Nupi Thathum Pawl ih Man

Nupi Thathum Pawl ih Man

             Sirah sung khal ah nupi thathum pawl ih man cu a tang lam vek in a lom a si. A fel ih upat tlak a si mi nunau pawl cu an mawinak kha a tam vivo ding. Tisa lam duh nak nei lo mi an thlarau ih huham khal a hlo thei lo. Bawipa Pathian ih in rem sak mi hmun, ni a suah ih a mawi zet mi tleu vek in nun can ziaza tha a nei mi nunau pawl ih mawi nak cu Biakinn ih vang mi meisa bang tuk in a tleu a si. Nun can mawi mi nunau ih thinlung cu Pathian ih thu kham a thlun tu a si ih, kumkhua a hmun mi lungto par ih hram bun vek an si. (Sirah 26:16-24)

        Nun can mawi thawn a khat mi nunau cu an man a hlo dah lo ding. “Nupi thathum khi ziang tluk in ngah a har. Ruby lungvar mankhung hnak in man a nei deuh. A pasal in a rinsan ih ziang tik khal ah a pasal cu a zon zai lo ding. A nun sung hmuahhmuah a pasal parah thil ttha a tuah ring ring ih siat nak a tuah dah lo. A dam sung in a kilkhawi” (Thufim 31: 10-13) Nupi thathum pawl ruangah an pasal ih nun nak kha a hahdam ih an lungawi ti cu a hmaan mi a si.

         “Nupi thatthum ih pasal cu a thin a nuam. A kum khal let hnih in a sau bet. Ziaza mawi mi nunau cu a pasal parah a lung a awi. A nun nak tla a nuam. A ttha mi nunau cu, a sunglawi mi lak sawng a si. Cui mipa cu mifarah le milian a hril lo. A thinlung a tha ih a lung a awi ring ring thei. (Sirah 26: 1- 4)

        Thin lung nem mi nunau pawl cun an pasal pawl tthat nak lam ah an thleng aw ter thei.“Cui nunau parah thinlung daiter thei mi tong kam a hmang thiam tu a siih nun lungawi nak le zaangfah nak a nei a si le a pasal cu midang ih pasal thawn an bang aw thei lo. Cui nunau a nei tu cu a man khung zet mi hlawn thil nei tu a si. (Sirah 36: 25-26)

         Clovis in Clotida timi mi zaangfah thiam tu Siangpahrang Bawinu a nei. Cui siangpahrang bawinu cu Christian zum nak nei tu a si ih biak nak lam ah a tak tak in a zum tu a si. Siangpahrang kha a upat ih tuar thei nak khal a nei. Mi zaangfah nak tak tak a nei. Rinsan tlak khal a si. Siangpahrang Bawipa cu a hlan ah Christian mi a si lo. Clotida Siangpahrang Bawinu cu nupi thathum a si ih a nun nak ah nun cawn tlak in a um. A pasal par ih a ret mi tuar thei nak le duhdawt nak kha mi pakhat in a hmu ih a mangbang ti a theih tikah cu nu in “Keimah in Siangpahrang Bawipa ka duh ih ka duh nak le ka nu le pa taan san in ka ra ih a tu ka um nak cu ka pasal inn asi. A tong mi cu ka ngai ding a si. Ka duh ding tin a sim. Cunu ih nun can tha ruangah Clovis Siangpahrang cu neh hnu ah Christian pakhat ah a cang. Clotida Siangpahrang nu cu Clovis Siangpahrang hrangah lei thieh lo mi lungman khung vek a si.

         Mithianghlim Paul in “A leng lam mawi nak, nan sam tuah dan, nan hlawnthil sui le ngun thawn nan thuam awk dan le hnipuan hruk dan in mawi nak hawl hlah uh. Pathian ih mithmuh ah a sunglawi bik mi mawi nak tak tak cu nana thinlung sung ih a um mi, a tar thei lo mi lungnem nak le thindaih nak sawn a si. Pathian a tihzah tu, khua hlan nunau Pathian ah ruahsan nak a nei tu pawl ih mawi nak cu an pasal thu an ngai nak ah a um a si. Sarah cu cubangtuk a rak si. Abraham a upat ih ka Bawipa tin a ko. Nannih tla thil tha nan tuah ih tih mi ziang hman nei lo in nan um ah cun Sarah ih fanu nan si.” (1Pit 3: 3-7)

         Asinan, nunau sualral pawl cu tih an nung. Sirah ah hi tin a ti. “Nunau sual pawl hnenih um hngak in cakei le rulhreng thawn um tlang kha thin a nuam sawn.” (Sirah 25: 23)

          Dai ten um thiam lo tu caw le nunau sual pawl cu an bangaw. Amah a ngah tu mipa cu tur a nei mi varngen tawpir kai vek an si. (Sirah 26:10)

Nupi thathum pawl ruangah inn sung sang ah that nak tampi a thleng ter ih nunau sual pawl ruangah inn sungsang ah harsat nak a thleng ter thei. Christian nunau pawl cu nupi ttha an si ih nun dan lam ah ttha zet ih an um ruang ih cawi sang ding a sile, thluasuah co mi nun nak cu din suak a si ding. Inn sung sang ah hnatuan a neh mi rintlak a si mi mipa an um vekin, nupi thathum khal tampi an um ve. An mah ih pek awk nak, ningzah nak, mai hrang ruat lo in, midang hrang ih an pek awk nak le duhdawt nak pawl cu pawlpi in a cawi sang ring ring a si.

Ref.(နီလာရိုင္း၏ သက္ဆံုးတိုင္ စာအုပ္မွ မိန္းမျမတ္၏ တန္ဖိုး)