Zun thlum, thi thlum a mal ter thei tu Vainim

Zun thlum, thi thlum a mal ter thei tu Vainim ih that hnemnak thuhla 

            Vainim ah vainim thlum, thaw phat vainim le vainim sen (Shine vainim) tiin a um ih, atlangpi ahcun vainim eng cu a thlum ce ih, vainim sen cu a thlum ih a thaw zet. Vainim cu suang, bawl, rawh, keau, Jelly cutivek rawl lei theh ih ei asivekin thenkhat cu hmeh khalah an hmang a si. Laitlang lam ahcun khuahlan pilepu san ihsin thokin tuini tiang lai daan tisop tiin duh tak in ei a si theu. Vainim cu minung pawl hrang lawng siloin ramsa pawl khalin an ei thei ruangah hmun then khat pawl ahcun caw le sia pawl an thang thei nak dingah vainim an pe theu. Tuihlan minung pawl cu vainim kau thawn kuak an zual ih hmui si thaw si in an fawp theu. Atuahcun American ih Ceraplast campany ihsin vainim ih a tel mi Kaci dat pawl hmang in kiangkap a siat suah lomi plastic pawl an tuah ih 2013 kumah Zinan man a kai ruangah Zinan aiah an suah mi Zio palastic a suak thlang ding tiin zingzoi a si.

1.Vainim sungih a um mi amah te ih a cang mi Kaci dat le Aahmin dat pawl cu minung taksa sungih glucose kha hmanhman in a um ter ih, thi sung ih a thlum dat a mal ter thu, vainim tuletu a ei tu nunau pawl ah thi thlum nat can thei nak zatek 30 a mal ter thu, ahleicein a dup mi vainim in zunthlum nat kha a dem ter thu Japan ram ih Biochemical le Biophysical Research Communications in an tar lang. 

2.Vainim sungih a um mi a thau in thi thangnat a nei mi mipa pawl zatek 12 a tla ter ih, nunau pawl cu zatek 5 thi a tla ter.

3.Zun inn cu thaten hna a tuan ter ih, kal thawn pehpar mi nat a phunphun a dam ter thei. Ahleice in vainim suan mi ti in nakin zun feh daan a tha ter.

4.Vainim cu a dang thing thei rah kung pawl lakah clories dat a tam bik mi asi ruangah tha zang  a cang terih hleiah a sungih a tel mi Vatamin dat cu taksa hnatuan nak pawl a bawm ruangah thazang a tam ter.

5.Vainim sungih a ummi Kaci dat cu taksa sungih a tha lo mi Colostrum cu a mal ter thei thu Nutrition Biochemistry sii thuthang ah an tar lang. Cuihleiah a zup ol zet mi Ahmin dat tampi a tel ih, Colostrum khal a tlak ter ruangah taksa rih nak hmanhman ten um a duh tu pawl in ei an tul. Ahleicein vainim in thau tuk nak a kham. Vainim khuat khat sungah 15-calories a tel ruangah, suncaw ei hlan ah vainim khuat khat ei nak in rilrawn tuknak le rawl ei duh nak thinlung a mal ter ruangah taksa rih nak a tla ter duh tu pawl a bawm thei.

6.Vainim sung ih a um mi thau cu lung thi hri pawl a cak ter ih, lung thi feh nak ah bom nak a pe ih, lung a dam ter. A tha lo mi Colostrum thi khal nak um lo dingin a humhim thei. Lung nat nak thawn pehparmi zengnak khal a um ter lo. Canida ramih siilam mifim pawl in ruah nak an pe ih cumi cu Boston ih nurse pawl khal in an pom.

7. Thawthawt nak lamzin ih harhdam nak a that ter ruangah nauhak pawl vainim ei ter a tul.

8.Vainim sungah Vitamin B12 le Folic acid pawl tampi a tel ruangah Tan dat sung nak ruangih a cang mi thi tha mal nat nak a kham thei. Nauvon tu pawl thi sang nak le thi sen ruangah kut, ke thling nak pawl a dam ter ih hleiah, vainim ei nak in a suak tu ding naute pawl hrangah cell pawl tha a khat ter ih pound kim lomi naute an nei lo. Cuihleiah naute ih thluak hri khal a tha ter.

9. Vainim sungih a ummi Vitamin B1cu thluak cell pawl tha a tha ter ih, thil hminsin nak le thil hmuh thei nak a tha ter. Cuihleiah Alzheimer thluak lam nat nak khal a mal ter thei.

10. Cornell University ih an zoh nak vekin Vainim sungah dat thang dokham nak thilri pawl a tel ruangah taksa sungih duhlomi free radical pawl a do ih, cancer nat nak a phunphun khalin a kham thei. Ril ih tur pawl a hlon ih hleiah, ril sung ih that nak a pe tu bacteria pawl a bom ruangah rel cancer a cang ter lo. Mi pakhat ih nikhat sungih Ahmin dat a tul mi zatek 18.4 cu vainim khuat khat in ngah a theih ruangah rawl rial nak a tha ter ih, pum a that ter ruangah rilpi cancer a can ter thei lo thu Canida siilam mifam pawl in an sim. Beta Cryptoxanthin dat a tel ruangah vainim hmanhman ei nak in cuap cancer can thei nak zatek 37 a mal ter. Hnawi le thin cancer a bol mi pawl than nak khal a kham thei.

11. Kum upa pawl ruh kiah nak le ruh pelh nat nak a kham thei.

12. Vainim sungih a um mi Linoleic acid le Kaci dat pawl cu taksa an mawi ter ih a bol a sen mi pawl a um ter lo. Vainim a sen pawl ah harhdam nak a tha ter tu dat a tel ruangah tui lai ah cei awk nak thilri pawl le taksa no nak thilri pawl ah an hmang.

13. Vainim vekin aihre zawng a nei mi hanghnah hangrah pawl lakah Vitanim A tampi a tel ruangah mit harhdam nak hrangah tampi in a tha. Ram tinkim sumdawn nak mifim pawlkom ih hminsin mi pawl vekin, vainim cu kum upa ruangih thil hmuh thei nak siat nak le sunglamih a kham tu nat pawl a kham thei thu, suah keh ih nauhak mit cawt nak pawl a kham thei thu an sim.

14. Vainim ah Antioxidant phunkhat asimi Frulic acid a tel ruangah taksa sungah thling nak pawl a sawng ter thei.

15. Vainim sungih a tel mi Biotin dat in sam that ter thei nak a nei.

16. Vainim sungah hanghnah hangrah lakih hmuh har zet mi Vitamin B5 cu kal tlunlamih Adrenal gland ihsin cii zai thei nak tha a pek ruangah fate nei dingih a zuam rero tu nulepa pawl vainim ei dingah a tul.

Vainim thawn taksa kilhim daan

1. Vainim a phut mi malte kha hnih ringring mi cleanser thawn rawi aw dingin cawk aw (a tul asile tidai malte rawi aw. Cui rawi mi cu hmai parah a hlum pungsan in nuam teten a sung lut dingin hnih aw. Minute 10 a rei hnuah ti hlum thawn thiang fai ter aw. Cutivek ih karkhat veikhat tuah nak in hmai par ih hmasi le hri cu pawl a hlo ih, taksa a no ih a mawi ding.

2. Taksa vun hrangah vainim kha scrub tiin hman a theih. Vainim phut asilole phom mi vainim kha hman ringringmi sapian thawn rawi in taksa zaten rawt nak in mangbangza in a no zet mi taksa neih a theih.

Hminsin ding

1. Vainim kha kiau hnakin siti tel loih ei nak le suan mi a ti pawl harhdam nak hrangah a tha sawn.

2.Vainim sungih a thlum dat suak dingah, vainim suang tikah cite malte rawi in ei a tul.

Ralring dingah

1. Pum thalo laiah vainim ei lo ding.

2. Vickroove thawn tuahmi vainim puak pawl kha plastic sung ret tikah cui vainim ihsin perfluaro Octanoic Acid (PFOA) tiih kawh mi chemical dat a suak ih, taksa sung a thlen tikah, naupai thei nak a kham.

3. Cite a tammi vainim cu ei duh nak thinlung a tamtuk tikah, cui hminsin nak cu "nangmah cu thinhar nak na tuar ti a lang ter" (tampi'n ei hlah)

            Aman khung mi ei le in lawng a tha bik mi in le ei tiin ruat hlah. Harhdam nak hrang a tha bik in that nak a pe tu ding lawng a tha bik in ei tiin hminsin a tul. Ziangvek rawl hman tuah daan phunphun thawn a mai um daan vekih ei nak cu harhdam nak hrangah a tha bik. Curuangah mah kiang nai te ih olten ngah thei mi man ol ten ngah thei mi vainim kha kan dam sung ah kan harhdam nak a that thei nak dingah ei cio uh si.

https://www.youtube.com/watch?v=_Wk-LbzMEH8