Sabek pakhat fangnga sile ei hlah, fanghra a si lawngah ei aw

Sabek pakhat fangnga sile ei hlah, fanghra a si lawngah ei aw

         Veikhat laiah pafate cu a hlunghlai zet mi bazaarpi pakhat sungah an feh. Kum 10 hrawng a si mi a fapa in a pai hnenah ka rilrawng ka pa hmaiah sabek em an zuar in lei sak aw a ti. “Ka fapa pakhat ziangzat saw va sut aw” tin a pa in a ti. Cutin a fapa cun sabek em zuar tu cu a va sutih pakhat fangnga tin a zuar tu cun a rak ti. A fapa in ka pa pakhat fangnga a ti inlei sak aw a ti tikah a pa in a kutih hngetzet ih a keng mi fanghra hnahte cu zoh phah in a haacang a rial ih a fapa cu a sim. Sabek pakhat fangnga an ti maw? Ei hrih hlah aw ka fapa. Ra kan feh ding ka fapa… na rilrawng a si le a dang ka lo lei sak dingtin a tiih a fapai kut cu a dir ih cuihmun in an feh.

         Cutheh in hmuk pahnih fangkhat man a fapa pumpuar dingah a leisak. Cutin kum 15 hrawng a reihnuah cui bazaarpi sung thotho ah cu an pafa in an thleng sal. A fapa in cu a dil lala. Ka pa khinah sabek em a um lai pakhat tal in leisak aw a tiih a pa in ka fa pakhat ziangzat va sut aw a ti. A liamcia kum 15 hrawngah pakhat fangnga lawng a rak si mi sabek em cu tuah cun 50 a si zo.

         Ka pa a man khuang tuk pakhat 50 an ti. Ka fapa 50 lawng si lo in 5,000 a si khal len tucaanah ka fa na eiduh a si len pakhat silo pahnih ei aw tin a pa in a ti tikah a fapa cun mangbang mithmai in “Khimi lai ka ei duh laiah ka pa inleisak loih tucu pahnih rori inlei sak ka pa.” Hitin ka fapa “Veikhat lai ka lo leihlo kha cu kha laiah kan pafa farah tein kan nunram kan rak pahtlang lai caanah na pa ka kut sungah fanghra hnahkhat te lawng a um ka fapa. Kha laiah sabek pakhat fangnga ka lo leisak a si len a ngah ko nan ka kutih a tangding mi a hlei fangnga te pakhat in kan pafa hrang a thaizingih kan tul ngaingai ding mi fang, siiti, cite cupawl lei ding a daih nawn lo ka fapa.

         Curuangah ka fapa ka lo leisak duh nak lungtum kha ka sup ih hmuk fangkhat man te lawng ka lo leisak nak a si. Tu kan nih cu a hlanvek kan si nawnlopi tucu kan lian zo. Ka fapa na ei duh mi, na tuah duh mi zaten tucaan ah ka lo tuah sak thei zo ka fapa.

         Hi thuanthu cu hizat lawng a si.

         Kannih khal kan nunram kan mai thazaang kan ringih kan pahtlang lai caanah kan duh mi, kan tuah duh mi, kan hruk duhmi, kan ei duh mi zate kha thuanthu sungih a pa vek in kan lungtum kha kan sup a tul. Mai nunram mahtei din thei ding kan harsat laicaanah paisa nei milian pawl thawn sinak tah awk ding a silo.

         Tahthim nak pakhat sim a si le. Tuicaan ih paisa nei milian pakhat cu rawl puaikhat 10,000 pe in a ei thei. Kor pakhat 50,000 pe in a hruk thei.

         Cutivek in kan mah kan zate cu a ringring si lo in caankhat caanhnih milian pawl vekin rawl puaikhat 10,000 pe in kan ei thei vek in kor pakhat 50,000 pe in kan lei thei. Asinan a man ciocio an bangaw ko nan kan pek dan a bangawlo. Paisa nei milianpa ih a tuan man a ngah mi paisa tingkhat cu minute maltesung in a ngah thei. Kannih cu kan tuanman ih kan ngah mi paisa tingkhat cu minute malte sungah kan ngah thei lo ruangah a si.

         Netabikah sabek pakhat fangnga ei hlah sawmnga a si lawngah ei… tin ka sim duh.

Credit.