A rem cang leh ko ding

A rem cang leh ko ding

          Veikhat laiah Hudson ti an kawh mi Sayagyi pakhat a um. Nikhat cu a thih zik teah mi pakhat in “Sayagyi.... na saya cu zo saw” tin a sut.

          Cutikah a nih in “Tu cu a tlai zo. Ka thi thlang ding lo sim nak caan ka nei nawn lo” tin a sim. Asinan a sut tu pa cu a beidawng cuang lo.

          “A hmin te lawng in sim aw a ngah ko. Na dam lai si. Thaw tla na thawh lai. Tong tla na tong thei lai. A hmin te cu in sim thei ko si” tin a ti.

          “Hi cu sim ding a ol lo. Ziangah ti le ka Saya cu thawng sawm lai an um. An hmin te lawng ka lo sim hman ah a thlathla a kumkum in ka rei ding” tin sayagyi pa cun a sim.

          Asinan a sut tu pa cu a beidawng lo. A si le sayagyi mi pathum te tal cu in sim ko aw” tin a ti sal. Cutikah sayagyi in “Sile ka lo sim ding. Ka saya hmaisa bik cu rukru pakhat a si.

          Veikhat lai ah kei cu nelrawn ah lamzin ka hlo. Cutin ka feh vivo ih khua pakhat ah ka thleng. Ka thleng caan cu a tlai tuk zo ruangah dawr pawl khal an khar. Hotel pawl khal an khar zo. Zinpi pawl ah mi zo hman ka hmu nawn lo.

          Kei khal mi pakhat tel ka hmu pang pei maw tin ka hawl. Hmun khat ah inn pakhat kha lei thluai in lut ding ih lei a lai rero tu mipakhat ka hmu. Kei khal in zaan khat riak nak khui tawk ah ka hmu thei ding tin ka sut.

          Cutikah a nih in kei cu rukru pakhat ka si. Nang cu mifel fai sayagyi pakhat na bang. Na kor hruk le na um daan zoh in theih na theih. Tui zaan riaknak cu khui tawk hman ah na ngah nawn lo. Asinan nang cu rukru pakhat thawn hmunkhat ih na um thei ding a si le ka inn ah in thlun aw a ti.

          Mal te sung cu ka laklawh. Cu theh in ka ruat sal ih rukru pakhat hman in keimah in tih lo ah cun kei in rukru cu ziang ah saw ka tih nak dingsan. A ngaingai ah cun a nih in kei cu in tih ding a si sawn.

          Cutin kei khal rukru cu ka thlun ih a innah thlakhat lai ka um. A nih cu rukru a si ko nan kom a nuam zet. Cu tawkah zaan tin in in ra sim theu mi a um.

          Cumi cu “Sile kei hnatuan ka feh thlang ding. Tha ten cawl hahdam aw. Pathian bia, thlacam, nang khal na hnatuan tuan aw” tin in ti. A ra tlun a si khal le kei in “Tuizaan teh ziang pawl na ngah” tin ka sut. Cui ka sut tinten in sim theu mi te ka duh zet.

          “Tuai zaan cu ziang hman ka ngah lo. Asinan thai zing le ka zuam sal leh ding” a ti. A um dan cu mirinsan ding nei lo, ruahsan nak nei lo ih a um lai veikhat hman ka hmu dah lo. Thlakhat sung rori zianghman ngah lo in a ra tlung. Asinan a nuam aw thotho.

          “Thaizing le ka zuam sal ding. Thaizing le a simpi ko ding. Kei khal thla in cam sak aw. Hitluk zangfah za minung hi bawm ding ah Pathian hnen thla in cam sak aw” tin in ti theu.

          Cutin kei khal rukru thawn ka tong awk hnuah Pathian thu kha kumtampi ka zuam. Asinan ziang hmuh theihnak hman ka ngah lo. Ziang hman a suak lo. Vei tampi ka zuam tinten thawh tlin nak ka hmuh lo tikah ka tha a nau ka bei a dawng zet. Ruahsan nak hlo thluh vek in khal ka um.

          Hi tha hnem lo santlai lo mi zuam rero khal a za ten ka ban san ding tin tla ka rak ruah. Pathian khal a um lo. Hi thlacam nak ti mi khal mi aa hnatuan a si. Pathian thu ruat ti mi khal thil sual pi a si. Hi ti pawl khal in ka ruat.

          Cutiin nikhat cu kei in rukru pa ih in sim mi kha ka mang suak. “Thaizing le ziang kim a remcang leh ding” timi ttong fang te a si. Cutin nikhat hnu nikhat ka zuam vevo. Rukru vek minung hman in ruahsan nak, zumnak pawl a neih a si le kei khal a mal bik nikhat te cu ka zuam hrih a tul tin a sim.

          Asinan nikhat ka zuam. A ngah lo. Asinan rukru ih a sim vek in thaizing cu a ngah ko ding. Ka zuam san hrih ding ti mi ttongte kha ka hna ah ka thei ih nikhat hnu nikhat zum nak thawn ka zuam bet hrih. Cutiin nikhat ah cu ka duh mi thlacam nak ka ngah. Ka ngah veten ka um nak hmun ihsin hmuh hla zet ih rukru a um nak kha ka ruahsan ih ka khukbil in upat nak ka pe. Cui rukru pa cu hmaisa bik ih ka saya a si.

          Pahnih nak ka saya pa cu uico pakhat a si. Nikhat ah ti ka hawl zet. Curuangah tiva kiang ah ka feh. Tidai ka in zikzawng ah uico pakhat ka kiang ah a ra thleng. Cui uico khal cu ti a hal hmel zet. A nih cu ti hal zet in ti in dingin tiva sungah a lu a hnim.

          Ti sungah uico pakhat a ra pok ah a ruah ih a mai thlam khal a tih. A bo ciamco. A bo tinten ti sung ih uico khal in a rak bo ve. Curuangah a nih khal a bo bet ciamco. Asinan a nih cu thu pakhat khat a namhnget a bang. Ti le a hal tuk zo. Cutin a nih cu ti sungah a dop. A dop tikah a dang uico pakhat ti a ruah mi cu a hlo. A nih cu ti khop tek in a in. Ti a leuh. Thaal caan a si. Cu mi cu kei in ka rak zoh rero.

          Thu pakht ka thei suak. Pakhat khat kha kan tih tuk a si le cu mi sungih ciahawk ding ti mi kha a si. Pathian thu ka ruah tikah theih thiam a har, a thuk, a thuk mi theih thei kha ka thleng thlang ding ti cu ka thei ka hmu.

          Asinan cu mi tinten uico in a thlam a tih vek in kei khal ka tih. Cui hmun feh ding lawng a si thlang. Asinan tih phah mangbang phah in dung ka sip sal theu. Neta ah cun uico ih thilcang mi kha ka mang sal.

          Uico hman in tih nak kha a pah suak, kei ziang ah ka pahsuak thei lo nak ding san. Cutin nikhat ah theih lo nak hmun ah ka dop. Ka dop theh veten ka theih lo nak kha a hlo ih dung ah a tang. Curuangah uico cu pahnih nak ka saya a si.

          A pathum nak ka saya cu nauhak te pakhat a si. Veikhat ah khuapi pakhat ka thleng ih nauhak te pakhat ka hmu. A nih cu meisa van cia mi phayawngdang te a keng. A nih cu Bali ah a feh. Kei khal nauhak kha ka capoh duh ih “Phayawngdine cu nangmah ten maw na vang?” tin ka suh ih a nih in “Aww” in ti.

          “Phayawngdine cu na vang hlan ah meisa a um lo. Nang mah ih na vang lawngah meisa a pot a si ruangah cui meisa cu khuitawk in a ra ti na thei ding curuangah phayawngdang meisa cu khuitawk in a ra” tin ka sut.

          Cutikah rinlopi in nauhak te cu a hni ih phayawngdine meisa kha a sem mit. Cutheh in “Sim aw, tu na zoh rero lai ih a hlo mi meisa khui a thleng” tin in sut. Cutikah ka mang bang zet.

          Ka duhham nak pawl rin lo pi ah a hlo thluh. Ka theih cak nak pawl khal a kuai thluh vek in ka ruat. Ka hawl mi ka fimthiam nak theih kauh nak pawl khal a hlo thluh. Curuangah hi nauhak te cu ka saya pathum nak a si.

          Hi thuhla cu ruah ding tampi a um. A thuk zet mi pawl khal a tel. Asinan cui a thuk zet mi pawl cu caasiar tu ih ruah ding ah re sehla. Zate ih theih thei ding mi zir nak lawng kan la ding. A par ih thuhla kha siar in hi sayagyi pa vek ruah nak kan neih a si le leilung pi ah saya pawl lawng a um ding. Dingfel nak, tangdor nak, thil tha hmuh nak hi pawl cun leilungpi cu a nuam ih a mawl ter si tikha theih thiam a theih.

          Sayagyi ih upat tihzah tlak zet mi a lung put hlei ah rukru ih nitin a sim mi “Thaizing le ziangkim a remcang ding” ti mi ttong te khal hna sungah a cam. Thaizing le a remcang leh ding timi zumnak thinlung kha ni thar tin hrangah thazaang a si ding cu a fiang zet.

          Thaizing ti mi kha tih lo ding le, thaizing ti mi tinte ah mah hrang lungawi nak a um ti kha zum nak neih ding kha a si. Thaizing tinte hrangah ruahsan nak pawl mah pakhat cio ih kan neih ding a si le nungram ah ruahhar ding ziang a um ding.