Thinheng tu pawl ih tuah daan 

Thinheng tu pawl ih tuah daan 

          Thinheng caan a si le cabuai cum duhnak thinlung ziaza tha lo ka nei. Asinan a khuai thei mi thlalang cabuai cu cum a si dah lo. Thinheng caan a si le maikut ih keng mi thil ziangziang khal hlon a si theu. Asinan dolar 1500 man phone kan keng ah cun kan hlon dingah zum a um lo. Thinheng caan len mai hmai ih um thil ziangziang khal an sit theu. Asinan a hmai ih hlingkung a um ah cun an sit lo ding. Ralrin ding cu vei tampi si ko. Minung cu a thinlung theih lo te in cu a thin a naa loih a thinhengnak kha ziangtin lang ter ding ti kha a thei.

          Hi mi cu kaudeuh ih kan theih ding a si len minung cu mah ai in a cak lo ti kan ruah mi pawl par, a mah kha a ti naa thei sal lo tu par lawngah a thinhengnak kha alang ter theu asi.

          Dawrih hnatuan bawm tu pakhat ruangah a kor par ah ti a bung pang a si le kan kawk ih kan hro ciamco thei. Milian pa ruangah a kor parah coffee malte a bung a si le thinheng in kan kawk lo ihhleiah hniphah in a ngah ko a poi lo tin kan ti bet. Mah ai in si nak tum deuh pawl hnen ah kan thinheng ding a si le veihnih lai kan ruah ta ti a si.

          Minung pawl cu cenbek kan pal lo. Lei hak lawng kan pal. Cenbek kan pal le kan ke a bek ding kan phang. Lei hak pal cu a ni hrang ah ziangman a sunnak a um lo. Curuangah minung cu a mai hrang a sung um lo, a naa um lo, a ngaingai in a hrang sun nak a um lo a si le a pal. A pal le a hrangah zianghman a naa lo ding a si le a pal.

          Hi ti a si le cu a thinsia ti mi cu a dang si lo in a ai in si nak niam mi, a mah a ti naa thei lo tu pawl par ih tuah dan pakhat a si.