Duhdawtnak ngai ngai in ziaza sia pawl a hlo ter (Innsungsang ih neih tul mi thu)

Duhdawtnak ngai ngai in ziaza sia pawl a hlo ter (Innsungsang ih neih tul mi thu)

            Mi thenkhat in duhdawt nak cu khua a hmu lo an ti. Mitcaw duhdawt nak cu duhdawt nak ngai a si lo. Thinlung diriam nak lawng a si. Duhdawt nak ngai ngai cu a mit a caw lo. Tleu nak a si. Duhdawt nak ngai ngai cun tha le tha lo, hman le hman lo, sual nak le sual lo nak kha fiang tak in a hmu thei.

            A sual le a hman mi theih lo nak cu mitcaw duhdawt nak a si. Innsungsang nei cia mi, duh le neih nak cu duhdawt nak  tak tak a si lo. Thinlung diriam nak men a si. A san cu a sual le a hman hmu thiam lo dingin a thim mi taksa duh nak (hamtam nak) a khuh ruangah a si. Mi lian fapa in a farah tak mi nunau a duh ih a neih mi kha mitcaw duhdawt nak a si lo. Kan farah ah siseh, kan lian ah siseh, minung zaten kan bangaw thluh. Man nei mi ti theih ruang ih kut sih nak a si.

            Taksa duh nak cu thisen in a ra. Duhdawt nak taktak cu thinlung le thluak in a ra tin an ti. Inn sungsang nei phah in midang duh nak cu mitcaw duhdawt nak lawng a si. (2 Sam 11:2-18) ah David siangpahrang le Bathsheba ih thu hla kan siar le duhdawt nak tak le taksa duh nak ih tah thim nak pakhat kha kan thlei dang thei. Asinan pasal nei zo mi a si ih Bathsheba kha a nei ih a pasal cu thih dingin ral lak ah a feh ter. Cui thil cang mi cu David siangpahrang ih Bathsheba thawn a pehpar aw mi a thinlung kha duhdawt awk nak taktak tin kan ti ding maw. Pasal nei zo mi nupi ah a neih le sual nak a hmuh lo kha duhdawt nak taktak tin kan ti ding maw. Bathsheba kha ngah dingah, cu nu ih pasal Uriah kha thi ding in a tuah nak cu duhdawt awk nak ngai ngai tin kan ko ding maw. Cumi thil ah David Siangpahrang ih a tuah mi cu tisa duh nak, sual nak a si ti kha Bible in a sim fiang. Mitcaw duhdawt nak tiah a nau tat a si. David siangpahrang a mah rori in sual nak a si tiin a pom ih a sir aw.

            A dang tah thim nak pakhat ka run rel hrih ding mi cu, America ram Corona peng Union khua sung um Susan Smith in pasal pakhat a rak nei. Cu nu cun fa tla pahnih a rak nei. Asinan cu nu cu a dang mipa Phidali thawn an duh aw. Phidali in cu nu ih fa pahnih cu ka kil khawi thei lo ding, nauhak pawl ruangah kan neih aw thei lo ding a ti ih, cu nu cu phidali kha a then thei lo ruangah a fa pahnih cu mawtaw parah a to ter ih tiva sungah a thlakih a thih ter. Kum (1996), July(23) ni ah zung lam in sual nak a nei tin an potcat ih cu nu cu nauhak pahnih a that ruangah a nunsung thawng tlak ding in an rel ti kha thu thang ah kan siar. Mai duh mi hrangah sual nei lo mi mai sungsuak fa thah cu duhdawt nak tin kan ti thei ding maw. A sual, a hman, a tha, a tha lo, thlei dang thei lo nak cu duhdawt nak tak a si lo. Taksa hiar nak lawng a si. Innsungsang ah rin tlak lo mi kha duhdawt nak tin kan ti ding maw.

            Duhdawt nak taktak nei tu in innsungsang ih rintlak si nak kha a thei ih a kil khawi. Taksa duh nak cu duhdawt nak ngaingai a si lo. Mitcaw duhdawt nak a  si. Mitcaw duhdawt nak in, sual nak tam tak a tuah ter thei. Taksa duh nak thu thawn peh par aw in a dang tah thim nak pakhat cu David siangpahrang ih fapa sual Amnon ih nun daan kha a sim duh. Amnon cu Tamar kha a neih duh ruangah rawl ei thei lo, it that thei lo in a um. Cu nu ih duh lo na cingin a sual pi nak ruangah cu nu in a hlan hnak cun a let tam pi in a hua bet.

            (2 Sam 1:16) sungah taksa duh nak cun rei a daih lo. A san cu duhdawt nak tak tak a si lo ruangah a si. Curuangah duhdawt nak taktak le mitcaw duhnak (taksa hiar nak) cu kan thlei dang thei hnu lawng ah lei lung mi pawl ih upat mi innsungsang kan din thei ding ih a sual mi le a thin aw mi tisa duh nak kha kan ral ring thei ding a si.

           Innsungsang ah mitcaw duhdawt nak cu kan pial a tul. Hamtam nak cu thinlung thleng awk nak ih a thawh nak a si tiin kan ti thei a si.

Ref. နီလာရိုင္း၏သက္ဆံုးတိုင္စာအုပ္မွ ဘာသာျပန္ဆိုထားျခင္းျဖစ္ပါသည္။