Samkilh zakhat

Samkilh zakhat

          Veikhat lai ah Siangpahrang pakhat in fa nu (7) a nei. A fanu le pawl cu an hmel a tha zet ih a dum ih a tha zet mi sam sau pi khal an nei cio. Cu ruangah Siangpahrang pa in a fanu pakhat cio ah a mawizet mi samkilh (100) cir laksawng a pe. Zing khat ah a fanu upa bik cu a tho ih nidang vek in a sam a hriat. Cu ti a hriah rero laiah a samkilh pakhat a hlo kha a thei.

          Cu tikah fanu pahnih nak hnen in samkilh pakhat kha a thupten a lak ih a fir. Fanu pahnih nak nu in khal a samkilh pakhat a kim lo kha a thei ih fanu pathum nak hnen in samkilh pakhat a thupten a lak. Fanu pathum nakin khal a samkilh pakhat a kim lo kha a thei aw ih fanu pali nak hnen ta samkilh pakhat a fir. Fanu pali nak nu in khal fanu panga nak hnen ta a lak. Fanu panga nakin khal fanu paruk nak hnen ta a lak. Fanu paruk nakin khal fanu pasarih nak hnen ta a lak. Cu tin nauta bik nu ih samkilh cu (99) lawng a tang.

           A thai sunah an inn hnen ramri ih siangpahrang fapa pakhat cu siangpahrang hnenah rinlo pi a ra leng. Siangpahrang fapa cun “Mizaan ah ka cawm mi laileng pakhat cun samkilh pakhat a rak thiar. Siangpahrang Bawipa na fanu pawl ih samkilh a si ding ka zum ih ka ra thlen nak a si tin a sim. Na fanu zo bikih samkilh saw hlo” tin siangpahrang pa cu  a sut.

          A fanu pawl in siangpahrang fapa ih aw cu an thei ih keimah ta a hlo tin an sim duh zet nan an hnenah samkilh (100) a kim ruangah an sim ngam lo. Cutikah siangpahrang fanu te cun “Kei mah ih samkilh pakhat a hlo” tin a sim. A sim theh ve ten samkilh pakhat a kim lo mi fanu hnen in a sam cu a tla thluh. Sam sau pi thawn a mawi zet mi siangpahrang fanu ih mawi nakin siangpahrang fapa ih thinlung cu a lak. Thuanthu ih a cem nak ah cu siangpahrang fapa le siangpahrang fanu cu lungawi zet ih an nei aw. Samkilh zakhat cu a famkim zet mi nunram ti seh la samkilh pakhat a kim lo mi cu a famkim lo mi nunram ti sehla. A famkim lo mi nunram cu neta ah thlengawk nak caan tha a ngah.

          Cem ni nei lo mi thlengawk nak kan ton thei. Famkim lo nak neih ruangah na thinnau lan ding maw si… nunram ih a famkim lo mi kha ziangtin kan pahtlang ding. Thei lo vekih kan um san mennak in a cem ter thei lo a si. Kan pahtlang tinten a har thluh lo. Mah lawng ih kan um tinten kan nuam lo ti a si lo. Thil kan nei tinten kumkhua in a daih lo. Sun tinten, neta kan co sal thei nawn lo ti nak khal a si lo. Kan dungtun sal tinten kan tihhruk ruangah ti nak a si lo.

           Feh nak lamzin a um nawn lo tin zamrang ten ttong hlah. Leitlun ah thil sual le a hman mi lawng a um tin ruat pang hlah. Thuhla pakhat ih a phi cu pakhat lawng a um lo. Kan mah pawl ih kan zawh ding mi lamzin cu a um ringring. Thlahphoh ding a thei thiam tu cu a thin a zang. Hngilh ding a thei thiam tu cu a zalen. Thinhar ding in thuhla na hawl thei a si le lungawi dingin khal thu hla hawl thei tum aw.