Thilzuartu pawl ih theih tul mi thilzuar daan (January 28, 2022)

Thilzuartu pawl ih theih tul mi thilzuar daan

(January 28, 2022)

         Hnakphek zuartu pawl in hi vek harsatnak nan nei ko ding. Cui harsatnak cu hnakphek zuar tu kha ‘hnakphek a thak maw?’ tiin a leitu pawl ih suh theu mi thusuhnak a si. Hnakphek zuartu in ‘a thak’ ti a si le hnakphek leitu in a thak a duh lo le lei lo in a tlan ding. ‘A thak lo’ ti khal le a leitu in a thak a duh pang le hi thil zuarnak cu a cang thei nawn lo. Hi vek harsatnak felfai ter daan cu mi zapi ih theih mi tidaan a si. Hnakphek kha thenhnih ah then aw. Pakhat cu a tha, pakhat cu a thak lo tiih zuar a si le a leitu in a duhduh a hril ding.  Hi mi cu mi tampi theih mi ca uk sungih ngan mi tidaan a si. Nikhat ah ka man tuk ih hnakphek zuar tu’i kiangah to in hi harsatnak ziangtin a simfiang ding tiah ka rak zoh. Cule a leitu an um lo sung te ah ka rak sim bet bet lai. ‘Unau nu….hnakphek thenhnih ah then aw… A leitu in a thak a duh le khi mi na zung khih aw. A thak lo a duh le hi mi khih aw’ ka ti. Ka sim mi ngai in I hnihsan….Cule ‘a tul lo’ I ti. Cu tawk ah hnakphek lei duhtu pakhat a rak thleng.

         A hlan vek thotho in ‘na hnakphek a thak maw?’ tiah a sut. A zuartu nunau nu cun ‘a rong a tak mi kha a thak, a rong auu mi kha a thak lo’ tiah a ti. A leitu cun a duh mi a hril ih a rak tlan. Cui ni cu ziang ni ti ding si maw…. mitin in a rong auu in a thak lo ti mi hnakphek lawng lawng an rak Malte a rei deuh cun a rong auu mi hnakphek pawl cu a um lo ti tluk ah a cang. Cu tawk ah kei mah in ‘a dang a taang lai mi hnakphek pawl thenhnih ah ka then. A si lole ‘zuar a har tuk ding’ ka tiih a zuar tu cun hni phah in a luu a thing phah ih ‘a tul lo’ a ti sal. A leitu pakhat a thleng sal lala  “Hnakphek a thak maw?” tiah a sut. A zuartu in a hnakphek zoh in ‘a sau mi a thak. A tawi cu a thak lo tiah a sim. Cutiin a zuar ih a tawi pawl lawng a rak taang. A sen mi hnakphek tawite pawl zoh in zianghman ka tong nawn lo.

         Aw…..tui tum teh ziang a tuah pei tiah ka rak thlingthla. A dang thil leitu pakhat a thleng ih hnakphek a thak maw? tiih a suh tikah a zuar tu in ‘a hawng nem mi a thak. A hak mi a thak lo’ tiah a ti. A zuartu cu ka thinlung ten ka lawm zet. Sun nihlawh pho mi  hnakphek hrekkhat cu tidat a kang ih a rak neem. Hnakphek pawl a zuar theh tikah hnakphek zuartu in a feh hlan ah thil pakhat I rak sim ta. “Na sim mi hnakphek zuar daan mitin in an thei.”

         Cun kei mai tidaan cu kei mah lawngin ka thei. Nunram ah ruahnak pawl ca ah an ngan thei cio ko. Asinan, ca uk sungah ruahnak mal tinten nunram ah olten khuasak a rak ngah lo. Ziang ruangah tile nunram cu cangvaih rero mi hmun a si. Hnakphek zuartu ruangah….ruahnak sungah uanawknak pawl rawi hlah. Uanawknak sungah khal ruahnak pawl hlo ter hlah ….. ti mi ka thei suak.

         Hi thuhla cu Thutazone ih tarlang mi thawn pehpar ih rel mi a si.

source - thutazone.org

Photo- Google image