Ramsa le thingkung pawl an ci a mit nakih harsat nak. No. 32, 33

Ramsa le thingkung pawl an ci a mit nakih harsat nak.

No. 32

 Leipar ih thilmankhung pawl khal kum malte sung hmannakpawl thawn mah hrangih sumdawn nak a hawl tu pawl, thil zuar nak, thilri suahnak hnatuan nei tu pawl cu thinlung duhnak control nak um loin an hmang heu rero.

              Hramlak a siat ral nak cu aralai dingmi minung pawl hrangah hanghnah hangrah, rawl pawl le sii asi mi thinkung pawl a dang hman ding hrangih a tul mi thingkung a phunphun pawl a suung ter. Thingkung a phunphun pawl cu minung pawl ih tul mi silhkhah nak ah le kiangkap um dan kham nak ah hmailam caan hrangah rinsan ding mi pawl an si. Thingkung, pangpar pawl hi tulnak um lole ol ai ten sahnak le haunakcu minung zate hmailam hrangah sunnak le that lonak a suah ter a si.

33. Thingkung a phunphun, ramsa a phunphun pawl cu mai hrang lawng thatnak, mai hlawk nak ding hrang lawng zoh lo ding, ramsa tinkim in an mah pehpar in thatnak tuah nak, man neihnak pawl an neih thu hmuh a theih.

              Kumtin ten thawng tampi thingkung phun pawl le ramsa phun pawl an cii a cem ih, leipar ihsin an thi ih an hlo ruangah, cumi pawl cu kanmah pawl in theih a si loih, fa le pawl khal cumi pawl hmuh dah asilo. Ramsa a tam bik an tih nak ih a thupi bik cu minung pawl ruangah a si.

              Kanmai tuahnak ruangah ramsa phun thawngzalenglo cu kanmah kan um ruangah Pathian ih thiltitheinak thangthatnak tuah thei lo in, anmah ihsin Pathian in in zirh duh mi nunsimnak pawl khal ngah theih asi nawn lo. Hitivekin tuah dingah kanmah in ziangvek thil ti theinak khal kan nei lo.

              Kan hmuh thei mi leipar ramsa pawl le vate pawl an hloh thu theih ahcun thin a nuam lo zet. Kiangkap hnatuan thaten tuan thei tu hrangah Paa pawl, tipi sungih um pawl, Cangcel pawl, pangang pawl, leipar ih a bok vak mi ramsa pawl le siar a theih lo mi a fate zet mi pangang pawl, cutivek ramsa pawl um ding a tul.

              A mal zet mi ramsa phun thenkhat pawl cu a tam sawn in kan hmu thei lo nan, anmah pawl cu hmun ram pakhat ih kiangkap rualrem nak hrangah a thupi mi hmun ihsin an tel ve a si. Kan kiangkap cu tih nung nak lam ih a thlen ahcun minung pawl sinak in pakhat khat tuah sak ding a si. Asinan a tui lai san ah mah te ih thiltitheinak parah tuahnak cu reilote sung tuah nak lawng hmuh a si. Neh hnu ah a tha lo sinsin mi buainak a suak ih, minung pawl ih tuah tuan nak a tul. Mah te ih a cang mi aiin minung ih tuah mi hmuh vivo asi tikah, cumi ruangih a cang dingmi harsat nak pawl ralrin cia dingah a si.

              Reilote tivekin buainak pakhat fel ter dingah minung ih tuahnak ruangah thil um daan a tha lo deuh deuh nak pawl hmuh a siih, pehawknak thawn a her daan khal hmuh a theih. Tahthimnak ih sim asile pangang thahnak sii pawl cu thil ciin nak hrangah a tha hnem nan, vate phun tampi le an rualpi asimi lungphur tampi cu an cii a cem ter. Cui ramsa pawl an thihnak ruangah a hnatuan nak cu a dang ti daan thawn aiawh ih hman tikah cui ti daan pawl cu buainak thawn a hlat lo thu hmuh a si.

              Minung ruangih a cang mi harsat nak hrangah a san hawl dingah zuam zet ih a tuan tu mifim pawl, engineer pawl ih zuam zet ih an tuahnak pawl cu lungawi zet ih upat ding a si. Leilungpi ih um daan bangran ten zoh tikah a tamsawn in minung pawl ih hnaihnok zet ih tuahnak cu sumdawnnak tuah tu pawlle a ei ih hmang tu pawl ih thatnak hrang lawng asiih, thiamnak thawn thanso nak pawl le thil tuah thei nak thazang thangso nak pawl hmuh a theih nan, leilungpi ih thilri pawl a cem ter ih, mawi nak pawl a cem ter.

              Kanmah pawl ih ruahnak ah aiawh a ngah lo ih, aiawh ding a ngah lomi mah te ih mawinak pawl cu kanmah rori ih tuah mi mawinak in aiawh ding ah kan zuam rero vekah a cang. Hi mi thu cu Pope Francis ih suah mi kan Nu a si mi Leilungpi kilhimnak thu thawn peh par aw ih a ngan mi ca sungih sin kan ngan mi a si. Leilung pi kilhim tlang dingih in sawmnak parah tuanvo la tlang uh si.