Upat thlak mi mi upa

Upat thlak mi mi upa

            Zinglam minung an mal caan asi. Laphak dawrih a kap bik ah to in lakphak khuatkhat ka cah. Mal te arei deuh ah dawr ih hnatuan tu pakhat in ka cah mi lakphak a rak ken phah ah a kut a naal ih lakphak khuat cu a tla ih a kuai. Dawrsungih lakphak a inn vetu minung zate ih mit cu cui hnatuan tu pai hnenah a thleng thluh. Dawr hnatua tu pa cu ningzak phah, tihphah vek in aum.

             Dawr neitu pa ih fapa in hi pa cu aw “ thaten na tuah lo” tin a kawk tum zawngah a pa in a fapa kha ti lo dingin kham phah  in hnatuan tu pa kha “ a dang khuatkhat laksal aw” tin hniphah in asim.  Hnatuan tu pa in a dang a lak lala ih thaten a keng ih lamzin hrek athlen in a thlak kuai ter lala.

            Hnatuantu pa in tuitum cu kawk ka tuar tengteng ding tin ruat in amit hmai a nuam lo. Dawr nei tu pa ih fapa in hnatuantu pa kha a kawk tum zawngah a pa in a kham lala. “ A kuai zo mi cu ziangtitha a dang khuatkhat lak sal aw” tin a ti lala. Tuitum cu dawrsung ih um ve tu pawl kha hnatuantu pa hnak in dawr neitu pa khan an thinlung a lak sawn. Hnatuantu pa cun laphat khuatkhat kha a pek sal.

            Tuitum cu a tlak ter nawn lo. Sinan hnatuantu pa ih mithmai cu a nuam aw cuang lo.  Dawrneitu pa in hnatuan tu pa ih liang kha kai phah in na thinlung sungah ret duh hlah aw a ti. Hi mi cu zir ding mi asi. Kan nun ram khal hi vek thotho in cankhat canhnih ah ruah lo pin kan sual theu. Cankhat canhnih ah sual ding phang in thaten tuah cing in sual pang can khal aum. A thupi mi cu duhnak thawn sualnak kha tuah lo ding a si tin” a sim ih hnatuan tu pa kha tuah ding um mi kha tuah in thinlung ah zianghman ret lo dingin a sim ih a feh ter.

             Cuihnu ah dawr nei tu pa in a fapa a ko ih a sim.  Zinglam ih sin hnatuan tupa cu cawl loin hna a tuan rero a nih  tla a bang ve thlang ding.  Kan dawr ih hnatuantu cu kan sungkua an si.  Pakhatkhat a cang sile kan nih cun kan dawr ih hnatuan tu pawl kha kilhim ding sawn asi.  Zinglam ihsin hna a tuan rero tu lawng si a sual.

            Minung pawl cu suahkeh in zohsual nak/ tha lo mi hmuh nak timi a um cia. Zabeng ding hnak in kutzung sawh ding in Minung pawl cu a thami tampi lek ihsin asia mi kha hril in kan hmu theu nan asia pawl lek in a tha mi cu thei lo vekin kan um theu. Siat nak tampi lek ihsin thami pawl hril in hmuthiam dingin zuam aw. Thiltha tuah mi parah zabeng sak dingin na tawrit hlah ka fapa tin a pa in a fapa kha nun asim.