Saya tuan ti mi cu.....

Saya tuan ti mi cu.....

          Zirhtu hnatuan cu a ol lo. Mah rori caazirhnak hmun thuk zetih luh tikah caa zirh hnatuan parah tum sinsin in tuanvo a um tin ruat asi. Caazirh hnatuan cu taksa ruangpi zate thawn tuan a si.

          Caa zirh dingah thluak hman a tul. Thinlung khal a tel tul. Cang vaih nak khal a tul. Tahthiam nak ah caa zirh caan sung te kan zoh a si le caa zirh caan ah thluak khal hna a tuan ve. Hivekin kaa in khal tong ve rero a tul. Caa zirh phah ah kut le ke cangvaih khal a tul. Ruangpi in cang a tul le cang a si. Body language thawn tla zirh a tul. Kaa thawn tla tha suah a tul. Cui sungah saya pakhat ka si ti theih nakin minung kha a khuh. Thinlungin a zirtu pawl a thei thiam ko pei maw? An hna thawn a kaih aw ko maw? Ka zirh hi an duh ko maw? An nuntu zia thawn a kaih aw ko maw? an thei thiam ko maw ti pawl kha ralring in zoh ringring a tu. Kei hi tindaan a kai tu, caazir tu pakhat ka si bang sehla, tu ka zirhdan in thaten ka thei thiam pei maw ti vek in ruahsan a tul. Tahthiam nak pawl thawn zirh a tulnak ih lai a um. Hi pawl cu Saya pakhat in a caa zirh ih a neih ding mi thinlung hnatuan a si. Cun duhsak nak ti vek pawl kha cu hleifuan hnatuan a si tikah kan sim duh lo ding.

Cun Saya pakhat ih hnatuan cu caa zirh dingih timtuah awk caan, Saya pakhat dinhmun ih um dan pawl cutivek in a um. Saya pakhat cu a hnatuan tuan dingah ca ah a ap awk a tul. Hitivek in minungpawl sungah tla a thun awk a tul. Thu um dan menmen in si lo in a ngaingai ih thei famkim dingin khal tuah a tul. Vocational a si le vocational vek in a mah a thu ih zin in tha famkimtak ih thei dingin an zuam ringring. San ih zir in khal zoh ringring a tul.

          Mai zirh mi caa ah a thar thar a si thei nak dingin a zuam a tul. Cuvek thotho in hmuhdan thar, zirhdan thar pawl pe thei dingin an zuam a tul. Mai zirh mi caa ih thu pawl kha a thar a thar in vum zirh thei sal dingin a zuam a tul. Sayakyi U Aung Thin a sim vek a silen Saya ti mi cu caa lawnglawng zirh ding a si lo. An thinlung tla zirh a tul. Tlawngta pawl ih thinlung zirh dingin ti theitawk in tlawngta pakhat cio ih an nuntu zia, an mizia theihthiam dingin zuam a tul. Saya cu tlawngkhaan sungah zirhtu, hmuh tu, lamhmuh ih ruahnak pe tu a si vek in, tlawng khaan lengah khal Pate dinhmun, Pa dinhmun, U dinhmun in an kom awk a tul. Cutivek in thinlung le thinlung, mah le mah nel aw in tlawngta pawl kha lam a hruai a tul. Naiten tei a kil veng a tul.

          A taktakah cun Saya pawl cu an mai an fim nak kha thiam deuh dingin an zuam ringring a tul. Zinzoi dingin an zuam. Caa pawl ngan dingah catbanglo in an zinzoi a tul. Zirhnak khal bansan ding a ngah lo. Zin zoi nak hrangah khualtlawng tla a tul le a tlawn a tul a si. Minungpawl thawn hmuh awk ding, tong awk ding, thurel khawm ding thu sut ding cupawl hrang banglo in a zuam a tul. Cu lakah tlawngta pawl hrangah tin kor zal sungih paisa khal don aw lo in a phorh suah caan khal a um theu.

          Saya ngaingai pakhat ih thinlung cu, ruah nak menmen a si lo. Mi zangfah menmen khal a si lo. Saya ti mi cu kaa ihsin bawm nak pawl khal tuah a tul. Mah ih thazaang kha a suah tul. Duhdawt nak pawl khal a neih tul. Thluak khal lungtat vek si lo dingin khal a tuah tul. Lungtat ti mi cu nam pawl kha a hrim ter ko nan lungtat tu kha nuam te ten a paa ih a bil vivo. Saya hnatuan ti mi cu khat lamlawng hnatuan a si lo.

Saya hnatuan ti mi cu um har phen men ih tuan ding mi hnatuan a si lo. Mai hlawk nak ruatih tuan ding mi hnatuan a si lo. Thuneih nak ngah ding a si lo vek in, sumpai ngah ih lian nak ding khal a si lo. Saya hna tuan timi cu fim thiam nak duh ih tuan ding mi hnatuan a si. Saya hnatuan tuan ih fimnak kha duh ngaingai lo a si le, Saya si dingah a tlak lo ti ti theih a si.