Zu na in zik le hi mi cate hi na mitthlam ah hmu aw ka rual

Zu na in zik le hi mi cate hi na mitthlam ah hmu aw ka rual

Inn pakhat ah inntek pa pakhat cu zu kha sunzaan bang lo in a in a sile cui inn ah hahdam nak a um lo vekin lungawi nak khal a hloh ding cu a hman. A ngaingai ah cun zu tama pakhat ih nupi si cu rualpi lak, nulepa, kiangkap pawl lak, u le nau lak ah ziangtluk in an mit hmai a nau ding ti khal an ruat lo. Fa le pawl khal na pa cu zu tama a si tin sim le an mai dinhmun in ziangtluk an ningzak ding ruat hnik aw ka rual.

          Zu cu thin nom lo ruangah in a si khal le lungawi ruangih in a si khal le zu in cu zo vek nupi hman in an duh lo vek in zovek fate hman in an duh lo. Nupi in an pasal par ih an duh nak thinlung, innsungsang thenthek duh lonak thinlung ruangah an tuar in an um pi tento mi nan hmu ding. Veikhat veihnih thu dangdang ruangah in lo theih lo ih in caan khal a um. Cu mi cu innsungsang khal in an thei thiam.

          Cu si lo ih zing thoh vete zu thawn hmai a phiah ti mi sim tiang an hlawh tikah mi theih a mawi lo vek in innsungsang hrangkhal ah ningzak za a si.

          Zu tama ngaingai a si le zu a in nak a san pawl kha thuhla a phunphun hman in a in. Hrekkhat cun an sim ding “Kan nih cu zu lawng si kan in a dang ziang hman kan tuah lo.”

          A hman, A tha lo zianghman an tuah lo vekin a tha khal zianghman an tuah nawn lo. Sum dawnnak, nunphung, harhdamnak zianghman an tuah nawn lo vekin zu lo bak a dang zianghman an ruat nawn lo. Zu lawng an mai nungram a si ih neta bik ah cun zu ih sal nunram in an nungram khal a cem ter.

          Thinhar tinten zu in ding a sile leilung pumpi in zu tama kan si thluh ding. Mi tinkim ah remcang lo nak pawl, thin nom lo nak tete pawl cu minung tinkim ih an ton theu mi pawl an si. Lungawi ruangih zu in a sile a dang tuah dan pawl in khal lungawi a theih. Zu in lawng ah nom a si lo.

          A tha bik cu “Zu kha in lo lawlaw ding” um thei lo ih in a si khal le laitek in in ding. Mi nung in zu a in ti lawng siseh. Zu in minung a in ti tiang thleng ter hlah uh si.

Zu in innsang, kiangkap le venghnen a buaiter vekin farahnak mi thlentu a si. Ralring tlang uh si.  

Casiar zate parah lungawinak tampi kan nei.