an theih khal le na hrang ah ziang hman a tangkai lo. Hi vekih tuah cu na si nak pawl le nangmah bulpak zuar aw thawn a bang aw.

   Hman te cun na pasal ih tlin lo nak kha midang in an rel hman ah nangmai lam in na hup sak lam ding. Na kilhim sawn ding. Cu mi kha Nupi tha pakhat ih tuanvo asi.

  Cu ti silo ih nikhat hnu nikhat a tlin lo nak pawl lawng midang hnen ah na zuar rero sile nikhat na hnen an ra thleng sal ding. Nu pa timi cu pakhat le pakhat thu kilhim sak awk ding asi kha theithiam aw.

6. Na pasal kha ngaihsak aw.

     Na pasal ih kut sih mi cu mi dang an si lo nangmah na si. Na pasal ngaihsak ding tuanvo cu nangmai hnen ah a um. Innsang nu tuanvo kha thaten tuah aw. Ei inn le rawl suang ihsi thok in ngaihsak aw.

     A cang thei a sile a leng rawl hnakin nangmah in inn ah suan sak aw. Ei inn thupit lo mipa an um lo.  A sinan a mah kha caan pek thei lo ding tiang in buai hlah.  Na pasal kha na duhsak nak a tul.

    Na pasal thawn nel aw ding in um aw. A tha mi, mi pawlkom nak in innsang nuam kha a thupi. Hi mi tidaan pawl cu um lo theih lo an si lo. Innsang nuam ding in Nupi lam ih thlun tuah ding mi tampi lak ihsin mal te lawng la in kan rung tar mi asi.

Ca siartu zate parah Pathian thlasuahnak lo pe hram sehla, hi ti daan vekih kan innsangah nung thei dingin zuam sin uh si. Innsang a nuam le kiangkap veng hnen kawhhran a nuam vekin kan khua le ram ah thin nuamnak a suah ter thei tu si khal ah zuam sin uh si.