Vokkuang Long le Rang le Minung ih thuanthu tawi.

Vokkuang Long le Rang le Minung ih thuanthu tawi.

          Long cu tikap ih ret ringring a sile a him bik. Asinan cumi cu long an tuah nak ih a san a si lo.

          Minung cu inn ih um le a hahdam bik. Asinan cumi cu minung kan si nakih a san a si lo.

          Nikhat ah peng 1000 feh thei mi a raltha zet mi Rang pakhat a um. A mai thiam nak kha langsar ih phorh suak nak ding caan kha a hngak.  Sumdawng pa a ra thleng ih Rang cu a sut. “Keimah i thlun thei pei maw?”tin a ra ti. Rang cun a lu a thing ih “Kei cu nikhat ah peng 1000 feh thei mi a raltha zet mi rang ka si… ziangtin sumdawng pai dung cu ka lo thlun ih thilri ka phurh nak ding san”a ti.

          Ralkap pa pakhat a ra thleng ih rang cu a sut. “Keimah thawn in thlun thei pei maw?” a ti sal. Rang cu a lu a thing ih “Keicu nikhat ah peng 1000 feh thei mi rang ka si… ziangtinso raldo menmen mi nang ih dung cu ka lo tlun ih ral ka do nak ding san…” a ti.

          Ramtawi tu pa a ra thleng ih rang cu a sut lala. “Keimah i thlun thei pei maw?”a ti lala. Rang cu a lu a thing ih hitin a sim “Kei cu nikhat ah peng 1000 feh thei mi a ral tha zet mi rang ka si… ziangtin ramtawi thawn harsat nak pawl ka tuar nak ding san” a ti.

          Hiti vek in nikhat hnu nikhat caan a cem. Rang cu a mah thawn kaih mi hnatuan a hmu hrih lo. Nikhat cu Siangpahrang ih thupek vek in Ral Bawipa pakhat in a ral tha zet mi rang a tul thu hmun tinkim ah thei ter nak caa an tar ih an hawl. A raltha zet mi Rang in Ral Bawipa cu a va tong ih a sim. “Kei cu nan hawl rero mi a raltha zet mi Rang ka si.” Ral Bawipa cun a sut “Asile… kan ram ih tlang le horkuam ih lamzin pawl na thei fiang maw? tin a sut ih Rang cu a lu a thing.

          Ral Bawipa cun a sut bet “Asile… raldo nak ah na tel dah maw? Raldo nak ah hmuhton nak na nei maw?” Rang cu a lu a thing bet. Ral Bawipa cun a sut lala “Asile… hramlak ah ramsa thawn nan tonawk tikah na Bawipa hrangah na do ih hmai na suak ngam maw?” tiah Rang cu a lu a thing lala.

          Ral Bawipa cun “Asile nang cu ziangsaw na that hnem lai.” Rang cun “Kei cu sun a si le peng 1000 ka feh thei ih zaan a si le peng 800 ka feh thei. Thlipah nak lam ah thli hran nak lam hnak in hman ka tlan a rang sawn.”

          Ral Bawipa cu rang par a hung kai. Rang cu a tha a suah ih vekkhat teah a tlan. Asinan kal 10 hrawng lawng a tlan ih a bang tukih a zang in a thlan pawl a pot. “Na tar zo… na tlan thei nawn lo” tin a ti ih Ral Bawipa cu a kir sal.

          Tuaisun na tuah mi tinkim ah na zuam menmen tin na ruat ko nan… neta hnupi hrangah … cah nak pakhat asi ti thei aw. Tuaisun ih na pahtlang mi harsat nak na hmuhtonnak, na el tikah hmailam hrangah a khoh mi kekar nak pawl an si. Tar hnuih na tlan thei nawn lo hnu lawngah ka rak tlan lo pangpang tin sir aw hlah.

          Vokkuang Long cu tikap ih ret le ahim bik. Asinan cumi cu long an tuah nakih a san a si lo. Minung cu inn ih um le a hahdam bik. Asinan cumicu minung si nakih a san a silo. Fimnak in thiam nak kha a aiawh lo. Caalai in nunphung ai a awh lo.  

          Mizaan ih hmin thang nak pawl cu tuaisun ah cun a liam cia le mansal nak ding men ah an cang. Curuangah a thupi mi cu “Mizaan ah zo na si ti a si lo.” “Tuisun ah zo na si ti hi a si.” Hleice ih a thupi sawn mi cu tuisun ah ziang na tuah ih… thaisun ziang na cang ding ti asi.